ਬੀਤੇ ਸਾਲ ਫਿਲਮ ‘ਧੜਕ’ ਨਾਲ ਮਾਇਆ ਨਗਰੀ ਵਿੱਚ ਕਦਮ ਰੱਖਣ ਵਾਲੀ ਜਾਹਨਵੀ ਕਪੂਰ ਨੇ ਇਨ੍ਹੀਂ ਦਿਨੀਂ ਆਪਣੀ ਅਗਲੀ ਫਿਲਮ ਦੀ ਤਿਆਰੀ ਆਰੰਭ ਦਿੱਤੀ ਹੈ। ਫਿਲਮ ਵਿੱਚ 1999 ਦੇ ਕਾਰਗਿਲ ਜੰਗ ਵਿੱਚ ਹਿੱਸਾ ਲੈ ਚੁੱਕੀ ਔਰਤ ਪਾਇਲਟ ਗੁੰਜਨ ਸਕਸੈਨਾ ਦੀ ਭੂਮਿਕਾ ਨਿਭਾਉਣ ਜਾ ਰਹੀ ਜਾਹਨਵੀ ਲਈ ਇਹ ਬਾਇਓਪਿਕ ਬਹੁਤ ਮਹੱਤਵ ਰੱਖਦੀ ਹੈ। ਇਸ ਫਿਲਮ ਬਾਰੇ ਉਹ ਸ਼ੁਰੂ ਤੋਂ ਬਹੁਤ ਉਤਸ਼ਾਹਤ ਹੈ ਅਤੇ ਇਸ ਲਈ ਕੋਈ ਕਸਰ ਛੱਡਣਾ ਨਹੀਂ ਚਾਹੁੰਦੀ। ਇਹੀ ਕਾਰਨ ਹੈ ਕਿ ਫਿਲਮ ਵਿੱਚ ਆਪਣੇ ਰੋਲ ਲਈ ਉਹ ਸੱਤ ਤੋਂ ਅੱਠ ਕਿਲੋ ਭਾਰ ਵਧਾਉਣ ਲਈ ਵੀ ਰਾਜ਼ੀ ਹੋ ਗਈ।
ਸੂਤਰਾਂ ਅਨੁਸਾਰ ਜਾਹਨਵੀ ਨੇ ਪਹਿਲਾਂ ਹੀ ਫਿਲਮ 'ਤੇ ਕੰਮ ਕਰਨਾ ਸ਼ੁਰੂ ਕਰ ਦਿੱਤਾ ਹੈ ਅਤੇ ਉਸ ਦੀਆਂ ਤਾਜ਼ਾ ਤਸਵੀਰਾਂ 'ਚ ਉਸ ਦਾ ਵੱਧਦਾ ਹੋਇਆ ਭਾਰ ਜਾਹਿਰ ਹੋਣ ਲੱਗਾ ਹੈ। ਇਹੀ ਨਹੀਂ ਉਹ ਆਪਣੀ ਲੁਕ ਨਾਲ ਫਿਲਮ ਦੇ ਰੋਲ ਨੂੰ ਵੱਧ ਤੋਂ ਵੱਧ ਅਸਲੀ ਦਿਖਾਉਣ ਲਈ ਜਹਾਜ਼ ਉਡਾਉਣ ਦੀ ਟਰੇਨਿੰਗ ਵੀ ਲੈਣ ਦੀ ਤਿਆਰੀ ਵਿੱਚ ਹੈ। ਪਿਛਲੇ ਦਿਨੀਂ ਸਮੁੰਦਰੀ ਫੌਜ ਦੀ ਯੂਨੀਫਾਰਮ 'ਚ ਉਸ ਦੀ ਇੱਕ ਤਸਵੀਰ ਵੀ ਸਾਹਮਣੇ ਆਈ ਸੀ। ਉਂਝ ਪਹਿਲਾਂ ਵੀ ਉਹ ਆਪਣੀ ਫਿਟਨੈਸ ਬਾਰੇ ਬਹੁਤ ਚੌਕਸ ਰਹਿੰਦੀ ਹੈ ਤੇ ਉਸ ਦੀ ਜਿਨ ਲੁਕ ਦੀਆਂ ਤਸਵੀਰਾਂ ਵੀ ਉਸ ਦੇ ਸੋਸ਼ਲ ਮੀਡੀਆ ਅਕਾਊਂਟ 'ਤੇ ਨਜ਼ਰ ਆਉਂਦੀਆਂ ਹਨ। ਹਿੰਦੀ ਦੇ ਨਾਲ ਹੀ ਜਾਹਨਵੀ ਸਾਊਥ ਦੀਆਂ ਫਿਲਮਾਂ ਵਿੱਚ ਵੀ ਡੈਬਿਊ ਲਈ ਤਿਆਰ ਹੈ। ਪਹਿਲਾਂ ਚਰਚਾ ਸੀ ਕਿ ਉਹ ਹਿੰਦੀ ਦੀ ਹਿੱਟ ਫਿਲਮ ‘ਪਿੰਕ’ ਦੇ ਤਮਿਲ ਰੀਮੇਕ ਵਿੱਚ ਨਜ਼ਰ ਆਏਗੀ, ਪਰ ਇੰਝ ਲੱਗਦਾ ਹੈ ਕਿਉਂਕਿ ਖਬਰਾਂ ਹਨ ਕਿ ਉਹ ਫਿਲਮ ‘ਵਰਮਾ’ ਵਿੱਚ ਕੰਮ ਕਰੇਗੀ। ਇਸ ਫਿਲਮ ਦਾ ਪਹਿਲਾਂ ਤੋਂ ਕੰਮ ਚੱਲ ਰਿਹਾ ਹੈ, ਪਰ ਕਿਹਾ ਜਾ ਰਿਹਾ ਹੈ ਕਿ ਇਸ ਨੂੰ ਨਵੇਂ ਸਿਰੇ ਤੋਂ ਸ਼ੁਰੂ ਕਰਨ ਦੀ ਤਿਆਰੀ ਹੋ ਰਹੀ ਹੈ। ਪੁਰਾਣੀ ਸਟਾਰਕਾਸਟ ਹਟਾ ਕੇ ਨਵੀਂ ਕਾਸਟ 'ਤੇ ਵਿਚਾਰ ਹੋਣ ਵਾਲਾ ਹੈ। ਜਿੱਥੇ ਲੀਡ ਹੀਰੋ ਵਜੋਂ ਸਾਊਥ ਦੇ ਸੁਪਰਸਟਾਰ ਵਿਕਰਮ ਦਾ ਬੇਟਾ ਧਰੁਵ ਕੰਮ ਕਰੇਗਾ, ਉਥੇ ਫੀਮੇਲ ਲਈ ਜਾਹਨਵੀ ਦੇ ਨਾਂਅ ਦੀ ਚਰਚਾ ਹੈ। ਫਿਲਮ ਜੂਨ 'ਚ ਰਿਲੀਜ਼ ਹੋ ਸਕਦੀ ਹੈ ਜਿਸ ਨੂੰ ਤੇਲਗੂ ਦੀ ਸੁਪਰਹਿੱਟ ਫਿਲਮ ‘ਅਰਜੁਨ ਰੈੱਡੀ’ ਦਾ ਰੀਮੇਕ ਮੰਨਿਆ ਜਾ ਰਿਹਾ ਹੈ। ਜਾਹਨਵੀ ਦੇ ਖਾਤੇ ਵਿੱਚ ਇਸ ਸਮੇਂ ਫਿਲਮ ‘ਤਖਤ' ਵੀ ਹੈ ਜਿਸ ਵਿੱਚ ਰਣਵੀਰ ਸਿੰਘ, ਆਲੀਆ ਭੱਟ, ਭੂਮੀ ਪੇਡਨੇਕਰ ਅਤੇ ਵਿੱਕੀ ਕੌਸ਼ਲ ਵੀ ਨਜ਼ਰ ਆਉਣਗੇ।
ਪਿਛਲੇ ਦਿਨੀਂ ਜਾਹਨਵੀ ਨੇ ਭੈਣ ਖੁਸ਼ੀ ਦੇ ਨਾਲ ਨੇਹਾ ਧੂਪੀਆ ਦੇ ਰੇਡੀਓ ਟਾਕ ਸ਼ੋਅ 'ਚ ਹਿੱਸਾ ਲੈਂਦੇ ਹੋਏ ਇੱਕ ਦਿਲਚਸਪ ਖੁਲਾਸਾ ਕੀਤਾ ਕਿ ਉਸ ਦੇ ਪਿਤਾ ਬੋਨੀ ਕਪੂਰ ਬਚਪਨ ਤੋਂ ਉਸ ਦੇ ਪੈਰਾਂ ਦਾ ਮਜ਼ਾਕ ਉਡਾਉਂਦੇ ਸਨ। ਜਦੋਂ ਉਸ ਤੋਂ ਉਸ ਦੀਆਂ ਟੋਨਡ ਅਤੇ ਸ਼ੇਪਡ ਲੈਗਜ਼ ਦਾ ਸੀਕੇਰਟ ਪੁੱਛਿਆ ਗਿਆ ਤਾਂ ਉਸ ਨੇ ਕਿਹਾ, ‘‘ਇਹ ਡੈਡੀ ਦੀ ਵਜ੍ਹਾ ਨਾਲ ਹੋਇਆ ਹੈ। ਉਹ ਬਚਪਨ 'ਚ ਮੇਰੇ ਪੈਰਾਂ ਦਾ ਮਜ਼ਾਕ ਉਡਾਉਂਦੇ ਅਤੇ ਕਹਿੰਦੇ ਸਨ ‘ਚਿਕਨ ਲੈਗਸ’। ਇਸੇ ਵਜ੍ਹਾ ਕਰ ਕੇ ਮੈਂ ਆਪਣੇ ਪੈਰਾਂ ਉੱਤੇ ਸਖਤ ਮਿਹਨਤ ਕੀਤੀ।” ਸੋਸ਼ਲ ਮੀਡੀਆ 'ਚ ਉਸ ਦੇ ਨਾਂਅ ਦੇ ਕਈ ਫੈਨਪੇਜ ਬਣੇ ਹੋਏ ਹਨ ਅਤੇ ਜਾਹਨਵੀ ਦੀ ਹਰ ਫੋਟੋ ਟ੍ਰੈਂਡ 'ਚ ਰਹਿੰਦੀ ਹੈ। ਉਹ ਸੋਸ਼ਲ ਮੀਡੀਆ ਅਟੈਂਸ਼ਨ ਨੂੰ ਇੰਜੁਆਏ ਕਰ ਰਹੀ ਹੈ। ਉਸ ਨੇ ਨੇਹਾ ਦੇ ਸ਼ੋਅ 'ਚ ਕਿਹਾ ਕਿ ਖੁਦ ਨੂੰ ਮਿਲ ਰਹੀ ਅਟੈਂਸ਼ਨ ਨਾਲ ਉਹ ਖੁਸ਼ ਹੈ। ਉਸ ਨੂੰ ਇਸ ਨਾਲ ਪਿਆਰ ਹੈ।