ਨਵੀਂ ਦਿੱਲੀ, 21 ਮਾਰਚ (ਪੋਸਟ ਬਿਊਰੋ)- ਦਿੱਲੀ ਦੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਸਾਬਕਾ ਪ੍ਰਧਾਨ ਮਨਜੀਤ ਸਿੰਘ ਜੀ ਕੇ ਆਪਣੇ ਖਿਲਾਫ ਲੱਗ ਰਹੇ ਭਿ੍ਰਸ਼ਟਾਚਾਰ ਦੇ ਦੋਸ਼ਾਂ ਦੇ ਬਾਅਦ ਦਰਜ ਹੋਏ ਕੇਸ ਵਿੱਚ ਦਿੱਲੀ ਪੁਲਸ ਦੀ ਇੱਕ ਕਲੋਜ਼ਰ ਪੇਸ਼ ਹੋਣ ਦੇ ਬਾਅਦ ਕੱਲ੍ਹ ਮੀਡੀਆ ਸਾਹਮਣੇ ਆਏ ਅਤੇ ਇਸ ਦੇ ਨਾਲ ਹੀ ਸ਼ਿਕਾਇਤ ਕਰਤਾ ਦੀ ਇੱਛਾ ਅਤੇ ਵਿਹਾਰ ਬਾਰੇ ਵੀ ਉਨ੍ਹਾਂ ਨੇ ਕਈ ਸਵਾਲ ਚੁੱਕੇ।
ਆਪਣੇ ਖਿਲਾਫ ਅਦਾਲਤੀ ਹੁਕਮ 'ਤੇ ਕੇਸ ਦਰਜ ਹੋਣ ਦੇ ਬਾਅਦ ਤਿੰਨ ਮਹੀਨੇ ਚੁੱਪ ਰਹੇ ਮਨਜੀਤ ਸਿੰਘ ਜੀ ਕੇ ਨੇ ਇਨ੍ਹਾਂ ਦੋਸ਼ਾਂ ਦੇ ਪਿੱਛੇ ਵੱਡੀ ਸਾਜ਼ਿਸ਼ ਦਾ ਵੀ ਸ਼ੱਕ ਪ੍ਰਗਟਾਇਆ ਅਤੇ ਕਿਹਾ ਕਿ ਇਕ ਪਾਸੇ 1984 ਸਿੱਖਾਂ ਦੇ ਕਤਲਾਂ ਦਾ ਦੋਸ਼ੀ ਜਗਦੀਸ਼ ਟਾਈਟਲਰ ਮੇਰੇ ਖਿਲਾਫ ਕੇਸ ਦਰਜ ਕਰਾਉਂਦਾ ਹੈ ਤਾਂ ਦੂਸਰੇ ਪਾਸੇ ਦਿੱਲੀ ਸਿੱਖ ਗੁਰਦੁਆਰਾ ਕਮੇਟੀ ਦਾ ਮੈਂਬਰ ਗੁਰਮੀਤ ਸਿੰਘ ਸ਼ੰਟੀ ਮੇਰੇ ਬਾਰੇ ਟਾਈਟਲਰ ਦੀ ਸਟਿੰਗ ਵੀਡੀਓ ਜਾਰੀ ਕਰਨ ਦੇ ਬਦਲੇ ਕਰੋੜਾਂ ਰੁਪਏ ਲੈਣ ਦਾ ਦੋਸ਼ ਲਾ ਕੇ ਕੇਸ ਦਰਜ ਕਰਾਉਂਦਾ ਹੈ, ਪਰ ਅਦਾਲਤ ਵਿੱਚ ਇਸ ਦਾ ਕੋਈ ਸਬੂਤ ਨਹੀਂ ਰੱਖਦਾ, ਫਿਰ ਟਾਈਟਲਰ ਸ਼ੰਟੀ ਦਾ ਇਹ ਰਿਸ਼ਤਾ ਕੀ ਕਹਾਉਂਦਾ ਹੈ? ਇਕ ਪਾਸੇ ਕਤਲਾਂ ਦੇ ਦੂਸਰੇ ਵੱਡੇ ਦੋਸ਼ੀ ਸੱਜਣ ਕੁਮਾਰ ਨੂੰ ਅਸੀਂ ਜੇਲ੍ਹ ਭੇਜਦੇ ਹਾਂ ਤੇ ਟਾਈਟਲਰ ਨੂੰ ਜੇਲ ਭੇਜਣ ਦੀ ਤਿਆਰੀ ਕਰਦੇ ਹਾਂ, ਪਰ ਇਸ ਦੌਰਾਨ ਮੇਰੀ ਪੰਥ ਪ੍ਰਤੀ ਵਫਾਦਾਰੀ 'ਤੇ ਸਵਾਲ ਚੁੱਕਣ ਬਾਰੇ ਸ਼ੰਟੀ ਉਤਸ਼ਾਹ ਵਿੱਚ ਕਾਤਲਾਂ ਨੂੰ ਸੁਰੱਖਿਆ ਦੇਣ ਦੀ ਮੁਹਿੰਮ ਦੇ ਮੋਹਰ ਬਣੇ ਨਜ਼ਰ ਕਿਉਂ ਆਉਂਦੇ ਹਨ? ਮਨਜੀਤ ਸਿੰਘ ਜੀ ਕੇ ਨੇ ਆਪਣਾ ਕਿਰਦਾਰ ਘਾਣ ਕਰਨ ਦੀ ਸਾਜ਼ਿਸ਼ ਰੱਚਣ ਵਾਲੇ ਸਾਰੇ ਲੋਕਾਂ ਦਾ ਨਾਮ ਲਏ ਬਿਨਾ ਆਪਣੇ ਸਮੇਤ ਸਭ ਦਾ ਲਾਈ ਡਿਟੈਕਟਰ ਟੈਸਟ ਕਰਵਾਉਣ ਦੀ ਦਿੱਲੀ ਪੁਲਸ ਨੂੰ ਅਪੀਲ ਕੀਤੀ ਅਤੇ ਆਪਣੇ ਪਿਤਾ ਤੇ ਖੁਦ ਵੱਲੋਂ ਕੀਤੇ ਗਏ ਪੰਥਕ ਕਾਰਜਾਂ ਨੂੰ ਵੀ ਆਪਣੇ ਸਰਗਰਮ ਸਿਆਸੀ ਵਿਰੋਧੀਆਂ ਦੀ ਤਤਪਰਤਾ ਨਾਲ ਜੋੜਿਆ।
ਮਨਜੀਤ ਸਿੰਘ ਜੀ ਕੇ ਨੇ ਲੋਕ ਸਭਾ ਚੋਣਾਂ ਲੜਨ ਦੀਆਂ ਅਟਕਲਾਂ ਦੇ ਬਾਰੇ ਕਿਹਾ ਕਿ ਸਿੱਖ ਨੀਤੀ ਤੇ ਰਾਜਨੀਤੀ ਇਕੱਠੇ ਨਹੀਂ ਚੱਲਦੀ, ਉਹ ਧਰਮ ਦੀ ਨੀਤੀ ਤੇ ਰਾਜਨੀਤੀ ਨੂੰ ਨਾਲ ਲੈ ਕੇ ਚੱਲਣ ਵਿੱਚ ਵਿਸ਼ਵਾਸ ਨਹੀਂ ਰੱਖਦੇ।