ਨਵੀਂ ਦਿੱਲੀ, 17 ਮਾਰਚ (ਪੋਸਟ ਬਿਊਰੋ)- ਦਿੱਲੀ ਪੁਲਸ ਦੀ ਕਰਾਈਮ ਬ੍ਰਾਂਚ ਨੇ ਨਾਜਾਇਜ਼ 2000 ਕਾਰਤੂਸਾਂ ਦੇ ਨਾਲ ਇੱਕ ਹਥਿਆਰ ਸਮੱਗਲਰ ਨੂੰ ਫੜਿਆ ਹੈ। ਉਸ ਦੀ ਪਛਾਣ ਪੰਜਾਬ ਦੇ ਅਬੋਹਰ ਦੇ ਵਾਸੀ ਅਮਰ ਲਾਲ (62) ਵਜੋਂ ਹੋਈ ਹੈ। ਉਹ ਦਿੱਲੀ ਰਾਸ਼ਟਰੀ ਰਾਜਧਾਨੀ ਖੇਤਰ (ਐੱਨ ਸੀ ਆਰ) ਅਤੇ ਪੰਜਾਬ ਦੇ ਬਦਮਾਸ਼ਾਂ ਨੂੰ ਕਾਰਤੂਸ ਤੇ ਹਥਿਆਰਾਂ ਦੀ ਸਪਲਾਈ ਕਰਦਾ ਸੀ। ਅਮਰ ਲਾਲ ਤਸਕਰੀ ਵਿੱਚ ਪਿਛਲੇ 17 ਸਾਲਾਂ ਤੋਂ ਕਈ ਲੋਕਾਂ ਦੇ ਝੂਠੇ ਹਥਿਆਰ ਲਾਇਸੈਂਸ ਵੀ ਬਣਵਾ ਚੁੱਕਾ ਸੀ। ਪੁਲਸ ਨੇ ਇਸ ਘਟਨਾ ਵਿੱਚ ਵਰਤੀ ਕਾਰ ਅਤੇ 25 ਹਜ਼ਾਰ ਰੁਪਏ ਵੀ ਫੜੇ ਹਨ। ਤਲਾਸ਼ੀ ਦੌਰਾਨ ਦੋਸ਼ੀ ਤੋਂ 0.32 ਬੋਰ ਦੇ ਇੱਕ ਹਜ਼ਾਰ ਹੋਰ 0.315 ਬੋਰ ਦੇ ਇੱਕ ਹਜ਼ਾਰ ਕਾਰਤੂਸ ਬਰਾਮਦ ਹੋਏ ਹਨ।
ਪਤਾ ਲੱਗਾ ਹੈ ਕਿ ਅਮਰ ਲਾਲ ਪਹਿਲਾਂ ਅਬੋਹਰ ਵਿੱਚ ਗੰਨ ਹਾਊਸ ਦਾ ਸੇਲਜ਼ਮੈਨ ਹੁੰਦਾ ਸੀ। ਬਾਅਦ ਵਿੱਚ ਉਸ ਨੇ ਆਪਣਾ ਗੰਨ ਹਾਊਸ ਖੋਲ੍ਹ ਲਿਆ, ਪ੍ਰੰਤੂ ਘਾਟੇ ਦੇ ਬਾਅਦ ਕਾਰੋਬਾਰ ਬੰਦ ਹੋਣ 'ਤੇ ਉਸ ਨੇ ਹਥਿਆਰ ਤਸਕਰੀ ਸ਼ੁਰੂ ਕਰ ਦਿੱਤੀ ਸੀ। ਉਹ ਹਥਿਆਰਾਂ ਦੇ ਫਰਜ਼ੀ ਲਾਇਸੈਂਸ ਵੀ ਬਣਵਾ ਦਿੰਦਾ ਸੀ। ਇਸ ਮਾਮਲੇ ਵਿੱਚ 2002 ਵਿੱਚ ਸੀ ਬੀ ਆਈ ਨੇ ਉਸ ਨੂੰ ਪਹਿਲੀ ਵਾਰ ਗ੍ਰਿਫਤਾਰ ਕੀਤਾ ਸੀ। ਪੁੱਛਗਿੱਛ ਵਿੱਚ ਉਸ ਨੇ ਦੱਸਿਆ ਕਿ ਉਹ 125 ਤੋਂ 150 ਰੁਪਏ ਵਿੱਚ ਕਾਰਤੂਸ ਗੰਨ ਹਾਊਸ ਤੋਂ ਲੈਂਦਾ ਅਤੇ ਦੁੱਗਣੀ ਕੀਮਤ 'ਤੇ ਬਦਮਾਸ਼ਾਂ ਨੂੰ ਵੇਚਦਾ ਸੀ। ਉਸ ਦੇ ਖਿਲਾਫ ਪੰਜਾਬ ਪੁਲਸ ਅਤੇ ਸੀ ਬੀ ਆਈ ਵਿੱਚ ਦੋ-ਦੋ ਮੁਕੱਦਮੇ ਦਰਜ ਹਨ।