ਲੰਡਨ, 12 ਮਾਰਚ (ਪੋਸਟ ਬਿਊਰੋ) : ਬ੍ਰਿਟੇਨ ਦੀ ਪ੍ਰਧਾਨ ਮੰਤਰੀ ਥੈਰੇਸਾ ਮੇਅ ਨੂੰ ਉਸ ਸਮੇਂ ਜ਼ੋਰਦਾਰ ਝਟਕਾ ਲੱਗਿਆ ਜਦੋਂ ਬ੍ਰਿਟੇਨ ਦੀ ਪਾਰਲੀਆਮੈਂਟ ਨੇ ਬ੍ਰੈਗਜਿ਼ਟ ਡੀਲ ਨੂੰ ਸਿਰੇ ਤੋਂ ਰੱਦ ਕਰ ਦਿੱਤਾ। ਪਾਰਲੀਆਮੈਂਟ ਵੱਲੋਂ ਇਹ ਫੈਸਲਾ ਉਦੋਂ ਸੁਣਾਇਆ ਗਿਆ ਜਦੋਂ ਬ੍ਰਿਟੇਨ ਬਲਾਕ ਛੱਡਣ ਤੋਂ ਬੱਸ 17 ਦਿਨ ਦੂਰ ਸੀ।
ਨੀਤੀਘਾੜਿਆਂ ਵੱਲੋਂ ਇਸ ਡੀਲ ਦੇ ਵਿਰੋਧ ਵਿੱਚ 242 ਦੇ ਮੁਕਾਬਲੇ 391 ਵੋਟਾਂ ਪਾਈਆਂ ਗਈਆਂ। ਅਜਿਹਾ ਦੂਜੀ ਵਾਰੀ ਹੋਇਆ ਹੈ ਕਿ ਇਸ ਮੁੱਦੇ ਉੱਤੇ ਮੇਅ ਦਾ ਉਨ੍ਹਾਂ ਦੀ ਸੰਸਦ ਵੱਲੋਂ ਹੀ ਸਾਥ ਨਹੀਂ ਦਿੱਤਾ ਗਿਆ। ਇਸ ਤੋਂ ਪਹਿਲਾਂ ਜਨਵਰੀ ਵਿੱਚ ਪਾਰਲੀਆਮੈਂਟ ਨੇ ਇਸ ਸਮਝੌਤੇ ਨੂੰ ਨਕਾਰਿਆ ਸੀ।
ਹੁਣ ਨੀਤੀਘਾੜੇ ਇਸ ਬਾਰੇ ਵੋਟ ਕਰਨਗੇ ਕਿ ਉਨ੍ਹਾਂ ਨੂੰ 29 ਮਾਰਚ ਨੂੰ ਨਿਰਧਾਰਤ ਤਰੀਕ ਉੱਤੇ ਬਿਨਾਂ ਕਿਸੇ ਡੀਲ ਦੇ ਯੂਰਪੀਅਨ ਯੂਨੀਅਨ ਦਾ ਸਾਥ ਛੱਡਣਾ ਚਾਹੀਦਾ ਹੈ ਜਾਂ ਫਿਰ ਬਲਾਕ ਨੂੰ ਬ੍ਰਿਟੇਨ ਦੀ ਰਵਾਨਗੀ ਨੂੰ ਮੁਲਤਵੀ ਕਰ ਦੇਣਾ ਚਾਹੀਦਾ ਹੈ।