ਨਵੀਂ ਦਿੱਲੀ, 18 ਮਾਰਚ (ਪੋਸਟ ਬਿਊਰੋ)- ਬੋਇੰਗ 737-ਮੈਕਸ ਜਹਾਜ਼ ਬਾਰੇ ਵਿਵਾਦ ਤੋਂ ਬਾਅਦ ਕੰਪਨੀ ਨੇ ਕਿਹਾ ਕਿ ਅਗਲੇ 10 ਦਿਨਾਂ ਵਿੱਚ ਇਸ ਜਹਾਜ਼ ਦਾ ਸਿਸਟਮ ਅਪਗ੍ਰੇਡ ਕੀਤਾ ਜਾਵੇਗਾ। ਇੰਡਸਟਰੀ ਨਾਲ ਜੁੜੇ ਦੋ ਸੂਤਰਾਂ ਨੇ ਦੱਸਿਆ ਕਿ ਬੋਇੰਗ 10 ਦਿਨਾਂ ਵਿੱਚ 737 ਏਅਰਕਰਾਫਟਸ ਲਈ ਐਮ ਸੀ ਏ ਐਸ ਪ੍ਰੀਵੈਂਸ਼ਨ ਸਿਸਟਮ ਨੂੰ ਅਪਗ੍ਰੇਡ ਕਰੇਗੀ। ਪਿਛਲੇ ਦਿਨੀਂ ਬੋਇੰਗ 737-ਮੈਕਸ ਜਹਾਜ਼ ਦੋ ਵਾਰ ਹਾਦਸਾ ਗ੍ਰਸਤ ਹੋ ਚੁੱਕਾ ਹੈ।
ਅਕਤੂਬਰ ਵਿੱਚ ਇੰਡੋਨੇਸ਼ੀਆ ਵਿੱਚ ਕ੍ਰੈਸ਼ ਹੋਏ 737 ਮੈਕਸ ਅੱਠ ਜਹਾਜ਼ ਦਾ ਕਾਰਨ ਇਸ ਸਿਸਟਮ ਦਾ ਅਪ-ਗ੍ਰੇਡ ਨਾ ਹੋਣਾ ਮੰਨਿਆ ਗਿਆ। ਸੂਤਰਾਂ ਤੋਂ ਪਤਾ ਲੱਗਾ ਹੈ ਕਿ ਪਿਛਲੇ ਹਫਤੇ ਇਥੋਪੀਆ ਏਅਰਲਾਈਨਜ਼ ਦੇ ਜਹਾਜ਼ ਦੇ ਕ੍ਰੈਸ਼ ਹੋਣ ਦੀ ਵਜ੍ਹਾ ਹਾਲੇ ਤੱਕ ਪਤਾ ਨਹੀਂ ਲੱਗ ਸਕੀ। ਨਾਂਅ ਨਾ ਦੱਸਣ ਦੀ ਸ਼ਰਤ 'ਤੇ ਸੂਤਰਾਂ ਨੇ ਦੱਸਿਆ ਕਿ ਹਾਲ ਹੀ ਵਿੱਚ ਹੋਏ ਹਾਦਸੇ ਤੋਂ ਪਹਿਲਾਂ ਸਾਫਟਵੇਅਰ ਅਪਗ੍ਰੇਡ ਚੱਲ ਰਿਹਾ ਸੀ। ਇਸ ਨੂੰ ਇੰਸਟਾਲ ਹੋਣ ਵਿੱਚ ਸਿਰਫ ਦੋ ਘੰਟੇ ਹੀ ਲੱਗਣਗੇ। ਵਰਨਣ ਯੋਗ ਹੈ ਕਿ ਦੁਨੀਆ ਵਿੱਚ ਇਥੋਪੀਆ ਜਹਾਜ਼ ਹਾਦਸੇ ਵਿੱਚ ਮਾਰੇ ਗਏ 157 ਯਾਤਰੀਆਂ ਅਤੇ ਕਰੂ ਮੈਂਬਰਾਂ ਦੀ ਮੌਤ ਤੋਂ ਬਾਅਦ ਬੋਇੰਗ 737 ਮੈਕਸ ਜਹਾਜ਼ਾਂ ਨੂੰ ਸੇਵਾ ਤੋਂ ਹਟਾ ਲਿਆ ਗਿਆ ਹੈ। ਇਸ ਤੋਂ ਇਲਾਵਾ ਬੋਇੰਗ ਨੇ ਆਪਣੇ ਟਾਪ-ਸੇਲਿੰਗ ਮਾਡਲ ਦੀ ਡਲਿਵਰੀ ਵੀ ਰੋਕ ਦਿੱਤੀ ਹੈ। ਇਥੋਪੀਅਨ ਏਅਰਕਰਾਫਟ ਦੇ ਬਲੈਕ ਬਾਕਸ ਤੋਂ ਪਤਾ ਲੱਗਾ ਹੈ ਕਿ ਉਡਾਣ ਭਰਨ ਤੋਂ ਕੁਝ ਮਿੰਟ ਬਾਅਦ ਜਹਾਜ਼ ਕ੍ਰੈਸ਼ ਹੋ ਗਿਆ ਸੀ। ਫਰਾਂਸ ਦੇ ਅਧਿਕਾਰੀ ਇਸ ਦੀ ਜਾਂਚ ਕਰ ਰਹੇ ਹਨ ਤਾਂ ਕਿ ਹਾਦਸੇ ਦੇ ਕਾਰਨਾਂ ਦਾ ਪਤਾ ਲਾਇਆ ਜਾ ਸਕੇ।