ਇਸਲਾਮਾਬਾਦ, 18 ਮਾਰਚ (ਪੋਸਟ ਬਿਊਰੋ)- ਪਾਕਿਸਤਾਨ ਵਿੱਚ ਹਰੀਆਂ ਮਿਰਚਾਂ ਅਤੇ ਟਮਾਟਰਾਂ ਤੋਂ ਬਾਅਦ ਦਾਲਾਂ ਤੇ ਹੋਰ ਸਬਜ਼ੀਆਂ ਤੇ ਖੰਡ ਦੀਆਂ ਕੀਮਤਾਂ ਨੇ ਲੋਕਾਂ ਦਾ ਸਾਹ ਔਖਾ ਕਰ ਦਿੱਤਾ ਹੈ। ਲੋਕਾਂ ਨੂੰ ਇਕ ਕਿਲੋ ਦਾਲ ਖਰੀਦਣ ਲਈ 160 ਰੁਪਏ ਤੱਕ ਖਰਚ ਕਰਨੇ ਪੈ ਰਹੇ ਹਨ ਅਤੇ ਖੰਡ ਫਿੱਕੀ ਪੈਂਦੀ ਜਾ ਰਹੀ ਹੈ।
ਡਾਨ ਅਖਬਾਰ ਦੀ ਖਬਰ ਮੁਤਾਬਕ ਰਿਟੇਲ ਬਾਜ਼ਾਰ ਵਿੱਚ ਸਭ ਤੋਂ ਮਹਿੰਗੀ ਦਾਲ ਮੂੰਗੀ ਹੈ ਅਤੇ ਇਹ ਲੋਕਾਂ ਨੂੰ 160 ਰੁਪਏ ਪ੍ਰਤੀ ਕਿਲੋ ਪੈ ਰਹੀ ਹੈ। ਧੋਤੇ ਮਾਂਹ ਦੀ ਦਾਲ ਦੀ ਕੀਮਤ 140 ਰੁਪਏ ਪ੍ਰਤੀ ਕਿਲੋ ਹੋ ਗਈ ਹੈ। ਚਣਾ ਦਾਲ ਦਾ ਰੇਟ ਵੀ ਇਹੋ ਹੈ। ਖੰਡ ਦਾ ਰੇਟ 65 ਰੁਪਏ ਪ੍ਰਤੀ ਕਿਲੋ ਹੋ ਗਿਆ ਹੈ। ਹਰੀ ਮਿਰਚ ਸਬਜ਼ੀ ਵਾਲੇ ਮੁਫਤ ਨਹੀਂ ਦੇ ਰਹੇ। ਹੋਰ ਸਬਜ਼ੀਆਂ ਵਿੱਚ ਸਿਰਫ ਆਲੂ-ਪਿਆਜ਼ ਸਸਤੇ ਹਨ ਅਤੇ ਤੋਰੀ 120 ਰੁਪਏ ਪ੍ਰਤੀ ਕਿਲੋ, ਟੀਂਡਾ 60 ਰੁਪਏ ਪ੍ਰਤੀ ਕਿਲੋ, ਫੁੱਲ ਗੋਭੀ, ਮਟਰ ਤੇ ਕੱਦੂ 80 ਰੁਪਏ ਕਿਲੋ ਵਿਕਦਾ ਹੈ। ਪਿਆਜ਼ ਤੇ ਗਾਜਰ 40 ਰੁਪਏ ਤੇ ਬੈਂਗਨ 60 ਰੁਪਏ ਪ੍ਰਤੀ ਕਿਲੋ ਹੈ। ਪੁਲਵਾਮਾ ਹਮਲੇ ਕਾਰਨ ਭਾਰਤ ਵਲੋਂ ਪਾਕਿਸਤਾਨ ਉੱਤੇ 200 ਫੀਸਦੀ ਡਿਊਟੀ ਲਾਉਣ ਦੇ ਨਾਲ ਰੁਜ਼ਾਨਾ ਦੀਆਂ ਚੀਜ਼ਾਂ ਖਰੀਦਣਾ ਲੋਕਾਂ ਦਾ ਲੱਕ ਤੋੜ ਰਿਹਾ ਹੈ। ਸਬਜ਼ੀਆਂ ਤੋਂ ਇਲਾਵਾ ਰੁਜ਼ਾਨਾ ਦੀ ਵਰਤੋਂ ਦੀਆਂ ਚੀਜ਼ਾਂ ਮਹਿੰਗੀਆਂ ਹੋ ਗਈਆਂ ਹਨ ਅਤੇ ਲੋਕਾਂ ਦੇ ਘਰ ਦਾ ਬਜਟ ਵਿਗੜ ਗਿਆ ਹੈ।