ਲੁਧਿਆਣਾ, 20 ਮਾਰਚ (ਪੋਸਟ ਬਿਊਰੋ)- ਲੋਕ ਇਨਸਾਫ ਪਾਰਟੀ ਦੇ ਮੁਖੀ ਅਤੇ ਵਿਧਾਇਕ ਸਿਮਰਜੀਤ ਸਿੰਘ ਬੈਂਸ ਤੇ ਉਨ੍ਹਾਂ ਦੀ ਟੀਮ ਨੇ ਸੋਸ਼ਲ ਮੀਡੀਆ ਫੇਸਬੁੱਕ 'ਤੇ ਲਾਈਵ ਹੋ ਕੇ ‘ਚਿੱਟਾ' ਖਰੀਦਣ ਦੇ ਸਟਿੰਗ ਅਪਰੇਸ਼ਨ ਤੋਂ ਬਾਅਦ ਕੱਲ੍ਹ ਪੁਲਸ ਵਾਲਿਆਂ ਵੱਲੋਂ ਪੰਜ ਹਜ਼ਾਰ ਰੁਪਏ ਰਿਸ਼ਵਤ ਲੈਣ ਦਾ ‘ਲਾਈਵ ਸਟਿੰਗ' ਕੀਤਾ। ਇਸ ਦੌਰਾਨ ਪੁਲਸ ਮੁਲਾਜ਼ਮਾਂ ਨੇ ਮੁਆਫੀ ਵੀ ਮੰਗੀ ਹੈ। ਸੀਨੀਅਰ ਅਧਿਕਾਰੀਆਂ ਨੇ ਇਸ ਦੀ ਜਾਂਚ ਦਾ ਭਰੋਸਾ ਦਿੱਤਾ ਹੈ।
ਇਸ ਸੰਬੰਧ ਵਿੱਚ ਸਿ਼ਕਾਇਤ ਕਰਤਾ ਮਨਪ੍ਰੀਤ ਸਿੰਘ ਨੇ ਦੱਸਿਆ ਕਿ ਉਸ ਦਾ ਮੋਟਰ ਸਾਈਕਲ 22 ਜਨਵਰੀ ਨੂੰ ਦੁਕਾਨ ਦੇ ਬਾਹਰੋਂ ਚੋਰੀ ਹੋ ਗਿਆ ਸੀ, ਜਿਸ ਦੀ ਉਸ ਨੇ ਡੀ ਐਮ ਸੀ ਹਸਪਤਾਲ ਪੁਲਸ ਚੌਕੀ ਨੂੰ ਸ਼ਿਕਾਇਤ ਕੀਤੀ ਸੀ। ਪਹਿਲਾਂ ਤਾਂ ਮੋਟਰ ਸਾਈਕਲ ਚੋਰੀ ਹੋਣ ਦੀ ਸ਼ਿਕਾਇਤ ਦਰਜ ਕਰਾਉਣ ਲਈ ਉਸ ਨੂੰ ਕਈ ਗੇੜੇ ਮਾਰਨੇ ਪਏ। ਉਸ ਨੇ ਆਪਣੇ ਮੋਟਰ ਸਾਈਕਲ ਦੀ ਫੋਟੋ ਵਟਸਐਪ ਗਰੁੱਪ ਵਿੱਚ ਵੀ ਵਾਇਰਲ ਕੀਤੀ ਤੇ ਇਸੇ ਆਧਾਰ 'ਤੇ ਤਿੰਨ ਦਿਨ ਪਹਿਲਾਂ ਉਸ ਨੂੰ ਇਕ ਵਿਅਕਤੀ ਦਾ ਫੋਨ ਆਇਆ ਕਿ ਤੁਹਾਡਾ ਮੋਟਰ ਸਾਈਕਲ ਸੁਭਾਸ਼ ਨਗਰ ਵਿੱਚ ਹੈ। ਉਹ ਮੋਟਰ ਸਾਈਕਲ ਲੱਭਣ ਤੋਂ ਬਾਅਦ ਖੁਦ ਪੁਲਸ ਚੌਕੀ ਗਿਆ। ਪੁਲਸ ਵਾਲਿਆਂ ਨੇ ਕਿਹਾ ਕਿ ਉਸ ਨੂੰ ਮੋਟਰ ਸਾਈਕਲ ਅਦਾਲਤ ਤੋਂ ਲੈਣਾ ਪਵੇਗਾ। ਉਸ ਨੇ ਜਦੋਂ ਪੁਲਸ ਦੀ ਮਿੰਨਤ ਕੀਤੀ ਤਾਂ ਉਨ੍ਹਾਂ 10 ਹਜ਼ਾਰ ਰੁਪਏ ਰਿਸ਼ਵਤ ਮੰਗੀ ਜਿਸ ਨੂੰ ਦੇਣ ਲਈ ਪਹਿਲਾਂ ਉਸ ਨੇ ਇਨਕਾਰ ਕੀਤਾ, ਪਰ ਗੱਲ ਪੰਜ ਹਜ਼ਾਰ ਰੁਪਏ ਦੇਣ ਉੱਤੇ ਮੁੱਕ ਗਈ। ਫਿਰ ਮਨਪ੍ਰੀਤ ਨੇ ਵਿਧਾਇਕ ਬੈਂਸ ਦੀ ਟੀਮ ਨਾਲ ਸੰਪਰਕ ਕੀਤਾ ਅਤੇ ਕੱਲ੍ਹ ਡੀ ਐਮ ਸੀ ਹਸਪਤਾਲ ਦੀ ਪੁਲਸ ਚੌਕੀ ਫੇਸਬੁੱਕ 'ਤੇ ਲਾਈਵ ਹੋ ਕੇ ਪੁੱਜੇ, ਜਿਥੇ ਚੌਕੀ ਦੇ ਮੁਨਸ਼ੀ ਅਵਤਾਰ ਸਿੰਘ ਅਤੇ ਕੇਸ ਦੇ ਜਾਂਚ ਕਰਤੇ ਕਾਂਸਟੇਬਲ ਜਸਵੰਤ ਸਿੰਘ ਨੇ ਸ਼ਰੇਆਮ ਚੌਕੀ ਵਿੱਚ ਬੈਠੇ ਹੀ ਪੰਜ ਹਜ਼ਾਰ ਰੁਪਏ ਰਿਸ਼ਵਤ ਲੈ ਲਈ ਅਤੇ ਤਿੰਨ ਹਜ਼ਾਰ ਰੁਪਏ ਚੌਕੀ ਇੰਚਾਰਜ ਮਲਕੀਤ ਸਿੰਘ ਨੂੰ ਦੇਣ ਦੀ ਗੱਲ ਆਖੀ। ਇਸ ਤੋਂ ਬਾਅਦ ਫੇਸਬੁੱਕ 'ਤੇ ਲਾਈਵ ਵਿਧਾਇਕ ਬੈਂਸ ਨੇ ਪੁਲਸ ਵਾਲਿਆਂ ਨਾਲ ਗੱਲ ਕਰ ਕੇ ਉਚ ਅਫਸਰਾਂ ਦੇ ਧਿਆਨ ਵਿੱਚ ਇਹ ਮਾਮਲਾ ਲਿਆਂਦਾ। ਇਸ ਮੌਕੇ ਪੁਲਸ ਵਾਲਿਆਂ ਨੇ ਵਿਧਾਇਕ ਬੈਂਸ ਤੋਂ ਮੁਆਫੀ ਮੰਗੀ।
ਥਾਣਾ ਡਵੀਜ਼ਨ ਨੰਬਰ ਅੱਠ ਦੇ ਐਸ ਐਚ ਓ ਅਮਿਤ ਠਾਕੁਰ ਦਾ ਕਹਿਣਾ ਹੈ ਕਿ ਰਿਸ਼ਵਤ ਲੈਣ ਦਾ ਮਾਮਲਾ ਉਨ੍ਹਾਂ ਦੇ ਧਿਆਨ ਵਿੱਚ ਆਇਆ ਹੈ ਤੇ ਉਹ ਇਸ ਦੀ ਤਫਤੀਸ਼ ਕਰ ਰਹੇ ਹਨ।