ਓਨਟਾਰੀਓ, 27 ਸਤੰਬਰ (ਪੋਸਟ ਬਿਊਰੋ) : ਅਗਲੇ ਸਾਲ ਅਪਰੈਲ ਤੱਕ ਓਨਟਾਰੀਓ ਵਿੱਚ 500 ਤੋਂ 1000 ਪ੍ਰਾਈਵੇਟ ਪੌਟ ਸ਼ੌਪਜ਼ ਖੁੱਲ੍ਹਣ ਦੀ ਸੰਭਾਵਨਾ ਹੈ। ਮੈਰੀਜੁਆਨਾ ਸਬੰਧੀ ਲਾਇਸੰਸਸ਼ੁਦਾ ਰੀਟੇਲਰ ਬਣਨ ਅਤੇ ਜਿੱਥੇ ਮੈਰੀਜੁਆਨਾ ਦਾ ਸੇਵਨ ਕੀਤਾ ਜਾ ਸਕਦਾ ਹੈ ਉਸ ਲਈ ਪ੍ਰੋਵਿੰਸ ਵੱਲੋਂ ਢਿੱਲੀਆਂ ਕੀਤੀਆਂ ਗਈਆਂ ਪਾਬੰਦੀਆਂ ਤੋਂ ਬਾਅਦ ਅਜਿਹਾ ਹੋਵੇਗਾ।
ਇਹ ਵੱਡੀਆਂ ਤਬਦੀਲੀਆਂ ਵੀਰਵਾਰ ਨੂੰ ਵਿਧਾਨਸਭਾ ਵਿੱਚ ਪੇਸ਼ ਕੀਤੀਆਂ ਗਈਆਂ। ਇਸ ਬਿੱਲ ਵਿੱਚ ਦੱਸਿਆ ਗਿਆ ਕਿ ਨਵੀਂ ਪ੍ਰੋਗਰੈਸਿਵ ਕੰਜ਼ਰਵੇਟਿਵ ਸਰਕਾਰ 17 ਅਕਤੂਬਰ ਤੋਂ ਕਾਨੂੰਨ ਦੇ ਦਾਇਰੇ ਵਿੱਚ ਆਉਣ ਜਾ ਰਹੀ ਮੈਰੀਜੁਆਨਾ ਦੀ ਵਿੱਕਰੀ ਨੂੰ ਨਿਯੰਤਰਿਤ ਕਰਨ ਲਈ ਕਿਸ ਤਰ੍ਹਾਂ ਕੰਮ ਕਰੇਗੀ। ਓਨਟਾਰੀਓ ਕੈਨਾਬਿਸ ਸਟੋਰ (ਓਸੀਐਸ), ਜੋ ਕਿ ਮੁੱਖ ਹੋਲਸੇਲਰ ਤੇ ਆਨਲਾਈਨ ਰੀਟੇਲਰ ਹੋਵੇਗਾ, ਉਸ ਦਿਨ ਤੋਂ ਹੀ ਆਰਡਰ ਲੈਣੇ ਸੁ਼ਰੂ ਕਰ ਦੇਵੇਗਾ।
ਅਟਾਰਨੀ ਜਨਰਲ ਮੰਤਰਾਲੇ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਗਾਹਕਾਂ ਨੂੰ ਇਸ ਮਕਸਦ ਲਈ ਆਨਲਾਈਨ ਅਕਾਊਂਟ ਨਹੀਂ ਖੁੱਲ੍ਹਵਾਉਣਾ ਹੋਵੇਗਾ ਤੇ ਓਸੀਐਸ ਕਿਸੇ ਵੀ ਹੋਰ ਮਕਸਦ ਲਈ ਨਿਜੀ ਜਾਣਕਾਰੀ ਦੀ ਵਰਤੋਂ ਨਹੀਂ ਕਰੇਗਾ। ਕੀ ਤੇ ਕਿਵੇਂ ਵੇਚਿਆ ਜਾਵੇਗਾ ਇਸ ਬਾਰੇ ਐਲਾਨ ਕੀਤਾ ਜਾਣਾ ਅਜੇ ਬਾਕੀ ਹੈ। ਹੈਰਾਨੀ ਵਾਲੀ ਗੱਲ ਇਹ ਵੀ ਹੈ ਕਿ ਪ੍ਰੋਵਿੰਸ ਵੱਲੋਂ ਨਿਯਮਾਂ ਨੂੰ ਕੁੱਝ ਜਿ਼ਆਦਾ ਹੀ ਨਰਮ ਕੀਤਾ ਜਾ ਰਿਹਾ ਹੈ। ਮੈਰੀਜੁਆਨਾ ਦੀ ਵਰਤੋਂ ਕਰਨ ਵਾਲਿਆਂ ਨੂੰ ਹੁਣ ਆਪਣੀ ਮਰਜ਼ੀ ਨਾਲ ਕਿਤੇ ਵੀ ਇਸ ਦਾ ਸੇਵਨ ਕਰਨ ਦੀ ਖੁੱਲ੍ਹ ਦਿੱਤੀ ਜਾ ਸਕਦੀ ਹੈ।
ਪਿਛਲੀ ਲਿਬਰਲ ਸਰਕਾਰ ਵੱਲੋਂ ਪ੍ਰਾਈਵੇਟ ਥਾਂਵਾਂ ਉੱਤੇ ਹੀ ਮੈਰੀਜੁਆਨਾ ਦੀ ਵਰਤੋਂ ਦੇ ਪ੍ਰਸਤਾਵ ਨੂੰ ਮੌਜੂਦਾ ਕੰਜ਼ਰਵੇਟਿਵ ਸਰਕਾਰ ਵੱਲੋਂ ਖਤਮ ਕਰ ਦਿੱਤਾ ਗਿਆ ਹੈ। ਇੰਜ ਲੱਗ ਰਿਹਾ ਹੈ ਕਿ ਪ੍ਰੋਵਿੰਸ ਵਿੱਚ ਹੁਣ ਮੈਰੀਜੁਆਨਾ ਨੂੰ ਵੀ ਸਿਗਰਟਾਂ ਵਾਂਗੂ ਕਿਤੇ ਵੀ ਵਰਤਿਆ ਜਾ ਸਕੇਗਾ।