ਜੈਪੁਰ, 15 ਮਾਰਚ (ਪੋਸਟ ਬਿਊਰੋ)- ਭਾਜਪਾ ਐਮ ਪੀ ਕਿਰੋੜੀ ਲਾਲ ਮੀਣਾ ਨੂੰ ਰਾਜਸਥਾਨ ਦੀ ਇਕ ਅਦਾਲਤ ਨੇ ਦੋ ਵੱਖ-ਵੱਖ ਕੇਸਾਂ ਵਿੱਚ ਛੇ ਮਹੀਨੇ ਕੈਦ ਦੀ ਸਜ਼ਾ ਸੁਣਾਈ ਤੇ ਨਾਲ ਕਿਹਾ ਕਿ ਉਹ ਰੇਲਵੇ ਨੂੰ ਇਕ ਲੱਖ ਰੁਪਏ ਮੁਆਵਜ਼ਾ ਵੀ ਦੇਣ। ਇਸ ਦੇ ਇਲਾਵਾ ਉਨ੍ਹਾਂ 'ਤੇ 10 ਹਜ਼ਾਰ ਰੁਪਏ ਜੁਰਮਾਨਾ ਵੀ ਲਾਇਆ ਗਿਆ ਹੈ।
ਗੰਗਾਪੁਰ ਸ਼ਹਿਰ ਦੀ ਮੈਜਿਸਟਰੇਟ ਜਯਾ ਅਗਰਵਾਲ ਨੇ ਭਾਜਪਾ ਐਮ ਪੀ ਨੂੰ ਦੋ ਵੱਖ-ਵੱਖ ਕੇਸਾਂ ਵਿੱਚ ਨਿਯਮਾਂ (ਧਾਰਾ-144) ਦੇ ਉਲੰਘਣ ਦਾ ਦੋਸ਼ੀ ਕਰਾਰ ਦਿੱਤਾ। ਉਨ੍ਹਾਂ ਖਿਲਾਫ ਆਈ ਪੀ ਸੀ ਦੀ ਧਾਰਾ-188 (ਸਰਕਾਰੀ ਅਫਸਰ ਦੇ ਕੰਮ ਵਿੱਚ ਰੁਕਾਵਟ) ਦੇ ਤਹਿਤ ਵੀ ਕੇਸ ਦਰਜ ਕੀਤਾ ਗਿਆ ਸੀ। ਸਹਾਇਕ ਸਰਕਾਰੀ ਵਕੀਲ ਕੁਲਦੀਪ ਸਿੰਘ ਬੜੋਲੀਆ ਨੇ ਦੱਸਿਆ ਕਿ ਕੋਰਟ ਨੇ ਦੋਵਾਂ ਕੇਸਾਂ ਵਿੱਚ ਛੇ-ਛੇ ਮਹੀਨੇ ਦੀ ਸਜ਼ਾ ਦੇ ਨਾਲ ਹੀ ਜੁਰਮਾਨਾ ਵੀ ਲਾਇਆ। ਦੋਵੇਂ ਸਜ਼ਾ ਨਾਲੋ-ਨਾਲ ਚੱਲਣਗੀਆਂ। ਮੀਣਾ ਨੇ ਦਸੰਬਰ 2009 ਅਤੇ ਫਰਵਰੀ 2010 ਵਿੱਚ ਸਵਾਈ ਮਾਧੋਪੁਰ ਦੇ ਜ਼ਿਲਾ ਅਧਿਕਾਰੀ ਵੱਲੋਂ ਲਾਗੂ ਨਿਯਮਾਂ ਦਾ ਉਲੰਘਣ ਕਰਕੇ ਜਨਸਭਾ ਕੀਤੀ।