ਐਮਸਟਰਡਮ, 18 ਮਾਰਚ, (ਪੋਸਟ ਬਿਊਰੋ)- ਨੀਦਰਲੈਂਡ ਦੇ ਉਟਰੈਕਟਸ਼ਹਿਰ ਵਿਚ ਗੋਲੀਬਾਰੀ ਦੀ ਵਾਰਦਾਤ ਵਿਚ 3 ਜਣਿਆਂ ਦੀ ਮੌਤ ਹੋ ਗਈ ਅਤੇ ਕਈ ਲੋਕਾਂ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ।
ਮਿਲੀ ਜਾਣਕਾਰੀ ਮੁਤਾਬਕ ਨੀਦਰਲੈਂਡ ਦੇ ਉਟਰੈਕਟ ਦੀ ਪੁਲਿਸ ਨੇ ਟਵੀਟ ਕਰ ਕੇ ਕਿਹਾ ਕਿ ਇਹ ਟਰਾਮ ਵਿਚ ਸ਼ੂਟਿੰਗ ਦੀ ਘਟਨਾ ਹੈ। ਉਨ੍ਹਾਂ ਦੱਸਿਆ ਕਿ ਲੋਕਾਂ ਦੀ ਮਦਦ ਲਈ ਹੈਲੀਕਾਪਟਰ ਵੀ ਤਾਇਨਾਤ ਕੀਤੇ ਗਏ ਹਨ। ਪੁਲਿਸ ਨੇ ਦੱਸਿਆ ਕਿ ਇਸ ਘਟਨਾ ਪਿੱਛੇ ਅਤਿਵਾਦੀਆਂ ਦਾ ਹੱਥ ਹੋ ਸਕਦਾ ਹੈ।ਉਟਰੈਕਟ ਪੁਲਿਸ ਦੇ ਮੁਤਾਬਕ ਫਾਇਰਿੰਗ ਸਥਾਨਕ ਸਮੇਂ ਮੁਤਾਬਕ ਸਵੇਰੇ 10:45 ਵਜੇ ਹੋਈ, ਜਿਸ ਵਿਚ ਕਈ ਲੋਕ ਜਖ਼ਮੀ ਹੋ ਗਏ ਹਨ। ਜਿਥੇ ਫਾਇਰਿੰਗ ਹੋਈ, ਉਸ ਇਲਾਕੇ ਨੂੰ ਪੂਰੀ ਤਰ੍ਹਾਂ ਸੀਲ ਕਰ ਕੇ ਪੁਲਿਸ ਇਸ ਦੀ ਜਾਂਚ ਕਰ ਰਹੀ ਹੈ।ਯੂਟ੍ਰੇਕਟ ਦੇ ਮੇਅਰ ਨੇ ਦੱਸਿਆ ਹੈ ਕਿ ਗੋਲੀਬਾਰੀ ਦੀ ਘਟਨਾ ਵਿਚ ਤਿੰਨ ਲੋਕਾਂ ਦੀ ਮੌਤ ਹੋਈ ਹੈ। ਡੱਚ ਐਂਟੀ ਟੈਰੋਰਿਜ਼ਮ ਦੇ ਹੈੱਡ ਨੇ ਕਿਹਾ ਕਿ ਊਟਰੈਕਟ ਵਿਚ ਕਈ ਥਾਈਂ ਗੋਲੀਬਾਰੀ ਦੀ ਸੂਚਨਾ ਮਿਲੀ ਹੈ। ਐਂਟੀ ਟੈਰਰ ਕੋ-ਆਰਡੀਨੇਟਰ ਪੀਟਰ ਜੈਪ ਐਲਹਰਸਬਰਗ ਨੇ ਟਵਿੱਟਰ ਉੱਤੇ ਲੋਕਾਂ ਨੂੰ ਯਾਦ ਕਰਵਾਇਆ ਕਿ ਅਜੇ ਹਮਲਾਵਰ ਪੁਲਸ ਦੀ ਪਹੁੰਚ ਤੋਂ ਬਾਹਰ ਹੈ। ਇਸ ਤੋਂ ਪਹਿਲਾਂ ਉਨ੍ਹਾਂ ਨੇ ਕਿਹਾ ਸੀ ਕਿ ਉਟਰੈਕਟ ਵਿਚ ਖਤਰੇ ਦਾ ਪੱਧਰ 5 ਤੱਕ ਪਹੁੰਚ ਗਿਆ ਹੈ, ਜੋ ਸਭ ਤੋਂ ਜ਼ਿਆਦਾ ਹੈ।
ਇਸ ਹਮਲੇ ਤੋਂ ਬਾਅਦ ਮੌਕੇ ਉੱਤੇ ਪੁੱਜੀ ਪੁਲਸ ਦਾ ਕਹਿਣਾ ਸੀ ਕਿ ਇਸ ਦੀ ਜਾਂਚ ਅੱਤਵਾਦੀ ਘਟਨਾ ਨਾਲ ਜੋੜ ਕੇ ਕੀਤੀ ਜਾ ਰਹੀ ਹੈ। ਇਹ ਘਟਨਾ ਉਟਰੈਕਟ ਸ਼ਹਿਰ ਦੀ ਟਰਾਮ ਸਰਵਿਸ ਦੇ 24 ਅਕਤੂਬਰ ਜੰਕਸ਼ਨ ਨੇੜੇ ਹੋਈ ਹੈ। ਪੁਲਸ ਨੇ ਨੇੜਲੇ ਇਲਾਕਿਆਂ ਨੂੰ ਘੇਰ ਲਿਆ ਅਤੇ ਮਦਦ ਲਈ ਕਈ ਹੈਲੀਕਾਪਟਰ ਤਾਇਨਾਤ ਕੀਤੇ ਗਏ ਸਨ। ਸਥਾਨਕ ਮੀਡੀਆ ਨੇ ਕਤਲ ਕਰਨ ਵਾਲੇ ਨਕਾਬਪੋਸ਼ ਦੇ ਨਾਲ ਹਥਿਆਰਬੰਦ ਪੁਲਸ ਅਤੇ ਟਰਾਮ ਨੇੜੇ ਐਮਰਜੈਂਸੀ ਵਾਹਨਾਂ ਦੀਆਂ ਫੋਟੋ ਦਿਖਾਈਆਂ, ਜੋ ਸੜਕ ਉੱਤੇ ਬਣੇ ਪੁਲ ਦੇ ਕੰਢੇ ਰੁਕ ਗਏ ਸਨ। ਨਿਊਜ਼ ਏਜੰਸੀ ਏ ਐਨ ਪੀ ਨੇ ਟਰਾਮ ਚਲਾਉਣ ਵਾਲੀ ਕਿਊਬਜ਼ ਕੰਪਨੀ ਦੇ ਹਵਾਲੇ ਨਾਲ ਕਿ ਸ਼ਹਿਰ ਵਿੱਚ ਟਰਾਮ ਸੇਵਾਵਾਂ ਕੁਝ ਦੇਰ ਰੋਕ ਦਿੱਤੀ ਗਈ ਹੈ।
ਡੱਚ ਪੁਲਸ ਅਤੇ ਨੀਮ ਫੌਜੀ ਫੋਰਸਾਂ ਨੇ ਏਅਰਪੋਰਟ ਅਤੇ ਮਹੱਤਵਪੂਰਨ ਰੇਲਵੇ ਸਟੇਸ਼ਨਾਂ ਉੱਤੇ ਜਾਂਚ ਕਰਨ ਦੇ ਨਾਲ ਸੁਰੱਖਿਆ ਵਧਾ ਦਿੱਤੀ ਹੈ। ਇਸ ਮੌਕੇ ਗੁਆਂਢ ਵਾਲੇ ਦੇਸ਼ ਜਰਮਨੀ ਵਿਚ ਵੀ ਪੁਲਸ ਸੁਰੱਖਿਆ ਵਧਾਈ ਗਈ ਹੈ। ਪੁਲਸ ਨੇ ਬਾਅਦ ਵਿੱਚ ਦੱਸਿਆ ਕਿ 37 ਸਾਲ ਦੇ ਇਕ ਵਿਅਕਤੀ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਇਸ ਵਿਅਕਤੀ ਦਾ ਜਨਮ ਤੁਰਕੀ ਵਿਚ ਹੋਇਆ ਅਤੇ ਇਸ ਦਾ ਯੂਟ੍ਰੇਕਟ ਵਿਚ ਹੋਈ ਗੋਲੀਬਾਰੀ ਨਾਲ ਸਿੱਧਾ ਸਬੰਧ ਹੈ।