ਜਲੰਧਰ, 12 ਮਾਰਚ (ਪੋਸਟ ਬਿਊਰੋ)- ਵਾਰਡ ਨੰਬਰ 64 ਭਗਤ ਸਿੰਘ ਕਲੋਨੀ ਵਿੱਚ ਇਸ ਐਤਵਾਰ ਅਜੀਬ ਸਥਿਤੀ ਪੈਦਾ ਹੋ ਗਈ। ਦੁਪਹਿਰ ਤਿੰਨ ਵਜੇ ਤੱਕ ਵਿਧਾਇਕ ਬਾਵਾ ਹੈਨਰੀ ਦੇ ਨਾਂਅ ਦਾ ਨੀਂਹ ਪੱਥਰ ਤਿਆਰ ਕੀਤਾ ਗਿਆ ਸੀ, ਪਰ ਵਿਧਾਇਕ ਵੱਲੋਂ ਆ ਕੇ ਰਿਬਨ ਕੱਟਣ ਤੋਂ ਪਹਿਲਾਂ ਹੀ ਕੋਡ ਆਫ ਕੰਡਕਟ ਲਾਗੂ ਹੋ ਗਿਆ।
ਕੱਲ੍ਹ ਸਵੇਰੇ ਲੋਕਾਂ ਨੂੰ ਮਠਿਆਈ ਵੰਡੀ ਗਈ। ਦੁਪਹਿਰ ਨੂੰ ਬਾਵਾ ਨੇ ਲੋਕਾਂ ਦੀਆਂ ਦਿੱਕਤਾਂ ਸੁਣੀਆ ਅਤੇ ਨੀਂਹ ਪੱਥਰ ਨਾਲ ਸੰਬੰਧਤ ਨਾਲੇ ਦੀ ਦੀਵਾਰ ਬਣਾਉਣ ਦੇ ਪ੍ਰੋਜੈਕਟ ਦੇ ਬਾਰੇ ਦੱਸਿਆ। ਵਰ੍ਹਦੇ ਮੀਂਹ ਵਿੱਚ ਕਾਂਗਰਸੀ ਵਰਕਰਾਂ ਨਾਲ ਕੌਂਸਲਰ ਸੁਸ਼ੀਲ ਕਾਲੀਆ ਇਸ ਪੁਲੀ 'ਤੇ ਪਹੁੰਚੇ ਸਨ। ਸਵੇਰੇ 11 ਵਜੇ ਦੇ ਕਰੀਬ ਇਹ ਹਲਚਲ ਦੇਖ ਕੇ ਇਲਾਕੇ ਵਿੱਚ ਸੂਚਨਾ ਫੈਲੀ ਕਿ ਕੋਡ ਆਫ ਕੰਡਕਟ ਵਿੱਚ ਨੀਂਹ ਪੱਥਰ ਰੱਖਿਆ ਜਾ ਰਿਹਾ ਹੈ। ਦੁਪਹਿਰ 12.30 ਵਜੇ ਦੇ ਕਰੀਬ ਵਿਧਾਇਕ ਬਾਵਾ ਹੈਨਰੀ ਪਹੁੰਚੇ ਅਤੇ ਕਿਸੇ ਵੀ ਤਰ੍ਹਾਂ ਉਦਘਾਟਨ ਜਾਂ ਨੀਂਹ ਪੱਥਰ ਸਮਾਰੋਹ ਦਾ ਰਿਬਨ ਨਹੀਂ ਕੱਟਿਆ। ਨੀਂਹ ਪੱਥਰ ਤੋਂ ਕੁਝ ਕਦਮ ਦੂਰ ਕਲੋਨੀ ਦੇ ਲੋਕਾਂ ਨਾਲ ਰੂ-ਬ-ਰੂ ਹੋਏ। ਉਨ੍ਹਾਂ ਨੇ ਨਾਲੇ ਦੇ ਕਿਨਾਰੇ ਬਣਨ ਵਾਲੀ ਦੀਵਾਰ ਦੇ ਬਾਰੇ ਲੋਕਾਂ ਨੂੰ ਕਿਹਾ ਕਿ ਸੀਵਰੇਜ ਲਾਈਨ ਦਾ ਕੰਮ ਆਖਰੀ ਪੜਾਅ ਵਿੱਚ ਹੈ। ਕੌਂਸਲਰ ਕਾਲੀਆ ਨੇ ਕਿਹਾ ਕਿ ਕਿਸੇ ਵੀ ਤਰ੍ਹਾਂ ਉਲੰਘਣਾ ਨਹੀਂ ਕੀਤੀ ਗਈ। ਨੀਂਹ ਪੱਥਰ 10 ਮਾਰਚ ਨੂੰ ਲਾਇਆ ਸੀ। ਵਿਧਾਇਕ ਤਾਂ ਜਾਇਜ਼ਾ ਲੈ ਰਹੇ ਸਨ।