ਯੂ ਐਨ, 9 ਮਾਰਚ (ਪੋਸਟ ਬਿਊਰੋ)- ਭਾਰਤੀ ਮੂਲ ਦੀ ਟੀ ਵੀ ਸਟਾਰ, ਲੇਖਿਕਾ ਤੇ ਫੂਡ ਐਕਸਪਰਟ ਪਦਮਾ ਲਕਸ਼ਮੀ ਨੂੰ ਯੂਨਾਈਟਿਡ ਨੇਸ਼ਨਜ਼ ਡਿਵੈਲਪਮੈਂਟ ਪ੍ਰੋਗਰਾਮ (ਯੂ ਐਨ ਡੀ ਪੀ) ਨੇ ਸਦਭਾਵਨਾ ਦੂਤ ਬਣਾਇਆ ਹੈ।
ਅੰਤਰਰਾਸ਼ਟਰੀ ਮਹਿਲਾ ਦਿਵਸ ਮੌਕੇ ਇਥੇ ਕਰਵਾਏ ਇੱਕ ਪ੍ਰੋਗਰਾਮ ਵਿੱਚ ਯੂ ਐਨ ਡੀ ਪੀ ਦੇ ਪ੍ਰਸ਼ਾਸਕ ਅਚਿਮ ਸਟੇਨਰ ਨੇ ਇਸ ਦਾ ਐਲਾਨ ਕੀਤਾ। ਐਮੀ ਪੁਰਸਕਾਰਾਂ ਲਈ ਨਾਮਜ਼ਦ ਹੋ ਚੁੱਕੀ ਲਕਸ਼ਮੀ ਇਸ ਜ਼ਿੰਮੇਵਾਰੀ ਹੇਠ ਯੂ ਐਨ ਦੇ ਸਾਰੇ ਵਿਕਾਸ ਟੀਚਿਆਂ ਲਈ ਸਮਰਥਨ ਇਕੱਠਾ ਕਰੇਗੀ। ਅਸਮਾਨਤਾ ਅਤੇ ਭੇਦਭਾਵ ਮਿਟਾਉਣਾ ਉਨ੍ਹਾਂ ਦਾ ਮੁੱਖ ਕੰਮ ਹੋਵੇਗਾ। ਯੂ ਐਨ ਡੀ ਪੀ ਹੈਡਕੁਆਰਟਰ ਵਿੱਚ ਪ੍ਰੈਸ ਕਾਨਫਰੰਸ ਵਿੱਚ ਲਕਸ਼ਮੀ ਨੇ ਕਿਹਾ ਕਿ ਅਸੀਂ ਅੰਤਰਰਾਸ਼ਟਰੀ ਮਹਿਲਾ ਦਿਵਸ ਮਨਾ ਰਹੇ ਹਾਂ, ਇਸ ਸਮੇਂ ਸਾਨੂੰ ਯਾਦ ਰੱਖਣਾ ਚਾਹੀਦਾ ਹੈ ਕਿ ਕਿਵੇਂ ਅੱਜ ਵੀ ਔਰਤਾਂ ਅਤੇ ਲੜਕੀਆਂ ਭੇਦਭਾਵ ਦਾ ਸ਼ਿਕਾਰ ਹੋ ਰਹੀਆਂ ਹਨ। ਕੋਈ ਦੇਸ਼ ਅਮੀਰ ਹੋਵੇ ਜਾਂ ਗਰੀਬ, ਉਹ ਅਸਮਾਨਤਾ ਨੂੰ ਪੂਰੀ ਤਰ੍ਹਾਂ ਮਿਟਾ ਨਹੀਂ ਸਕਿਆ। ਕਈ ਦੇਸ਼ ਗਰੀਬੀ ਮਿਟਾ ਕੇ ਵੀ ਭੇਦਭਾਵ ਹਟਾਉਣ ਵਿੱਚ ਪੂਰੀ ਤਰ੍ਹਾਂ ਸਫਲ ਨਹੀਂ ਹੋਏ। ਲਿੰਗ, ਉਮਰ, ਜਾਤੀ ਅਤੇ ਨਸਲ ਦੇ ਆਧਾਰ ਉੱਤੇ ਅੱਜ ਵੀ ਹਰ ਥਾਂ ਅਸਮਾਨਤਾ ਹੈ। ਔਰਤਾਂ ਅਤੇ ਘੱਟ ਗਿਣਤੀਆਂ ਇਸ ਦਾ ਸਭ ਤੋਂ ਵੱਧ ਸ਼ਿਕਾਰ ਹਨ। ਨਿਊਯਾਰਕ ਟਾਈਮਜ਼ ਦੀ ਬੈਸਟ ਸੈਲਿੰਗ ਲੇਖਿਕਾ ਰਹਿ ਚੁੱਕੀ ਲਕਸ਼ਮੀ ਅਮਰੀਕਾ ਦੇ ਐਂਡੋਮੈਟਰਿਓਸਿਸ ਫਾਊਂਡੇਸ਼ਨ ਦੀ ਸਹਿ ਸਸੰਥਾਪਕ ਵੀ ਹੈ। ਉਹ ਮਾਣਮੱਤੇ ਮੈਸਾਚੂਸੈਟਸ ਇੰਸਟੀਚਿਊਟ ਆਫ ਟੈਕਨਾਲੋਜੀ 'ਚ ਵਿਜ਼ਟਿੰਗ ਸਕਾਲਰ ਹੈ ਅਤੇ ‘ਟਾਪ ਸ਼ੈਫ' ਵਰਗੇ ਕਈ ਸ਼ੋਅ ਹੋਸਟ ਕਰ ਚੁੱਕੀ ਹੈ।