ਲੰਡਨ, 24 ਮਾਰਚ (ਪੋਸਟ ਬਿਊਰੋ)- ਬ੍ਰਿਟੇਨ ਵਿੱਚ ਰਹਿੰਦੇ ਭਾਰਤੀ ਮੂਲ ਦੇ ਲੋਕਾਂ ਦਾ ਸੋਨੇ ਲਈ ਪ੍ਰੇਮ ਉਨ੍ਹਾਂ ਨੂੰ ਭਾਰੀ ਪੈ ਰਿਹਾ ਹੈ। ਬੀਤੇ ਪੰਜ ਸਾਲਾਂ ਵਿੱਚ ਉਨ੍ਹਾਂ ਦੇ ਘਰਾਂ ਤੋਂ 140 ਮਿਲੀਅਨ ਪੌਂਡ (1280 ਕਰੋੜ ਰੁਪਏ) ਦੇ ਗਹਿਣੇ ਚੋਰੀ ਹੋਏ ਹਨ। ਇਹ ਜਾਣਕਾਰੀ ਸੂਚਨਾ ਅਧਿਕਾਰ ਹੇਠ ਮੰਗੀ ਗਈ ਜਾਣਕਾਰੀ ਤੋਂ ਸਾਹਮਣੇ ਆਈ ਹੈ।
ਬੀ ਬੀ ਸੀ ਵੱਲੋਂ ਖੋਜਪੂਰਨ ਪੱਤਰਕਾਰਤਾ ਰਾਹੀਂ ਇਕੱਠੀ ਕੀਤੀ ਜਾਣਕਾਰੀ ਦੇ ਮੁਤਾਬਕ ਬ੍ਰਿਟੇਨ ਦੀਆਂ ਦੁਕਾਨਾਂ ਵਿੱਚ ਏਸ਼ੀਅਨ ਗੋਲਡ ਦੇ ਨਾਂਅ ਨਾਲ ਵੇਚੇ ਜਾਣ ਵਾਲੇ ਗਹਿਣੇ ਅਕਸਰ ਵਿਆਹ ਦੇ ਮੌਕੇ ਤੋਹਫੇ ਵਜੋਂ ਦਿੱਤੇ ਜਾਂਦੇ ਹਨ। ਗਹਿਣੇ ਦੇਣ-ਲੈਣ ਦਾ ਇਹ ਰਿਵਾਜ ਦੱਖਣੀ ਏਸ਼ੀਆਈ ਪਰਵਾਰਾਂ ਵਿੱਚ ਚੋਖਾ ਚੱਲ ਰਿਹਾ ਹੈ। ਸਾਲ 2013 ਤੋਂ ਅੱਜ ਤੱਕ ਘਰਾਂ ਵਿੱਚ ਰੱਖੇ ਇਨ੍ਹਾਂ ਗਹਿਣਿਆਂ ਦੀ ਚੋਰੀ ਦੀਆਂ 28 ਹਜ਼ਾਰ ਘਟਨਾਵਾਂ ਹੋਈਆਂ ਹਨ। ਸਭ ਤੋਂ ਵੱਧ ਗਹਿਣੇ ਲੰਡਨ 'ਚ ਚੋਰੀ ਹੋਏ ਹਨ। ਇਥੋਂ 115.6 ਮਿਲੀਅਨ (ਪੌਂਡ (1056 ਕਰੋੜ ਰੁਪਏ) ਦੇ ਗਹਿਣੇ ਚੋਰੀ ਹੋਈ ਅਤੇ 9.6 ਮਿਲੀਅਨ ਪੌਂਡ (88 ਕਰੋੜ ਰੁਪਏ) ਦੇ ਗਹਿਣੇ ਮਾਨਚੈਸਟਰ ਇਲਾਕੇ ਵਿੱਚ ਚੋਰੀ ਹੋਏ ਸਨ। ਚੋਰੀ ਦੇ ਇਨ੍ਹਾਂ ਕੇਸਾਂ ਦੀ ਜਾਂਚ ਕਰ ਰਹੇ ਪੁਲਸ ਅਧਿਕਾਰੀ ਏਰਨ ਡੁੱਗਨ ਅਨੁਸਾਰ ਚੋਰ ਫੜਨ ਪਿੱਛੋਂ ਵੀ ਗਹਿਣਿਆਂ ਲੈਣ ਵਿੱਚ ਚੋਖੀ ਮੁਸ਼ਕਲ ਆਉਂਦੀ ਹੈ, ਕਿਉਂਕਿ ਗਹਿਣਿਆਂ ਨੂੰ ਬਹੁਤ ਜਲਦੀ ਗਲਾ ਕੇ ਸੋਨੇ ਨੂੰ ਵੇਚ ਦਿੱਤਾ ਜਾਂਦਾ ਹੈ।
ਭਾਰਤੀ ਭਾਈਚਾਰੇ ਦੇ ਲੋਕਾਂ ਵਿੱਚ ਗਹਿਣਿਆਂ ਲਈ ਪ੍ਰਸਿੱਧ ਸਟੋਰ ਚਲਾਉਣ ਵਾਲੇ ਸੰਜੇ ਕੁਮਾਰ ਦੇ ਮੁਤਾਬਕ ਉਹ ਆਪਣੇ ਗ੍ਰਾਹਕਾਂ ਨੂੰ ਗਹਿਣੇ ਸੁਰੱਖਿਅਤ ਰੱਖਣ ਦੇ ਢੰਗਾਂ ਦੀ ਜਾਣਕਾਰੀ ਦਿੰਦੇ ਰਹਿੰਦੇ ਹਨ ਅਤੇ ਗਹਿਣਿਆਂ ਦਾ ਬੀਮਾ ਕਰਾਉਣ ਦੀ ਵੀ ਸਲਾਹ ਦਿੰਦੇ ਹਨ। ਸੰਜੇ ਕੁਮਾਰ ਦਾ ਸਟੋਰ ਲੰਡਨ ਵਿੱਚ ਹੈ। ਉਨ੍ਹਾਂ ਦੱਸਿਆ ਕਿ ਬ੍ਰਿਟੇਨ ਵਿਚਲੇ ਭਾਰਤੀ ਮੂਲ ਦੇ ਲੋਕਾਂ ਦੇ ਮਾਤਾ-ਪਿਤਾ ਅਤੇ ਦਾਦਾ-ਦਾਦੀ ਉਨ੍ਹਾਂ ਨੂੰ ਸੋਨਾ ਖਰੀਦਣ ਨੂੰ ਕਹਿੰਦੇ ਹਨ। ਬਜ਼ੁਰਗ ਸੋਨੇ ਨੂੰ ਸੁਰੱਖਿਅਤ ਨਿਵੇਸ਼ ਮੰਨਦੇ ਹਨ, ਨਾਲ ਹੀ ਉਸ ਦਾ ਕੋਲ ਹੋਣਾ ਸ਼ੁੱਭ ਸ਼ਗਨ ਮੰਨਦੇ ਹਨ।