ਓਟਵਾ, 6 ਮਾਰਚ ( ਪੋਸਟ ਬਿਊਰੋ) : ਫੈਡਰਲ ਸਰਕਾਰ 9000 ਫਾਈਲਾਂ ਵਾਲਾ ਇੱਕ ਅਜਿਹਾ ਡਾਟਾਬੇਸ ਖੋਲ੍ਹਣਾ ਚਾਹੁੰਦੀ ਹੈ ਜਿਸ ਰਾਹੀਂ ਇਨੁਇਟ ਪਰਿਵਾਰਾਂ ਨੂੰ 20ਵੀਂ ਸਦੀ ਦੇ ਟੀਬੀ ਪ੍ਰਕੋਪ ਦੌਰਾਨ ਮਾਰੇ ਗਏ ਆਪਣੇ ਰਿਸਤੇਦਾਰਾਂ ਬਾਰੇ ਜਾਨਣ ਦਾ ਮੌਕਾ ਮਿਲੇਗਾ।
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ, ਜੋ ਕਿ ਇਸ ਹਫਤੇ ਇਕੁਆਲੁਇਟ ਦੇ ਦੌਰੇ ਉੱਤੇ ਜਾ ਰਹੇ ਹਨ, ਤੋਂ ਇਹ ਆਸ ਪ੍ਰਗਟਾਈ ਜਾ ਰਹੀ ਹੈ ਕਿ ਉਹ ਸਮਝਾਉਣਗੇ ਕਿ ਇਹ ਡਾਟਾਬੇਸ ਕਿਸ ਤਰ੍ਹਾਂ ਕੰਮ ਕਰੇਗਾ। ਇਹ ਵੀ ਉਮੀਦ ਹੈ ਕਿ ਟਰੂਡੋ ਇਸ ਸਮੇਂ ਟੀਬੀ ਵਰਗੀ ਮਹਾਮਾਰੀ ਦੌਰਾਨ ਗਲਤ ਇਲਾਜ ਕਰਨ ਕਾਰਨ ਮਾਰੇ ਗਏ ਇਨੁਇਟ ਦੇ ਲੋਕਾਂ ਲਈ ਸਰਕਾਰ ਵੱਲੋਂ ਮੁਆਫੀ ਵੀ ਮੰਗਣਗੇ।
ਪਹਿਲੀ ਵਾਰੀ ਇਹ ਡਾਟਾਬੇਸ ਉੱਤਰੀ ਕੈਨੇਡਾ ਦੇ ਇਨੁਇਟ ਪਰਿਵਾਰਾਂ ਨੂੰ ਆਪਣੇ ਹੀ ਇਲਾਕੇ ਵਿੱਚ ਅਜਿਹੀਆਂ ਸੰਸਥਾਵਾਂ ਦੇ ਨੁਮਾਇੰਦਿਆਂ ਨਾਲ ਸੰਪਰਕ ਕਰਨ ਵਿੱਚ ਮਦਦ ਕਰੇਗਾ ਜਿਹੜੇ ਇਹ ਪਤਾ ਲਾ ਸਕਣਗੇ ਕਿ ਸਬੰਧਤ ਲੋਕਾਂ ਦੇ ਰਿਸਤੇਦਾਰਾਂ ਨਾਲ ਕੀ ਵਾਪਰਿਆ ਸੀ। ਇਸ ਮੁਹਿੰਮ ਦਾ ਅਸਲ ਟੀਚਾ ਅਜਿਹੇ ਲੋਕਾਂ ਦੇ ਪਰਿਵਾਰਕ ਮੈਂਬਰਾਂ ਦੀਆਂ ਕਬਰਾਂ ਦਾ ਪਤਾ ਲਾਉਣਾ ਹੈ ਜਿਹੜੇ 1940ਵਿਆਂ ਤੇ 1960ਵਿਆਂ ਦਰਮਿਆਨ ਟੀਬੀ ਦੇ ਇਲਾਜ ਲਈ ਦੱਖਣੀ ਕੈਨੇਡਾ ਲਿਆਂਦੇ ਗਏ।
ਦ ਕੈਨੇਡਾ ਪਬਲਿਕ ਹੈਲਥ ਐਸੋਸਿਏਸਨ ਦੇ ਅੰਦਾਜੇ ਮੁਤਾਬਕ ਕੈਨੇਡਾ ਦੀ ਇਨੁਇਟ ਆਬਾਦੀ ਦਾ ਅੰਦਾਜਨ ਇੱਕ ਤਿਹਾਈ ਹਿੱਸਾ ਅਜਿਹੀ ਮਹਾਮਾਰੀ ਵਿੱਚ ਟੀਬੀ ਤੋਂ ਪ੍ਰਭਾਵਿਤ ਹੋਇਆ ਸੀ। ਇਸ ਦੌਰਾਨ ਮਾਰੇ ਗਏ ਕਈ ਲੋਕ ਕਦੇ ਵੀ ਆਪਣੇ ਪਰਿਵਾਰਾਂ ਕੋਲ ਨਹੀਂ ਪਰਤੇ ਸਗੋਂ ਕਿਸੇ ਵੀ ਅਣਦੱਸੀ ਥਾਂ ਉੱਤੇ ਉਨ੍ਹਾਂ ਨੂੰ ਦਫਨਾ ਦਿੱਤਾ ਗਿਆ।