ਅੰਮ੍ਰਿਤਸਰ, 18 ਮਾਰਚ (ਪੋਸਟ ਬਿਊਰੋ)- ਅਜਨਾਲਾ ਸੈਕਟਰ ਵਿੱਚਲੀ ਬਾਰਡਰ ਆਬਜ਼ਰਵਿੰਗ ਪੋਸਟ (ਬੀ ਓ ਪੀ) ਧਰਮਕੋਟ ਨੇੜੇ ਬੀ ਐੱਸ ਐੱਫ ਦੇ ਜਵਾਨਾਂ ਨੇ ਕੱਲ੍ਹ ਦੁਪਹਿਰ ਪਾਕਿਸਤਾਨ ਵੱਲੋਂ ਆਏ ਡਰੋਨਨੁਮਾ ਵਸਤੂ ਨੂੰ ਗੋਲੀ ਮਾਰ ਕੇ ਜ਼ਮੀਨ 'ਤੇ ਡੇਗ ਦਿੱਤਾ। ਜਦ ਜਾਂਚ ਕੀਤੀ ਤਾਂ ਪਤਾ ਲੱਗਾ ਕਿ ਕਾਰਟੂਨ ਵਾਲਾ ਗੁਬਾਰਾ ਛੱਡਿਆ ਗਿਆ ਸੀ। ਇਸ ਤੋਂ ਕਿਸੇ ਤਰ੍ਹਾਂ ਦੀ ਇਤਰਾਜ਼ ਯੋਗ ਵਸਤੂ ਬਰਾਮਦ ਨਹੀਂ ਹੋਈ।
ਮਿਲੀ ਜਾਣਕਾਰੀ ਅਨੁਸਾਰ ਧਰਮਕੋਟ ਬੀ ਓ ਪੀ ਉੱਤੇ ਬੀ ਐੱਸ ਐੱਫ ਦੀ 73 ਬਟਾਲੀਅਨ ਦੇ ਜਵਾਨ ਗਸ਼ਤ ਕਰ ਰਹੇ ਸਨ ਤਾਂ ਪਾਕਿਸਤਾਨ ਵੱਲੋਂ ਕੋਈ ਵਸਤੂ ਹਵਾ ਵਿੱਚ ਉਡਦੀ ਭਾਰਤੀ ਸਰਹੱਦ ਵਿੱਚ ਆਈ। ਬੀ ਐੱਸ ਐੱਫ ਨੇ ਸਮਝਿਆ ਕਿ ਪਾਕਿਸਤਾਨ ਵੱਲੋਂ ਕਿਸੇ ਨੇ ਭਾਰਤੀ ਖੇਤਰ ਵਿੱਚ ਵੜ ਕੇ ਜਾਸੂਸੀ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। ਜਿਵੇਂ ਉਹ ਭਾਰਤੀ ਖੇਤਰ ਵਿੱਚ ਦਾਖਲ ਹੋਇਆ ਤਾਂ ਜਵਾਨਾਂ ਨੇ ਗੋਲੀ ਮਾਰ ਕੇ ਜ਼ਮੀਨ 'ਤੇ ਡੇਗ ਦਿੱਤਾ, ਪਰ ਜਾਂਚ ਕੀਤੀ ਤਾਂ ਉਹ ਬੱਚਿਆਂ ਦੇ ਖੇਡਣ ਵਾਲਾ ਗੁਬਾਰਾ ਸੀ, ਜਿਸ ਵਿੱਚ ਹਵਾ ਭਰੀ ਹੋਣ ਕਾਰਨ ਉਹ ਭਾਰਤੀ ਖੇਤਰ ਵਿੱਚ ਦਾਖਲ ਹੋ ਗਿਆ। ਕਮਾਂਡੈਂਟ ਰਾਣਾ ਬ੍ਰਿਜੇਸ਼ ਨੇ ਦੱਸਿਆ ਕਿ ਏਦਾਂ ਦੀ ਘਟਨਾ ਇਸ ਸਾਲ 11 ਫਰਵਰੀ ਨੂੰ ਵੀ ਹੋਈ ਸੀ।