ਓਟਵਾ, 13 ਮਾਰਚ (ਪੋਸਟ ਬਿਊਰੋ) : ਕੈਨੇਡਾ ਨੇ ਬੋਇੰਗ 737 ਮੈਕਸ 8 ਉੱਤੇ ਅਗਲੇ ਹੁਕਮਾਂ ਤੱਕ ਪਾਬੰਦੀ ਲਾ ਦਿੱਤੀ ਹੈ। ਇਥੋਪੀਅਨ ਏਅਰਲਾਈਨਜ਼ ਦਾ ਬੀਤੇ ਦਿਨੀਂ ਜਿਹੜਾ ਜਹਾਜ਼ ਹਾਦਸਾਗ੍ਰਸਤ ਹੋਇਆ ਸੀ ਉਹ ਇਸੇ ਮਾਡਲ ਦਾ ਸੀ। ਉਸ ਹਾਦਸੇ ਵਿੱਚ 157 ਲੋਕ ਮਾਰੇ ਗਏ ਸਨ ਜਿਨ੍ਹਾਂ ਵਿੱਚੋਂ 18 ਕੈਨੇਡੀਅਨਜ਼ ਸਨ।
ਇਸ ਮਾਡਲ ਦੇ ਜਹਾਜ਼ਾਂ ਲਈ ਬੁੱਧਵਾਰ ਨੂੰ ਸੇਫਟੀ ਨੋਟਿਸ ਕੱਢਿਆ ਗਿਆ। ਇਸ ਦੇ ਨਾਲ ਹੀ ਮੈਕਸ 9, ਜਿਸ ਦੀ ਭਾਵੇਂ ਬਹੁਤੀ ਵਰਤੋਂ ਵੀ ਨਹੀਂ ਕੀਤੀ ਜਾਂਦੀ, ਉੱਤੇ ਵੀ ਹਾਲ ਦੀ ਘੜੀ ਰੋਕ ਲਾ ਦਿੱਤੀ ਗਈ ਹੈ। ਕੈਨੇਡਾ ਵੱਲੋਂ ਇਹ ਐਲਾਨ ਕੀਤੇ ਜਾਣ ਤੋਂ ਕਈ ਘੰਟੇ ਬਾਅਦ ਅਮਰੀਕੀ ਅਧਿਕਾਰੀਆਂ ਨੇ ਵੀ ਇਸ ਜਹਾਜ਼ ਉੱਤੇ ਪਾਬੰਦੀ ਲਾ ਦਿੱਤੀ। ਕੰਪਨੀ ਵੱਲੋਂ ਆਪ ਹੀ ਅਹਿਤਿਆਤ ਵਰਤਦਿਆਂ ਹੋਇਆਂ 371 ਜਹਾਜ਼ਾਂ ਦੇ ਆਪਣੇ ਗਲੋਬਲ ਫਲੀਟ ਉੱਤੇ ਰੋਕ ਲਾਉਣ ਦਾ ਫੈਸਲਾ ਕੀਤਾ ਗਿਆ ਹੈ।
ਅਜਿਹਾ ਬਹੁਤ ਘੱਟ ਹੁੰਦਾ ਹੈ ਕਿ ਕੈਨੇਡੀਅਨ ਅਧਿਕਾਰੀ ਅਮਰੀਕਾ ਨਾਲੋਂ ਪਹਿਲਾਂ ਕੋਈ ਵੱਡਾ ਫੈਸਲਾ ਕਰਨ। ਦੋਵਾਂ ਮੁਲਕਾਂ ਵੱਲੋਂ ਏਅਰਲਾਈਨ ਨੂੰ ਇਹ ਹਦਾਇਤ ਕੀਤੀ ਗਈ ਹੈ ਕਿ ਉਹ ਆਪਣੇ ਬੋਇੰਗ ਮਾਡਲ ਦੇ ਜਹਾਜ਼ਾਂ ਨੂੰ ਉਨ੍ਹਾਂ ਦੇ ਆਕਾਸ਼ ਵਿੱਚ ਨਾ ਉਡਾਵੇ। ਟਰਾਂਸਪੋਰਟ ਮੰਤਰੀ ਮਾਰਕ ਗਾਰਨਿਊ ਨੇ ਬੁੱਧਵਾਰ ਸਵੇਰੇ ਓਟਵਾ ਵਿੱਚ ਕੈਨੇਡਾ ਵੱਲੋਂ ਲਾਈ ਗਈ ਇਸ ਪਾਬੰਦੀ ਦਾ ਐਲਾਨ ਕੀਤਾ। ਉਨ੍ਹਾਂ ਇਹ ਵੀ ਸਪਸ਼ਟ ਕੀਤਾ ਕਿ ਨਾ ਤਾਂ ਇਸ ਫੈਸਲੇ ਵਿੱਚ ਸਿਆਸਤ ਦੀ ਕੋਈ ਭੂਮਿਕਾ ਹੈ ਤੇ ਨਾ ਹੀ ਇਹ ਫੈਸਲਾ ਅਮਰੀਕਾ ਦੀ ਸੋਚ ਉੱਤੇ ਆਧਾਰਿਤ ਹੈ।