ਜੱਦਾਹ, 12 ਮਾਰਚ (ਪੋਸਟ ਬਿਊਰੋ)- ਆਮ ਤੌਰ ਉੱਤੇ ਪਾਇਲਟ ਨੂੰ ਵਾਪਸ ਆਉਣ ਦੀ ਆਗਿਆ ਉਦੋਂ ਹੀ ਮਿਲਦੀ ਹੈ ਜਦੋਂ ਐਮਰਜੈਂਸੀ ਸਥਿਤੀ ਹੁੰਦੀ ਹੈ, ਪਰ ਸਾਊਦੀ ਅਰਬ ਦੇ ਇਕ ਪਾਇਲਟ ਨੇ ਹਵਾਈ ਜਹਾਜ਼ ਦੀ ਵਾਪਸੀ ਦਾ ਫੈਸਲਾ ਕੀਤਾ, ਜਦੋਂ ਪਤਾ ਲੱਗਾ ਕਿ ਇਕ ਮਹਿਲਾ ਯਾਤਰੀ ਹਵਾਈ ਅੱਡੇ ਉਤੇ ਆਪਣੇ ਬੱਚੇ ਨੂੰ ਛੱਡ ਆਈ ਹੈ।
ਮੀਡੀਆ ਰਿਪੋਰਟਾਂ ਅਨੁਸਾਰ ਫਲਾਈਟ ਜੱਦਾਹ ਤੋਂ ਕੁਆਲਾਲੰਪੁਰ ਲਈ ਉਡੀ ਤਾਂ ਸਾਊਦੀ ਅਰਬ ਦੀ ਔਰਤ ਨੇ ਦੱਸਿਆ ਕਿ ਉਸ ਦਾ ਬੱਚਾ ਹਵਾਈ ਅੱਡੇ ਉੱਤੇ ਰਹਿ ਗਿਆ ਹੈ। ਪਾਇਲਟ ਨੇ ਏਅਰ ਟਰੈਫਿਕ ਕੰਟਰੋਲਰ (ਏ ਟੀ ਸੀ) ਨਾਲ ਸੰਪਰਕ ਕੀਤਾ। ਘਟਨਾ ਦੀ ਵੀਡੀਓ ਸਾਹਮਣੇ ਆਈ ਹੈ, ਜਿਸ ਵਿਚ ਏ ਟੀ ਸੀ ਦੇ ਸਟਾਫ ਨੇ ਸਾਥੀ ਨੂੰ ਕਿਹਾ ਕਿ ਇਸ ਸਥਿਤੀ ਲਈ ਨਿਯਮ ਕੀ ਹਨ? ਉਸ ਤੋਂ ਬਾਅਦ ਉਹ ਪਾਇਲਟ ਨੂੰ ਇਹ ਸਮੱਸਿਆ ਦੁਹਰਾਉਣ ਲਈ ਕਹਿੰਦਾ ਹੈ। ਪਾਇਲਟ ਕਹਿੰਦਾ ਹੈ ਕਿ ਔਰਤ ਬੱਚੇ ਨੂੰ ਕਿੰਗ ਅਬਦੁੱਲਾ ਅਜ਼ੀਜ਼ ਕੌਮਾਂਤਰੀ ਹਵਾਈ ਅੱਡੇ ਉੱਤੇ ਭੁੱਲ ਗਈ ਹੈ ਤੇ ਇਸ ਨੇ ਯਾਤਰਾ ਜਾਰੀ ਰੱਖਣ ਤੋਂ ਨਾਂਹ ਕਰ ਦਿੱਤੀ ਹੈ। ਇਸ ਤੋਂ ਬਾਅਦ ਏ ਟੀ ਸੀ ਨੇ ਫਲਾਈਟ ਵਾਪਸ ਆਉਣ ਦੀ ਇਜਾਜ਼ਤ ਦੇ ਦਿੱਤੀ। ਸੋਸ਼ਲ ਮੀਡੀਆ ਉੱਤੇ ਮਨੁੱਖੀ ਆਧਾਰ ਉੱਤੇ ਫੈਸਲੇ ਲੈਣ ਲਈ ਪਾਇਲਟ ਦੀ ਪ੍ਰਸ਼ੰਸਾ ਕੀਤੀ ਗਈ ਹੈ। ਬਹੁਤ ਸਾਰੇ ਲੋਕ ਬੱਚੇ ਨੂੰ ਭੁਲਾਉਣ ਲਈ ਮਾਂ ਦੀ ਆਲੋਚਨਾ ਕਰ ਰਹੇ ਹਨ। ਇਹ ਸਪੱਸ਼ਟ ਨਹੀਂ ਕਿ ਫਲਾਈਟ ਸਟਾਰਟ ਹੋਣ ਤੋਂ ਕਿੰਨੀ ਦੇਰ ਪਿੱਛੋਂ ਔਰਤ ਨੂੰ ਗਲਤੀ ਦਾ ਅਹਿਸਾਸ ਹੋਇਆ। ਪਿਛਲੇ ਸਾਲ ਜਰਮਨੀ ਵਿਚ ਅਜਿਹਾ ਹੀ ਕੇਸ ਸਾਹਮਣੇ ਆਇਆ ਸੀ। ਫਿਰ ਪੁਲਿਸ ਨੇ ਦੱਸਿਆ ਕਿ ਇਕ ਜੋੜਾ ਹਵਾਈ ਅੱਡੇ ਉਤੇ ਆਪਣੀ ਧੀ ਨੂੰ ਭੁੱਲ ਗਿਆ ਸੀ।