ਬਰਲਿਨ, 26 ਸਤੰਬਰ (ਪੋਸਟ ਬਿਊਰੋ)- ਜਰਮਨੀ ਦੀ ਕੈਥੋਲਿਕ ਚਰਚ ਨੇ ਸੈਕਸ ਸ਼ੋਸ਼ਣ ਦੇ ਹਜ਼ਾਰਾਂ ਪੀੜਤ ਲੋਕਾਂ ਤੋਂ ਮੁਆਫੀ ਮੰਗੀ ਅਤੇ ਇਸ ਦੇ ਨਾਲ ਹੀ ਇਸ ਸੰਸਥਾ ਦੇ ਸੀਨੀਅਰ ਕਾਰਡੀਨਲ ਨੇ ਅਪਰਾਧੀਆਂ ਨੂੰ ਇਨਸਾਫ ਦੇ ਕਟਘਰੇ ਵਿਚ ਖੜ੍ਹਾ ਕਰਨ ਦੀ ਗੱਲ ਵੀ ਕਹੀ ਹੈ।
ਕਾਰਡੀਨਲ ਰਾਈਨਹਾਰਡ ਮਾਰਕਸ ਨੇ ਕਿਹਾ ਕਿ ਉਹ ਭਰੋਸਾ ਤੋੜਨ ਵਾਲੇ ਦਹਾਕਿਆਂ ਦੇ ਸ਼ੋਸ਼ਣ ਤੇ ਇੰਨੇ ਲੋਕਾਂ ਵੱਲੇਂ ਅਜਿਹੇ ਦੋਸ਼ੀਆਂ ਨੂੰ ਨਜ਼ਰ ਅੰਦਾਜ਼ ਕੀਤੇ ਜਾਣ ਕਾਰਨ ਸ਼ਰਮਿੰਦਾ ਹਨ। ਜਰਮਨ ਬਿਸ਼ਪ ਕਾਨਫਰੰਸ ਦੇ ਮੁਖੀ ਨੇ ਇਹ ਸ਼ਰਮਿੰਦਗੀ ਉਦੋਂ ਜ਼ਾਹਰ ਕੀਤੀ, ਜਦੋਂ ਸੰਸਥਾ ਨੇ ਇਕ ਸੰਵੇਦਨਸ਼ੀਲ ਰਿਪੋਰਟ ਜਾਰੀ ਕੀਤੀ, ਜਿਸ ਵਿਚ ਦੱਸਿਆ ਗਿਆ ਹੈ ਕਿ ਜਰਮਨੀ ਵਿਚ ਸਾਲ 1946 ਅਤੇ ਸਾਲ 2014 ਵਿਚਕਾਰ ਕਰੀਬ 3,700 ਨਾਬਾਲਗਾਂ, ਜਿਨ੍ਹਾਂ ਵਿਚ ਬਹੁਤੇ ਲੜਕੇ ਸਨ, ਦਾ ਸੈਕਸ ਸ਼ੋਸ਼ਣ ਕੀਤਾ ਗਿਆ। ਰਿਪੋਰਟ ਲਿਖਣ ਵਾਲੇ ਸ਼ਖਸ਼ ਨੇ ਕਿਹਾ ਕਿ ਇਹ ਪੂਰੇ ਅੰਕੜਿਆਂ ਦਾ ਸਿਰਫ ਇਕ ਹਿੱਸਾ ਹੈ। ਮੈਨਹੈਮ ਮਨੋਵਿਗਿਆਨੀ ਸੰਸਥਾ ਦੇ ਪ੍ਰੋਫੈਸਰ ਹੇਰਾਲਡ ਡ੍ਰੈਸਿੰਗ ਨੇ ਕਿਹਾ ਕਿ ਕੈਥੋਲਿਕ ਚਰਚ ਵਿਚ ਏਦਾਂ ਦਾ ਸੈਕਸ ਸ਼ੋਸ਼ਣ ਇਕ ਲਗਾਤਾਰ ਚੱਲਦੀ ਸਮੱਸਿਆ ਹੈ। ਇਹ ਇਤਿਹਾਸਿਕ ਸਮੱਸਿਆ ਨਹੀਂ। ਉਸ ਨੇ ਬਿਸ਼ਪ ਕਾਨਫਰੰਸ ਵੱਲੋਂ ਕਰਵਾਈ ਗਈ ਖੋਜ ਵਿਚ ਤਾਲਮੇਲ ਲਈ ਕੰਮ ਕੀਤਾ ਸੀ।