ਵਾਸਿ਼ੰਗਟਨ, 5 ਮਾਰਚ (ਪੋਸਟ ਬਿਊਰੋ) : ਹਿਲੇਰੀ ਕਲਿੰਟਨ ਨੇ ਸਪਸ਼ਟ ਕਰ ਦਿੱਤਾ ਹੈ ਕਿ ਉਹ 2020 ਵਿੱਚ ਰਾਸ਼ਟਰਪਤੀ ਚੋਣਾਂ ਵਿੱਚ ਖੜ੍ਹੀ ਨਹੀਂ ਹੋਣ ਜਾ ਰਹੀ। ਪਰ ਉਨ੍ਹਾਂ ਇਹ ਤਹੱਈਆ ਵੀ ਪ੍ਰਗਟਾਇਆ ਕਿ ਉਹ ਕਿਤੇ ਵੀ ਨਹੀਂ ਜਾ ਰਹੀ।
ਸਾਬਕਾ ਵਿਦੇਸ਼ ਮੰਤਰੀ, ਸੈਨੇਟਰ ਤੇ ਫਰਸਟ ਲੇਡੀ ਰਹਿ ਚੁੱਕੀ ਹਿਲੇਰੀ ਨੇ ਸੋਮਵਾਰ ਨੂੰ ਇੱਕ ਇੰਟਰਵਿਊ ਵਿੱਚ ਆਖਿਆ ਕਿ ਇਸ ਵਾਰੀ ਉਹ ਕੋਈ ਕੈਂਪੇਨ ਨਹੀਂ ਚਲਾਵੇਗੀ। 2016 ਦੀਆਂ ਚੋਣਾਂ ਡੌਨਲਡ ਟਰੰਪ ਹੱਥੋਂ ਹਾਰਨ ਵਾਲੀ ਕਲਿੰਟਨ ਦਾ ਕਹਿਣਾ ਹੈ ਕਿ ਉਹ ਕੰਮ ਕਰਨਾ ਜਾਰੀ ਰੱਖੇਗੀ ਤੇ ਜੋ ਉਨ੍ਹਾਂ ਦਾ ਮੰਨਣਾ ਹੈ ਉਸ ਬਾਰੇ ਆਪਣੇ ਵਿਚਾਰ ਰੱਖਣੇ ਜਾਰੀ ਰੱਖੇਗੀ।
ਉਨ੍ਹਾਂ ਆਖਿਆ ਕਿ ਸਾਡੇ ਦੇਸ਼ ਵਿੱਚ ਜੋ ਕੁੱਝ ਵਾਪਰ ਰਿਹਾ ਹੈ ਉਹ ਕਾਫੀ ਪਰੇਸ਼ਾਨ ਕਰਨ ਵਾਲਾ ਹੈ। ਉਨ੍ਹਾਂ ਆਖਿਆ ਕਿ ਡੈਮੋਕ੍ਰੈਟਿਕ ਪਾਰਟੀ ਵੱਲੋਂ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਬਣਨ ਦੀ ਚਾਹਨਾ ਰੱਖਣ ਵਾਲਿਆਂ ਵਿੱਚੋਂ ਕਈਆਂ ਨਾਲ ਉਨ੍ਹਾਂ ਗੱਲ ਕੀਤੀ ਹੈ। ਹਿਲੇਰੀ ਨੇ ਆਖਿਆ ਕਿ ਅਜਿਹੇ ਉਮੀਦਵਾਰਾਂ ਨੂੰ ਉਨ੍ਹਾਂ ਇਹੀ ਸਮਝਾਉਣ ਦੀ ਕੋਸਿ਼ਸ਼ ਕੀਤੀ ਹੈ ਕਿ ਭਾਵੇਂ ਸਾਡੇ ਕੋਲ ਅਸਲ ਸਮੱਸਿਆਂਵਾਂ ਤੇ ਟੁੱਟੇ ਵਾਅਦਿਆਂ ਦੀ ਲੰਮੀ ਫਹਿਰਿਸਤ ਹੈ ਫਿਰ ਵੀ ਸਾਨੂੰ ਕਿਸੇ ਵੀ ਗੱਲ ਨੂੰ ਸੁਖਾਲਿਆਂ ਹੀ ਨਹੀਂ ਲੈਣਾ ਚਾਹੀਦਾ।