ਰੋਹਤਕ, 11 ਮਾਰਚ (ਪੋਸਟ ਬਿਊਰੋ)- ਰੋਹਤਕ ਦੇ ਪਿੰਡ ਇਸਮਾਈਲਾ ਦੇ ਮੇਨ ਬਸ ਸਟੈਂਡ ਤੋਂ ਬਦਮਾਸ਼ ਐੱਸ ਬੀ ਆਈ (ਸਟੇਟ ਬੈਂਕ ਆਫ ਇੰਡੀਆ) ਦੀ ਏ ਟੀ ਐੱਮ ਮਸ਼ੀਨ ਪੁੱਟ ਕੇ ਲੈ ਗਏ। ਏ ਟੀ ਐਮ ਵਿੱਚ 13.66 ਲੱਖ ਰੁਪਏ ਕੈਸ਼ ਸੀ। ਵਾਰਦਾਤ ਸ਼ਨੀਵਾਰ ਰਾਤ ਕਰੀਬ ਢਾਈ ਵਜੇ ਹੋਈ।
ਕੱਲ੍ਹ ਸਵੇਰੇ ਪਿੰਡ ਵਾਸੀਆਂ ਨੇ ਏ ਟੀ ਐੱਮ ਬੂਥ ਦਾ ਸ਼ਟਰ ਉਖੜਿਆ ਦੇਖ ਕੇ ਇਸ ਦੀ ਸੂਚਨਾ ਬੈਂਕ ਮੈਨੇਜਰ ਅਤੇ ਪੁਲਸ ਨੂੰ ਦਿੱਤੀ। ਆਸਪਾਸ ਦੀਆਂ ਦੁਕਾਨਾਂ ਦੇ ਸੀ ਸੀ ਟੀ ਵੀ ਫੁਟੇਜ ਵਿੱਚ ਬਦਮਾਸ਼ ਸਕਾਰਪੀਓ ਗੱਡੀ ਵਿੱਚ ਏ ਟੀ ਐੱਮ ਲੱਦ ਕੇ ਲੈ ਜਾਂਦੇ ਨਜ਼ਰ ਆ ਰਹੇ ਹਨ। ਫੁਟੇਜ ਦੇ ਆਧਾਰ 'ਤੇ ਪੁਲਸ ਦਾ ਮੰਨਣਾ ਹੈ ਕਿ ਬਦਮਾਸ਼ਾਂ ਨੇ ਕਰੀਬ 16 ਮਿੰਟ ਵਿੱਚ ਵਾਰਦਾਤ ਕਰ ਦਿੱਤੀ ਸੀ। ਏ ਟੀ ਐੱਮ ਬੂਥ ਉੱਤੇ ਕੋਈ ਨਿਯੁਕਤ ਨਹੀਂ ਸੀ। ਇਸ ਦਾ ਜਿੰਮਾ ਸੰਭਾਲ ਰਹੀ ਕੰਪਨੀ ਏ ਜੀ ਐੱਮ ਦਾ ਦਾਅਵਾ ਹੈ ਕਿ ਉਸ ਨੇ ਗਾਰਡ ਨਿਯੁਕਤੀ ਦੇ ਲਈ ਬੈਂਕ ਤੋਂ ਅਪਰੂਵਲ ਦੇ ਲਈ ਫਾਇਲ ਭੇਜੀ ਹੋਈ ਹੈ, ਪਰ ਬੈਂਕ ਨੇ ਅਜੇ ਮਨਜ਼ੂਰੀ ਨਹੀਂ ਦਿੱਤੀ। ਏ ਜੀ ਐੱਮ ਕੰਪਨੀ ਦੇ ਫੀਲਡ ਅਫਸਰ ਪ੍ਰਦੀਪ ਸੂਰੀ ਦੀ ਸ਼ਿਕਾਇਤ 'ਤੇ ਅਣਪਛਾਤੇ ਬਦਮਾਸ਼ਾਂ ਖਿਲਾਫ ਕੇਸ ਦਰਜ ਕਰ ਲਿਆ ਹੈ। ਸੀ ਸੀ ਟੀ ਵੀ ਫੁਟੇਜ ਵਿੱਚ ਪਤਾ ਲੱਗਾ ਕਿ ਵਾਰਦਾਤ ਤੋਂ ਕਰੀਬ ਚਾਲੀ ਮਿੰਟ ਪਹਿਲਾਂ ਏ ਟੀ ਐੱਮ ਬੂਥ ਦੇ ਨੇੜਿਉਂ ਪੀ ਸੀ ਆਰ ਨੇ ਗਸ਼ਤ ਕੀਤੀ ਸੀ।