ਹੁਸ਼ਿਆਰਪੁਰ, 23 ਮਾਰਚ (ਪੋਸਟ ਬਿਊਰੋ)- ਪੁਲਸ ਦੀ ਹਿਰਾਸਤ ਵਿੱਚੋਂ ਭਗੌੜੇ ਹੋਣ ਪਿੱਛੋਂ ਬਸਤੀ ਸੈਂਸੀਆਂ (ਦੇਨੋਵਾਲ ਖੁਰਦ) ਪਿੰਡ ਦੇ ਮੇਜਰ ਨਾਂਅ ਦੇ ਕੈਦੀ ਨੇ ਕੱਲ੍ਹ ਸ਼ਾਮ ਆਪਣੇ ਘਰ ਵਿੱਚ ਆਪਣੀ ਪਤਨੀ ਤੇ ਧੀ ਉੱਤੇ ਰਿਵਾਲਵਰ ਵਿੱਚੋਂ ਪੰਜ ਫਾਇਰ ਕੀਤੇ ਅਤੇ ਉਸ ਦੀ ਪਤਨੀ ਰਜਨੀ (35) ਅਤੇ ਧੀ ਪ੍ਰਿਆ (15) ਦੀ ਮੌਤ ਹੋ ਗਈ।
ਪੁਲਸ ਦੇ ਦੱਸਣ ਮੁਤਾਬਕ ਵੱਖ-ਵੱਖ ਕੇਸਾਂ ਕਾਰਨ ਹੁਸ਼ਿਆਰਪੁਰ ਜੇਲ੍ਹ ਵਿੱਚ ਬੰਦ ਮੇਜਰ ਕੁਝ ਮਹੀਨੇ ਪਹਿਲਾਂ ਪੇਸ਼ੀ ਵੇਲੇ ਫਰਾਰ ਹੋ ਗਿਆ ਸੀ। ਕੱਲ੍ਹ ਉਸ ਨੇ ਆਪਣੇ ਘਰ ਪਹੁੰਚ ਕੇ ਪਤਨੀ ਤੇ ਧੀ ਨੂੰ ਮਾਰ ਦਿਤਾ। ਪਤਾ ਲੱਗਾ ਹੈ ਕਿ ਮੇਜਰ ਹੁਸ਼ਿਆਰਪੁਰ ਅਦਾਲਤ ਤੋਂ 19 ਜੂਨ 2018 ਤੋਂ ਭਗੌੜਾ ਹੈ ਤੇ ਉਸ ਉੱਤੇ ਸੱਤ ਕੇਸ ਦਰਜ ਹਨ। ਉਸ ਵੱਲੋਂ ਮਾਰ ਦਿੱਤੀ ਗਈ ਧੀ ਪ੍ਰਿਆ ਨੌਵੀਂ ਜਮਾਤ ਦੀ ਵਿਦਿਆਰਥਣ ਸੀ। ਮੇਜਰ ਦੀ ਛੋਟੀ ਧੀ ਪ੍ਰਿਅੰਕਾ (ਸੱਤ ਸਾਲ) ਨੇ ਦੱਸਿਆ ਕਿ ਉਸ ਦੀ ਮਾਂ ਖਾਣਾ ਬਣਾ ਰਹੀ ਸੀ ਤਾਂ ਪਿਤਾ ਨੇ ਬਾਹਰੋਂ ਆ ਕੇ ਮਾਂ ਨਾਲ ਕਿਸੇ ਗੱਲ 'ਤੇ ਬਹਿਸ ਸ਼ੁਰੂ ਕਰ ਦਿੱਤੀ ਤੇ ਫਿਰ ਗੋਲੀ ਚਲਾ ਦਿੱਤੀ। ਪ੍ਰਿਅੰਕਾ ਨੇ ਮੰਜੇ ਥੱਲੇ ਵੜ ਕੇ ਆਪਣੀ ਜਾਨ ਬਚਾਈ ਅਤੇ ਮੇਜਰ ਦੇ ਘਰੋਂ ਜਾਣ ਪਿੱਛੋਂ ਉਸ ਨੇ ਬਾਹਰ ਆ ਕੇ ਰੌਲਾ ਪਾਇਆ ਤਾਂ ਮੁਹੱਲੇ ਦੇ ਲੋਕ ਇਕੱਠੇ ਹੋ ਗਏ ਅਤੇ ਜ਼ਖਮੀਆਂ ਨੂੰ ਗੜ੍ਹਸ਼ੰਕਰ ਦੇ ਸਰਕਾਰੀ ਹਸਪਤਾਲ ਦਾਖਲ ਕਰਵਾਇਆ ਅਤੇ ਪੁਲਸ ਨੂੰ ਸੂਚਨਾ ਦਿੱਤੀ।