ਕੋਲੰਬੋ, 26 ਸਤੰਬਰ (ਪੋਸਟ ਬਿਊਰੋ)- ਮਾਲਦੀਵ 'ਚ ਬ੍ਰਿਟੇਨ ਦੇ ਮਸ਼ਹੂਰ ਮੂਰਤੀਕਾਰ ਜੇਸਨ ਡੇਕਾਇਰਸ ਟੇਲਰ ਵੱਲੋਂ ਬਣਾਈਆਂ ਕਲਾਕ੍ਰਿਤਾਂ ਤੋੜੀਆਂ ਗਈਆਂ ਹਨ। ਇਸ ਹਫਤੇ ਅਹੁਦੇ ਤੋਂ ਹਟਾਏ ਗਏ ਰਾਸ਼ਟਰਪਤੀ ਅਬਦੁੱਲਾ ਯਾਮੀਨ ਨੇ ਇਹ ਕਲਾਕ੍ਰਿਤੀਆਂ ਤੋੜਨ ਦਾ ਹੁਕਮ ਦਿੱਤਾ ਸੀ, ਪਰ ਬੀਤੇ ਐਤਵਾਰ ਹੋਈ ਰਾਸ਼ਟਰਪਤੀ ਚੋਣ ਤੋਂ ਪਹਿਲਾਂ ਤੱਕ ਇਸ 'ਤੇ ਅਮਲ ਨਹੀਂ ਹੋਇਆ ਸੀ। ਚੋਣਾਂ 'ਚ ਵਿਰੋਧੀਆਂ ਦੇ ਸਾਂਝੇ ਉਮੀਦਵਾਰ ਇਬਰਾਹੀਮ ਮੁਹੰਮਦ ਸਾਲੇਹ ਦੇ ਹੱਥੋਂ ਯਾਮੀਨ ਦੀ ਹਾਰ ਤੋਂ ਬਾਅਦ ਇਹ ਕਲਾਕ੍ਰਿਤਾਂ ਨਸ਼ਟ ਕਰ ਦਿੱਤੀਆਂ ਗਈਆਂ।
ਹਿੰਦ ਮਹਾਸਾਗਰ ਦੇ ਸੁੰਨੀ ਮੁਸਲਿਮ ਬਹੁ ਗਿਣਤੀ ਵਾਲੇ ਇਸ ਟਾਪੂ ਗਰੁੱਪ ਦੇ ਇਕ ਰਿਜ਼ਾਰਟ ਇਲਾਕੇ 'ਚ ਜੇਸਨ ਡੇਕਾਇਰਸ ਟੇਲਰ ਨੇ ਬੀਤੀ ਜੁਲਾਈ ਵਿੱਚ ਇਹ ਕਲਾਕ੍ਰਿਤਾਂ ਬਣਾਈਆਂ ਸਨ। ਧਾਤੂ ਤੋਂ ਬਣੇ ਵੱਡੇ ਕਿਊਬ ਵਿੱਚ ਕਈ ਮੂਰਤੀਆਂ ਰੱਖੀਆਂ ਗਈਆਂ ਸਨ। ਇਸ ਦਾ ਕੁਝ ਹਿੱਸਾ ਸਮੁੰਦਰ 'ਚ ਡੁੱਬਿਆ ਸੀ। ਮਾਲਦੀਵ ਦਾ ਰਾਜ ਧਰਮ ਇਸਲਾਮ ਹੈ ਅਤੇ ਇਸਲਾਮ 'ਚ ਮੂਰਤੀਆਂ ਬਣਾਉਣ 'ਤੇ ਰੋਕ ਹੈ। ਇਨ੍ਹਾਂ ਕਲਾਕ੍ਰਿਤਾਂ 'ਚ ਕਿਸੇ ਧਾਰਮਿਕ ਪ੍ਰਤੀਕ ਨੂੰ ਦਰਸਾਇਆ ਨਹੀਂ ਗਿਆ ਸੀ। ਇਸ ਦੇ ਬਾਵਜੂਦ ਕਈ ਮੌਲਵੀਆਂ ਨੇ ਇਸ 'ਤੇ ਇਤਰਾਜ਼ ਕੀਤਾ ਸੀ। ਯਾਮੀਨ ਨੇ ਜੁਲਾਈ ਵਿੱਚ ਕਿਹਾ ਸੀ ਕਿ ਲੋਕਾਂ ਦੀਆਂ ਭਾਵਨਾਵਾਂ ਦੇ ਖਿਲਾਫ ਹੋਣ ਕਾਰਨ ਉਨ੍ਹਾਂ ਨੇ ‘ਕੋਰਾਲੇਰੀਅਣ' ਕਲਾਕ੍ਰਿਤੀਆਂ ਨਸ਼ਟ ਕਰਨ ਦਾ ਫੈਸਲਾ ਲਿਆ। ਸੋਸ਼ਲ ਮੀਡੀਆ ਵਿੱਚ ਆਏ ਇਕ ਵੀਡੀਓ ਵਿੱਚ ਕੁਝ ਲੋਕ ਬੇਲਚੇ ਤੇ ਬਿਜਲੀ ਨਾਲ ਚੱਲਣ ਵਾਲੇ ਔਜਾਰਾਂ ਨਾਲ ਮੂਰਤੀਆਂ ਤੋੜਦੇ ਦਿਖਾਈ ਦੇ ਰਹੇ ਹਨ।