ਬਰੈਂਪਟਨ, 12 ਮਾਰਚ (ਪੋਸਟ ਬਿਊਰੋ) : ਐਤਵਾਰ ਨੂੰ ਇਥੋਪੀਆਨ ਏਅਰਲਾਈਨਜ਼ ਦੇ ਹਾਦਸਾਗ੍ਰਸਤ ਹੋਏ ਜਹਾਜ਼ ਵਿੱਚ 157 ਯਾਤਰੀ ਮਾਰੇ ਗਏ ਸਨ ਜਿਨ੍ਹਾਂ ਵਿੱਚੋਂ 18 ਕੈਨੇਡੀਅਨ ਸਨ। ਜਿਨ੍ਹਾਂ ਵਿੱਚੋਂ ਮਾਂ ਤੇ ਧੀ ਐਡਮੰਟਨ ਤੋਂ ਸਨ, ਓਟਵਾ ਦੀ ਕਾਰਲਟਨ ਯੂਨੀਵਰਸਿਟੀ ਦੇ ਪ੍ਰੋਫੈਸਰ ਤੇ ਬਰੈਂਪਟਨ, ਓਨਟਾਰੀਓ ਦੇ ਇੱਕ ਪਰਿਵਾਰ ਦੇ ਛੇ ਜੀਅ ਵੀ ਸ਼ਾਮਲ ਸਨ।
ਇਸ ਹਾਦਸੇ ਵਿੱਚ ਮਾਰੇ ਗਏ 18 ਕੈਨੇਡੀਅਨਾਂ ਵਿੱਚੋਂ 17 ਦੀ ਪਛਾਣ ਹੋ ਚੁੱਕੀ ਹੈ। 37 ਸਾਲਾ ਕੋਸ਼ਾ ਵੈਦਿਆ, ਉਸ ਦੇ ਪਤੀ 45 ਸਾਲਾ ਪ੍ਰੇਰਿਤ ਦੀਕਸਿ਼ਤ ਆਪਣੀ 14 ਸਾਲਾ ਧੀ ਆਸ਼ਕਾ ਤੇ 13 ਸਾਲਾ ਦੂਜੀ ਧੀ ਅਨੁਸ਼ਕਾ ਨੂੰ ਆਪਣੇ ਮਾਤਾ ਪਿਤਾ 73 ਸਾਲਾ ਪਣਾਗੇਸ ਵੈਦਿਆ ਤੇ 67 ਸਾਲਾ ਹੰਸਿਨੀ ਵੈਦਿਆ ਨਾਲ ਨੈਰੋਬੀ ਲਿਜਾ ਰਹੇ ਸਨ।
ਮਨੰਤ ਵੈਦਿਆ ਨੇ ਦੱਸਿਆ ਕਿ ਉਸ ਦੀ ਭੈਣ ਕੋਸ਼ਾ ਦਾ ਜਨਮ ਕੀਨੀਆ ਵਿੱਚ ਹੋਇਆ ਸੀ ਤੇ ਉਹ ਆਪਣੀਆ ਧੀਆਂ ਨੂੰ ਇਹ ਵਿਖਾਉਣਾ ਚਾਹੁੰਦੀ ਸੀ ਕਿ ਉਹ ਕਿੱਥੋਂ ਆਈ ਹੈ। ਪਰਿਵਾਰ ਨੇ ਸਫਾਰੀ ਉੱਤੇ ਜਾਣ ਦਾ ਵੀ ਫੈਸਲਾ ਕੀਤਾ ਸੀ। ਵੈਦਿਆ ਨੇ ਦੱਸਿਆ ਕਿ ਉਸ ਦੀ ਭੈਣ ਕੈਨੇਡੀਅਨ ਹੀਅਰਿੰਗ ਸੁਸਾਇਟੀ ਲਈ ਹਿਊਮਨ ਰਿਸੋਰਸਿਜ਼ ਵਿੱਚ ਕੰਮ ਕਰਦੀ ਸੀ ਤੇ ਉਸ ਦਾ ਜੀਜਾ ਲਾਈਫਲੈਬਜ਼ ਤੇ ਓਨਟਾਰੀਓ ਸਰਕਾਰ ਲਈ ਕੰਮ ਕਰਦਾ ਸੀ। ਆਸ਼ਕਾ ਤੇ ਅਨੁਸ਼ਕਾ ਪੀਲ ਡਿਸਟ੍ਰਿਕਟ ਸਕੂਲ ਬੋਰਡ ਵਿੱਚ ਪੜ੍ਹਦੀਆਂ ਸਨ। ਮਨੰਤ ਨੇ ਦੱਸਿਆ ਕਿ ਦੋਵੇਂ ਬੱਚੀਆਂ ਪੜ੍ਹਾਈ ਵਿੱਚ ਬਹੁਤ ਵਧੀਆ ਸਨ। ਆਸ਼ਕਾ ਗਾਇਕਾ ਸੀ ਤੇ ਅਨੁਸ਼ਕਾ ਬਹੁਤ ਹੀ ਵਧੀਆ ਡਾਂਸਰ ਸੀ। ਉਹ ਕੰਪਿਊਟਰਜ਼ ਵਿੱਚ ਵੀ ਚੰਗੀ ਸੀ।
ਮੈਸੈਂਟ ਰੈੱਡ ਰਿਵਰ ਮੈਟਿਸ ਨੇਸ਼ਨ ਦਾ ਮੈਂਬਰ ਸੀ ਤੇ ਕਰਟਨੀ, ਬੀਸੀ ਦੇ ਪਰਿਵਾਰ ਵਿੱਚੋਂ ਪੰਜ ਭੈਣ ਭਰਾਵਾਂ ਤੋਂ ਸੱਭ ਤੋਂ ਛੋਟਾ ਸੀ। ਫਰਸਟ ਨੇਸ਼ਨਜ਼ ਲੀਡਰਸਿ਼ਪ ਕਾਉਂਸਲ ਨੇ ਆਖਿਆ ਕਿ ਮੈਸੈਂਟ ਨੇ ਆਪਣੀ ਪੜ੍ਹਾਈ ਯੂਨੀਵਰਸਿਟੀ ਆਫ ਵਿਕਟੋਰੀਆ ਤੋਂ ਪੂਰੀ ਕੀਤੀ ਸੀ ਤੇ ਉਹ ਕਾਨੂੰਨ ਦੀ ਪੜ੍ਹਾਈ ਕਰਨ ਦੀ ਯੋਜਨਾ ਬਣਾ ਰਿਹਾ ਸੀ।