ਬਾਲੀਵੁੱਡ ਅਭਿਨੇਤਰੀ ਸਾਨਿਆ ਮਲਹੋਤਰਾ ਦਾ ਕਹਿਣਾ ਹੈ ਕਿ ਉਸ ਨੂੰ ਹਾਰਰ ਫਿਲਮ ਦੇਖਣਾ ਬੇਹੱਦ ਪਸੰਦ ਹੈ। ‘ਦੰਗਲ’ ਗਰਲ ਸਾਨਿਆ ਮਲਹੋਤਰਾ ਅੱਜਕੱਲ੍ਹ ਆਪਣੀ ਫਿਲਮ ‘ਫੋਟੋਗਰਾਫ’ ਨਾਲ ਚਰਚਾ 'ਚ ਹੈ। ਫਿਲਮ ਵਿੱਚ ਉਸ ਦੇ ਅਭਿਨੈ ਦੀ ਕਾਫੀ ਤਾਰੀਫ ਹੋਈ ਹੈ। ਇਸ ਤੋਂ ਪਹਿਲਾਂ ਉਸ ਦੀ ਫਿਲਮ ‘ਬਧਾਈ ਹੋ’ ਰਿਲੀਜ਼ ਹੋਈ ਤੇ ਸੁਪਰਹਿੱਟ ਰਹੀ ਸੀ। ਫਿਲਮ ‘ਫੋਟੋਗਰਾਫ’ ਦੇ ਨਿਰਦੇਸ਼ਕ ਰਿਤੇਸ਼ ਬੱਤਰਾ ਨੇ ਮਜ਼ਾਕ ਨਾਲ ਕਿਹਾ ਕਿ ਸਾਨਿਆ ਤੋਂ ਭੂਤ ਵੀ ਡਰਦੇ ਹਨ।
ਦਿੱਲੀ ਦੀ ਰਹਿਣ ਵਾਲੀ ਸਾਨਿਆ ਅਸਲ ਜ਼ਿੰਦਗੀ 'ਚ ਪੰਜਾਬੀ ਪਰਵਾਰ ਵਿੱਚੋਂ ਹੈ ਤੇ ਫਿਲਮ ‘ਫੋਟੋਗਰਾਫ’ ਵਿੱਚ ਉਸ ਨੇ ਗੁਜਰਾਤੀ ਲੜਕੀ ਦਾ ਕਿਰਦਾਰ ਨਿਭਾਇਆ ਹੈ। ਪਿਛਲੇ ਦਿਨੀਂ ਸਾਨਿਆ ਨੇ ਫੇਸਬੁੱਕ ਪੋਸਟ 'ਚ ਦੱਸਿਆ ਸੀ ਕਿ ਉਹ ਡਾਂਸਰ ਬਣਨਾ ਚਾਹੁੰਦੀ ਸੀ, ਪਰ ਡਾਂਸਰ ਬਣਦੇ-ਬਣਦੇ ਐਕਟਰ ਬਣ ਗਈ। ਸਾਨਿਆ ਨੇ ਪੋਸਟ 'ਚ ਲਿਖਿਆ ਸੀ, ‘ਮੈਂ ਅਜਿਹੀ ਬੱਚੀ ਸੀ, ਜੋ ਹਰ ਵਿਆਹ 'ਚ ਡਾਂਸ ਕਰਦੀ ਸੀ। ਮੇਰੇ ਮਾਤਾ-ਪਿਤਾ ਮੈਨੂੰ ਹਰ ਵਿਆਹ 'ਚ ਲੈ ਕੇ ਜਾਂਦੇ ਸਨ ਤਾਂ ਕਿ ਮੈਂ ਦਿਲ ਖੋਲ੍ਹ ਕੇ ਡਾਂਸ ਕਰ ਸਕਾਂ।’