ਮਾਂਟਰੀਅਲ, 24 ਮਾਰਚ (ਪੋਸਟ ਬਿਊਰੋ) : ਸ਼ੁੱਕਰਵਾਰ ਨੂੰ ਆਪਣੇ ਮੋਬਾਈਲ ਹੋਮ ਵਿੱਚ ਮ੍ਰਿਤਕ ਪਾਏ ਗਏ ਬਜ਼ੁਰਗ ਕੈਨੇਡੀਅਨ ਜੋੜੇ ਦੇ ਮਾਮਲੇ ਦੀ ਜਾਂਚ ਫਲੋਰਿਡਾ ਪੁਲਿਸ ਵੱਲੋਂ ਸੁ਼ਰੂ ਕਰ ਦਿੱਤੀ ਗਈ ਹੈ। ਪੁਲਿਸ ਇਸ ਨੂੰ ਦੂਹਰਾ ਕਤਲ ਕੇਸ ਮੰਨ ਕੇ ਜਾਂਚ ਕਰ ਰਹੀ ਹੈ।
ਬ੍ਰੋਵਾਰਡ ਕਾਊਂਟੀ ਸ਼ੈਰਿਫ ਆਫਿਸ ਦਾ ਕਹਿਣਾ ਹੈ ਕਿ ਮਾਰਕ ਤੇ ਰੀਟਾ ਗੈਗਨੇ ਦੇ ਗੁਆਂਢੀਆਂ ਵੱਲੋਂ ਇਨ੍ਹਾਂ ਦੋਵਾਂ ਦੀਆਂ ਲਾਸ਼ਾਂ ਉਨ੍ਹਾਂ ਦੇ ਪੌਂਪੈਨੋ ਬੀਚ ਸਥਿਤ ਘਰ ਵਿੱਚ ਪਾਈਆਂ ਗਈਆਂ। ਕੁੱਝ ਦਿਨਾਂ ਤੱਕ ਇਸ ਜੋੜੇ ਨੂੰ ਨਾ ਵੇਖਣ ਕਾਰਨ ਪਰੇਸ਼ਾਨ ਹੋਏ ਗੁਆਂਢੀ ਜਦੋਂ ਇਸ ਜੋੜੇ ਦੇ ਘਰ ਵਿੱਚ ਦਾਖਲ ਹੋਏ ਤਾਂ ਉਨ੍ਹਾਂ ਨੂੰ ਦੋਵਾਂ ਦੀਆਂ ਲਾਸ਼ਾਂ ਨਜ਼ਰ ਆਈਆਂ। ਗੁਆਂਢੀਆਂ ਨੇ ਇਹ ਵੀ ਦੱਸਿਆ ਕਿ ਜਦੋਂ ਉਹ ਘਰ ਵਿੱਚ ਦਾਖਲ ਹੋਏ ਤਾਂ ਘਰ ਦਾ ਦਰਵਾਜ਼ਾ ਖੁੱਲ੍ਹਾ ਹੀ ਸੀ।
ਗਲੋਬਲ ਅਫੇਅਰਜ਼ ਕੈਨੇਡਾ ਦਾ ਕਹਿਣਾ ਹੈ ਕਿ ਮਾਇਆਮੀ ਕਾਉਂਸਲਰ ਆਫਿਸ ਦੇ ਅਧਿਕਾਰੀ ਸਥਾਨਕ ਅਧਿਕਾਰੀਆਂ ਨਾਲ ਰਲ ਕੇ ਹੋਰ ਵੇਰਵੇ ਇੱਕਠੇ ਕਰਨ ਦੀ ਕੋਸਿ਼ਸ਼ ਕਰ ਰਹੇ ਹਨ। ਫੈਡਰਲ ਵਿਭਾਗ ਵੱਲੋਂ ਮ੍ਰਿਤਕਾਂ ਦੇ ਪਰਿਵਾਰ ਨਾਲ ਦੁੱਖ ਸਾਂਝਾ ਕੀਤਾ ਗਿਆ। ਇਹ ਜੋੜਾ ਕਿਊਬਿਕ ਸ਼ਹਿਰ ਤੋਂ 120 ਕਿਲੋਮੀਟਰ ਦੱਖਣਪੂਰਬ ਵੱਲ ਸਥਿਤ ਸੇਂਟ ਕਮ ਲਿਨਿਏਰੇ, ਕਿਊਬਿਕ ਤੋਂ ਸੀ।