ਜਲੰਧਰ, 13 ਮਾਰਚ (ਪੋਸਟ ਬਿਊਰੋ)- ਥਾਣਾ ਲੋਹੀਆਂ ਖਾਸ ਦੀ ਪੁਲਸ ਨੇ ਅਜਿਹਾ ਦੋਸ਼ੀ ਗ੍ਰਿਫਤਾਰ ਕੀਤਾ ਹੈ ਜਿਸ ਨੇ 1-2 ਨਹੀਂ, 15 ਮੋਟਰ ਸਾਈਕਲ ਚੋਰੀ ਕੀਤੇ ਸਨ। ਪੁਲਸ ਨੇ 37 ਸਾਲ ਦੇ ਪਿੰਡ ਮੀਏਂਵਾਲ ਦੇ ਪਰਮਜੀਤ ਸਿੰਘ ਉਰਫ ਪੰਮਾ ਡਾਨ ਨੂੰ ਗ੍ਰਿਫਤਾਰ ਕਰ ਕੇ 14 ਮੋਟਰ ਸਾਈਕਲ ਬਰਾਮਦ ਕੀਤੇ ਹਨ। ਪੰਮਾ ਨੇ ਲੋਹੀਆਂ, ਸ਼ਾਹਕੋਟ, ਕਰਤਾਰਪੁਰ ਅਤੇ ਥਾਣਾ ਪੰਜ ਦੇ ਏਰੀਏ 'ਚੋਂ ਮੋਟਰ ਸਾਈਕਲ ਚੋਰੀ ਕੀਤੇ ਸਨ।
ਐੱਸ ਪੀ (ਡੀ) ਰਾਜਬੀਰ ਸਿੰਘ ਨੇ ਦੱਸਿਆ ਕਿ ਥਾਣਾ ਲੋਹੀਆਂ ਦੇ ਮੁਖੀ ਦਲਬੀਰ ਸਿੰਘ ਨੇ ਇਸ ਏਰੀਆ ਵਿੱਚ ਨਾਕਾਬੰਦੀ ਕਰ ਕੇ ਪੰਮਾ ਡਾਨ ਨੂੰ ਫੜਿਆ ਤਾਂ ਉਸ ਤੋਂ ਚੋਰੀ ਦੇ ਮੋਟਰ ਸਾਈਕਲ ਮਿਲੇ। ਦੋਸ਼ੀ ਦੀ ਨਿਸ਼ਾਨਦੇਹੀ 'ਤੇ 14 ਹੋਰ ਮੋਟਰ ਸਾਈਕਲ ਬਰਾਮਦ ਕੀਤੇ ਹਨ। ਇਸ ਤੋਂ ਪਹਿਲਾਂ ਦੋਸ਼ੀ ਦੇ ਖਿਲਾਫ 22 ਕੇਸ ਦਰਜ ਹਨ। ਇਨ੍ਹਾਂ ਵਿੱਚ ਇੱਕ ਮਾਮਲਾ ਤਸਕਰੀ ਦਾ ਵੀ ਹੈ। ਦੋਸ਼ੀ ਨੇ ਕਿਹਾ ਕਿ ਉਹ ਚੋਰੀ ਦੇ ਮੋਟਰ ਸਾਈਕਲ ਖੋਲ੍ਹ ਕੇ ਉਨ੍ਹਾਂ ਦੇ ਸਪੇਅਰ ਪਾਰਟਸ ਵੇਚ ਦਿੰਦਾ ਸੀ। ਉਹ ਜਦ 17 ਸਾਲ ਦਾ ਸੀ ਤਾਂ ਪਹਿਲਾ ਚੋਰੀ ਦਾ ਕੇਸ ਦਰਜ ਹੋਇਆ ਸੀ। ਉਹ ਪੰਜਵੀਂ ਪਾਸ ਹੈ। ਇੱਕ ਵਾਰ ਜੇਲ੍ਹ ਜਾਣ ਪਿੱਛੋਂ ਸੁਧਰਨ ਦੀ ਬਜਾਏ ਵੱਡਾ ਚੋਰ ਬਣ ਗਿਆ। ਉਸ ਨੇ ਕਿਹਾ ਕਿ ਉਸ ਕੋਲ ਇੱਕ ਮਾਸਟਰ ਕੀ ਹੈ, ਜਿਸ ਨਾਲ ਕਿਸੇ ਵੀ ਮੋਟਰ ਸਾਈਕਲ ਦਾ ਲਾਕ ਬੜੇ ਆਰਾਮ ਨਾਲ ਖੁੱਲ੍ਹ ਜਾਂਦਾ ਸੀ।