ਜਲੰਧਰ, 18 ਮਾਰਚ (ਪੋਸਟ ਬਿਊਰੋ)- ਥਾਣਾ ਨਵੀਂ ਬਾਰਾਂਦਰੀ ਪੁਲਸ ਨੇ ਜਾਅਲੀ ਖਸਰਾ ਨੰਬਰ ਬਣਵਾ ਕੇ ਸੱਤ ਮਰਲੇ ਦੇ ਮਕਾਨ ਨੂੰ ਸਾਢੇ ਪੰਜਾਹ ਲੱਖ ਰੁਪਏ ਵਿੱਚ ਵੇਚਣ ਦੇ ਦੋਸ਼ ਵਿੱਚ ਪਿੰਡ ਬੁੱਲੇਵਾਲ ਤੇ ਕੋਟ ਕਿਸ਼ਨ ਚੰਦ ਦੇ ਰਹਿਣ ਵਾਲੇ ਚਾਰ ਜਣਿਆਂ ਉੱਤੇ ਕੇਸ ਦਰਜ ਕੀਤਾ ਹੈ। ਕਰੀਬ ਤਿਨ ਸਾਲ ਪਹਿਲਾਂ ਹੋਏ ਇਸ ਸੌਦੇ ਬਾਰੇ ਪਹਿਲਾਂ ਥਾਣਾ ਭਾਰਗੋ ਕੈਂਪ ਵਿੱਚ ਅਪ੍ਰੈਲ 2017 ਵਿੱਚ ਬਣਿਆ ਕੇਸ ਹਾਲੇ ਕੋਰਟ ਦੇ ਵਿਚਾਰ ਅਧੀਨ ਹੈ। ਇਸ ਦੌਰਾਨ ਦੋਵਾਂ ਧਿਰਾਂ ਦਾ ਲਿਖਤੀ ਵਿੱਚ ਰਾਜ਼ੀਨਾਮਾ ਤੈਅ ਹੋਇਆ, ਜਿਸ ਦੀਆਂ ਸ਼ਰਤਾਂ ਨੂੰ ਦੋਸ਼ੀ ਧਿਰ ਨੇ ਪੂਰਾ ਨਹੀਂ ਸੀ ਕੀਤਾ।
ਸ਼ਨੀਵਾਰ ਰਾਤ ਦਰਜ ਹੋਏ ਨਵੇਂ ਕੇਸ ਮੁਤਾਬਕ ਮਾਸਟਰ ਤਾਰਾ ਸਿੰਘ ਨਗਰ ਦੇ ਰਾਜੀਵ ਬਾਂਸਲ ਨੇ 15 ਜਣਿਆਂ ਦੇ ਖਿਲਾਫ ਸ਼ਿਕਾਇਤ ਦਿੱਤੀ ਤੇ ਕਿਹਾ ਸੀ ਕਿ ਕਿੰਗਰਾ ਵਿੱਚ ਪੈਂਦੇ ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਐੱਸ ਏ ਐੱਸ) ਵਿਚਲੇ ਸੱਤ ਮਰਲੇ ਦੇ ਮਕਾਨ ਨੂੰ ਉਨ੍ਹਾਂ ਨੇ ਦੋਸ਼ੀਆਂ ਤੋਂ ਸਾਢੇ ਪੰਜਾਹ ਲੱਖ ਰੁਪਏ ਦਾ ਖਰੀਦਿਆ ਸੀ। ਇਸ ਸੰਬੰਧ ਵਿੱਚ ਤਿੰਨ ਸਾਲ ਪਹਿਲਾਂ ਜਦ ਅਸਲੀਅਤ ਖੁੱਲ੍ਹੀ ਤਾਂ ਮੁੱਖ ਦੋਸ਼ੀ ਨੇ ਖੁਦ ਨੂੰ ਇਸ ਕੇਸ ਵਿੱਚ ਫਸਣ ਤੋਂ ਬਚਾਉਣ ਲਈ ਆਪਣੀ ਧਿਰ ਦੇ ਤਿੰਨ ਜਣਿਆਂ ਉੱਤੇ ਕੇਸ ਦਰਜ ਕਰਵਾ ਦਿੱਤਾ ਸੀ। ਏ ਡੀ ਸੀ ਪੀ ਇਨਵੈਸਟੀਗੇਸ਼ਨ ਵੱਲੋਂ ਜਾਂਚ ਰਿਪੋਰਟ ਪੇਸ਼ ਕਰਨ 'ਤੇ ਪੁਲਸ ਨੇ ਇਸ ਕੇਸ ਵਿੱਚ ਚਾਰ ਜਣਿਆਂ ਨੂੰ ਦੋਸ਼ੀ ਬਣਾਇਆ ਹੈ।