ਮੋਗਾ, 18 ਮਾਰਚ (ਪੋਸਟ ਬਿਊਰੋ)- ਫਰੀਦਕੋਟ ਲੋਕ ਸਭਾ ਹਲਕੇ ਦੇ ਚੋਣ ਨਕਸ਼ੇ ਵਿੱਚ ਜਿਥੇ ਸਾਲ 2014 ਵਿੱਚ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਸਾਧੂ ਸਿੰਘ ਤੋਂ ਹਾਰੀ ਹੋਈ ਉਮੀਦਵਾਰ ਪਰਮਜੀਤ ਕੌਰ ਗੁਲਸ਼ਨ ਨੇ ਫਿਰ ਇਸ ਸੀਟ ਤੋਂ ਦਾਅਵਾ ਕਰ ਦਿੱਤਾ ਹੈ, ਉਥੇ ਕਾਂਗਰਸ ਛੱਡ ਕੇ ਅਕਾਲੀ ਦਲ ਵਿੱਚ ਆਏ ਜੋਗਿੰਦਰ ਸਿੰਘ ਪੰਜਗਰਾਈਂ ਤੇ ਹੋਰਨਾਂ ਦੀ ਦਾਅਵੇਦਾਰੀ ਨਾਲ ਇਹ ਅਟਕਲਾਂ ਚੱਲ ਪਈਆਂ ਹਨ ਕਿ ਅਕਾਲੀ ਦਲ ਇਸ ਵਾਰ ਇਥੋਂ ਪੈਰਾਸ਼ੂਟ ਉਮੀਦਵਾਰ ਨੂੰ ਸੁੱਟ ਸਕਦਾ ਹੈ। ਇਸ ਬਾਰੇ ਸਾਬਕਾ ਆਈ ਏ ਐਸ ਅਫਸਰ ਦਰਬਾਰਾ ਸਿੰਘ ਦਾ ਨਾਂ ਵੀ ਚੱਲ ਰਿਹਾ ਹੈ। ਕਾਂਗਰਸ ਪਾਰਟੀ ਵੀ ਮੋਗਾ ਦੇ ਡਿਪਟੀ ਕਮਿਸ਼ਨਰ ਰਹਿ ਚੁੱਕੇ ਸਾਬਕਾ ਆਈ ਏ ਐਸ ਤੇ ਇਸ ਸਮੇਂ ਵਿੱਚ ਲੁਧਿਆਣਾ ਦੀ ਗਿੱਲ ਵਿਧਾਨ ਸਭਾ ਸੀਟ ਤੋਂ ਵਿਧਾਇਕ ਕੁਲਦੀਪ ਸਿੰਘ ਵੈਦ ਉੱਤੇ ਵੀ ਦਾਅ ਖੇਡ ਸਕਦੀ ਹੈ।
ਵਰਨਣ ਯੋਗ ਹੈ ਕਿ ਫਰੀਦਕੋਟ ਲੋਕ ਸਭਾ ਹਲਕੇ ਤੋਂ ਅਕਾਲੀ ਉਮੀਦਵਾਰ ਵਜੋਂ ਪਰਮਜੀਤ ਕੌਰ ਗੁਲਸ਼ਨ ਸਾਲ 2009 ਵਿੱਚ ਜਿੱਤ ਚੁੱਕੇ ਹਨ। ਪਾਰਲੀਮੈਂਟ ਮੈਂਬਰ ਵਜੋਂ ਗੁਲਸ਼ਨ ਨੇ ਫਰੀਦਕੋਟ ਦੀ ਜਨਤਾ ਨਾਲ ਹੀ ਨਹੀਂ, ਵਰਕਰਾਂ ਨਾਲ ਵੀ ਸਬੰਧ ਤੋੜ ਲਿਆ ਸੀ। ਪਾਰਲੀਮੈਂਟ ਮੈਂਬਰ ਹਲਕਾ ਵਿਕਾਸ ਫੰਡ ਵੀ ਦੇਣ ਲਈ ਉਹ ਸ਼ਾਇਦ ਹੀ ਕਿਸੇ ਖੇਤਰ ਵਿੱਚ ਗਏ ਹੋਣ। ਇਹ ਗਰਾਂਟ ਵੀ ਬਾਦਲ ਸਰਕਾਰ ਦੇ ਮੰਤਰੀ ਰਹੇ ਜਥੇਦਾਰ ਤੋਤਾ ਸਿੰਘ ਰਾਹੀਂ ਪਹੁੰਚੀ ਸੀ। ਏਸੇ ਲਈ ਬੀਬੀ ਗੁਲਸ਼ਨ ਖੁਦ ਵੋਟਰਾਂ ਨਾਲ ਸਬੰਧ ਨਹੀਂ ਰੱਖ ਸਕੀ ਅਤੇ ਇਸ ਵਾਰ ਅਕਾਲੀ ਦਲ ਪਾਰਟੀ ਇਸ ਸੀਟ 'ਤੇ ਕੋਈ ਖਤਰਾ ਮੁੱਲ ਨਹੀਂ ਲੈਣਾ ਚਾਹੁੰਦੀ। ਲੋੜ ਪੈਣ ਉਤੇ ਇਥੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਓ ਐਸ ਡੀ ਰਹਿ ਚੁੱਕੇ ਦਰਬਾਰਾ ਸਿੰਘ ਦੇ ਨਾਂ 'ਤੇ ਅਟਕਲਾਂ ਲਾਈਆਂ ਜਾ ਰਹੀਆਂ ਹਨ। ਕਾਂਗਰਸ ਪਾਰਟੀ ਵਿੱਚ ਮੁਹੰਮਦ ਸਿੱਦੀਕ ਅਤੇ ਅਜੀਤ ਸਿੰਘ ਸ਼ਾਂਤ ਦੀ ਦਾਅਵੇਦਾਰੀ ਵਿਚਾਲੇ ਆਈ ਏ ਐਸ ਕੁਲਦੀਪ ਵੈਦ ਹਨ। ਕਾਂਗਰਸ ਸੂਤਰਾਂ ਮੁਤਾਬਕ ਵਿਧਾਇਕ ਕੁਲਦੀਪ ਵੈਦ ਚਾਹੁੰਦੇ ਹਨ ਕਿ ਜੇ ਕਾਂਗਰਸ ਉਨ੍ਹਾਂ ਨੂੰ ਫਰੀਦਕੋਟ ਲੋਕ ਸਭਾ ਖੇਤਰ ਤੋਂ ਪਾਰਟੀ ਉਮੀਦਵਾਰ ਬਣਾਵੇ ਤਾਂ ਲੁਧਿਆਣਾ ਦੀ ਗਿੱਲ ਵਿਧਾਨ ਸਭਾ ਸੀਟ ਛੱਡਣ ਉੱਤੇ ਓਥੋਂ ਉਨ੍ਹਾਂ ਦੇ ਲੜਕੇ ਨੂੰ ਟਿਕਟ ਦਿੱਤੀ ਜਾਵੇ। ਸੂਤਰਾਂ ਮੁਤਾਬਕ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਕੁਲਦੀਪ ਵੈਦ ਦੀ ਇਸ ਮੰਗ ਨੂੰ ਪੂਰਾ ਕਰਨ ਲਈ ਰਾਜ਼ੀ, ਉਹ ਫਰੀਦਕੋਟ ਤੋਂ ਉਨ੍ਹਾਂ ਨੂੰ ਟਿਕਟ ਦੇਣ ਲਈ ਤਿਆਰ ਹਨ ਪਰ ਗਿੱਲ ਹਲਕੇ ਤੋਂ ਉਨ੍ਹਾਂ ਦੇ ਲੜਕੇ ਨੂੰ ਸੀਟ ਦੇਣ ਲਈ ਤਿਆਰ ਨਹੀਂ ਹਨ।