ਈਟਾਨਗਰ, 18 ਮਾਰਚ (ਪੋਸਟ ਬਿਊਰੋ)- ਲੋਕਤੰਤਰ ਵਿੱਚ ਹਰ ਕਿਸੇ ਦੀ ਵੋਟ ਮਾਇਨੇ ਰੱਖਦੀ ਹੈ। ਇਸ ਨੂੰ ਬਾਖੂਬੀ ਧਿਆਨ ਵਿੱਚ ਰੱਖ ਕੇ ਚੋਣ ਕਰਮਚਾਰੀ ਅਰੁਣਾਚਲ ਪ੍ਰਦੇਸ਼ ਦੇ ਇੱਕ ਵੋਟ ਕੇਂਦਰ 'ਤੇ ਇਕਲੌਤੇ ਵੋਟਰ ਤੱਕ ਮੁਸ਼ਕਲ ਰਸਤਿਆਂ ਤੋਂ ਚੋਣ ਵਾਲੇ ਦਿਨ ਪਹੁੰਚਣਗੇ, ਤਾਂ ਕਿ ਉਹ ਆਪਣੇ ਵੋਟ ਅਧਿਕਾਰ ਦੀ ਵਰਤੋਂ ਕਰ ਸਕੇ।
ਸੋਕੇਲਾ ਤਿਆਂਗ ਨਾਂਅ ਦੀ ਇੱਕ ਔਰਤ ਆਪਣੇ ਬੱਚਿਆਂ ਨਾਲ ਮਾਲੋਗਾਮ ਵਿੱਚ ਰਹਿੰਦੀ ਹੈ, ਜੋ ਅੰਜਾਵ ਜ਼ਿਲ੍ਹਾ ਹੈੱਡਕੁਆਰਟਰ ਹਾਊਲਿਆਂਗ ਤੋਂ 39 ਕਿਲੋਮੀਟਰ ਦੂਰ ਹੈ। ਇਹ ਪਿੰਡ ਹਾਊਲਿਆਂਗ ਵਿਧਾਨ ਸਭਾ ਹਲਕੇ ਵਿੱਚ ਪੈਂਦਾ ਹੈ। ਜਾਣਕਾਰ ਸੂਤਰਾਂ ਅਨੁਸਾਰ ਮਾਲੋਗਾਮ ਵਿੱਚ ਕਾਫੀ ਘੱਟ ਪਰਵਾਰ ਰਹਿੰਦੇ ਹਨ ਅਤੇ ਸੋਕੇਲਾ ਨੂੰ ਛੱਡ ਕੇ ਇਥੋਂ ਦੇ ਬਾਕੀ ਵੋਟਰਾਂ ਦੇ ਨਾਂਅ ਦੂਸਰੇ ਵੋਟ ਕੇਂਦਰਾਂ 'ਤੇ ਦਰਜ ਹਨ। ਰਾਜ ਮੁੱਖ ਚੋਣ ਅਧਿਕਾਰੀ ਦਫਤਰ ਦੇ ਸੂਤਰਾਂ ਨੇ ਕਿਹਾ, 2015 ਦੀਆਂ ਚੋਣਾਂ ਦੌਰਾਨ ਇਸ ਵੋਟ ਕੇਂਦਰ ਉੱਤੇ ਦੋ ਵੋਟਰ ਸਨ, ਪਰ ਕੁਝ ਕਾਰਨਾਂ ਤੋਂ ਸੋਕੇਲਾ ਦੇ ਪਤੀ ਜਾਨੇਲਮ ਤਿਆਂਗ ਨੇ ਆਪਣਾ ਨਾਂਅ ਇਸੇ ਹਲਕੇ ਦੇ ਕਿਸੇ ਹੋਰ ਵੋਟ ਕੇਂਦਰ 'ਤੇ ਦਰਜ ਕਰਾ ਲਿਆ।
ਉਪ ਮੁੱਖ ਚੋਣ ਅਧਿਕਾਰੀ ਲਾਇਕੇਨ ਕੋਯੂ ਨੇ ਦੱਸਿਆ ਕਿ ਚੋਣ ਕਰਾਉਣ ਵਾਲੇ ਸਟਾਫ ਨੂੰ ਹਾਊਲਿਆਂਗ ਤੋਂ ਮਾਲੋਗਾਮ ਵੋਟ ਕੇਂਦਰ ਤੱਕ ਪੈਦਲ ਚੱਲ ਕੇ ਜਾਣਾ ਹੋਵੇਗਾ ਅਤੇ ਇਸ ਵਿੱਚ ਪੂਰਾ ਦਿਨ ਲੱਗੇਗਾ। ਕੋਯੂ ਨੇ ਕਿਹਾ, ਚੋਣ ਕਰਾਉਣ ਵਾਲੇ ਸਟਾਫ ਨੂੰ ਸਵੇਰੇ ਸੱਤ ਵਜੇ ਤੋਂ ਸ਼ਾਮ ਪੰਜ ਵਜੇ ਤੱਕ ਵੋਟ ਕੇਂਦਰ 'ਤੇ ਰਹਿਣਾ ਪੈ ਸਕਦਾ ਹੈ ਕਿਉਂਕਿ ਅਸੀਂ ਨਹੀਂ ਜਾਣਦੇ ਕਿ ਕਿ ਉਹ ਕਦੋਂ ਵੋਟ ਪਾਉਣ ਆਏਗੀ। ਅਸੀਂ ਕਿਸੇ 'ਤੇ ਜਲਦੀ ਵੋਟ ਪਾਉਣ ਦਾ ਦਬਾਅ ਨਹੀਂ ਪਾ ਸਕਦੇ। ਰਾਜ ਵਿੱਚ 11 ਵੋਟ ਕੇਂਦਰ ਵਿਸ਼ੇਸ਼ ਤੌਰ 'ਤੇ ਔਰਤਾਂ ਲਈ ਸਥਾਪਤ ਕੀਤੇ ਗਏ ਹਨ।