ਬਰੈਂਪਟਨ, 3 ਮਾਰਚ (ਪੋਸਟ ਬਿਊਰੋ)- ਟੋਰਾਂਟੋਂ ਦੇ ਆਸਪਾਸ ਦੇ ਏਰੀਆ ਤੋਂ ਪ੍ਰਸਾਰਿਤ ਹੋਣ ਵਾਲੇ ਵੱਖ-ਵੱਖ ਰੇਡੀਓ ਤੇ ਟੀਵੀ ਪੋਗਰਾਮਾਂ ਦੇ ਸੰਚਾਲਕਾਂ ਵਲੋਂ ਬਣਾਈ ਸੰਸਥਾ ਕੈਨੇਡੀਅਨ ਪੰਜਾਬੀ ਬ੍ਰਾਡਕਾਸਟਰਜ਼ ਐਸੋਸੀਏਸਨ ਦੇ ਮੈਬਰਾਂ ਨੇ ਸਰਬ ਸੰਮਤੀ ਨਾਲ 2019 ਲਈ ਜਗਦੀਸ਼ ਗਰੇਵਾਲ ਨੂੰ ਕੋਆਰਡੀਨੇਟਰ ਥਾਪ ਦਿੱਤਾ ਹੈ। ਇਸ ਤੋਂ ਪਹਿਲਾਂ ਦੋ ਸਾਲ ਹਰਜਿੰਦਰ ਗਿਲ ਵਲੋਂ ਇਹ ਜਿ਼ੰਮੇਵਾਰੀ ਬਖੂਬੀ ਨਿਭਾਈ ਗਈ। ਸੰਸਥਾ ਦੇ ਵੱਖ-ਵੱਖ ਮੈਬਰਾਂ ਵਲੋਂ ਹਰਜਿੰਦਰ ਗਿੱਲ ਦਾ 2 ਸਾਲ ਦਿੱਤੀਆਂ ਸੇਵਾਵਾਂ ਲਈ ਧੰਨਵਾਦ ਕੀਤਾ ਗਿਆ ਹੈ। ਪਿਛਲੇ ਦੋ ਸਾਲਾਂ ਵਿਚ ਸੰਸਥਾ ਨੇ ਜਿਥੇ ਸੂਬਾਈ ਚੋਣਾਂ ਦੌਰਾਨ ਡੀਬੇਟਸ ਆਯੋਜਿਤ ਕੀਤੀਆਂ, ਉਥੇ ਹੀ ਮਿਉਂਸਪਲ ਚੋਣਾਂ ਦੌਰਾਨ ਵੀ ਅਜਿਹੇ ਪ੍ਰੋਗਰਾਮ ਉਲੀਕੇ ਗਏ, ਜਿਨ੍ਹਾਂ ਦੌਰਾਨ ਪੰਜਾਬੀ ਸਰੋਤਿਆਂ ਨੂੰ ਚਲੰਤ ਮਸਲਿਆਂ ਬਾਰੇ ਪੂਰੀ ਜਾਣਕਾਰੀ ਦਿੱਤੀ ਗਈ, ਤਾਂ ਜੋ ਸਹੀ ਲੋਕ ਰਾਏ ਬਣਾਈ ਜਾ ਸਕੇ। ਇਨ੍ਹਾਂ ਪ੍ਰੋਗਰਾਮਾਂ ਨੂੰ ਉਲੀਕਣ ਵਿਚ ਹਰਜਿੰਦਰ ਗਿਲ ਨੇ ਅਹਿਮ ਭੂਮਿਕਾ ਨਿਭਾਈ ਸੀ। ਇਸ ਤੋਂ ਇਲਾਵਾ ਸੰਸਥਾ ਵਲੋਂ ਵੱਖ-ਵੱਖ ਸਿਆਸੀ ਅਤੇ ਸਮਾਜ ਸੁਧਾਰਕ ਸੰਸਥਾਵਾਂ ਨਾਲ ਵੀ ਮੀਟਿੰਗਾਂ ਆਯੋਜਿਤ ਕੀਤੀਆਂ ਗਈਆਂ ਤੇ ਭਾਈਾਚਾਰੇ ਲਈ ਹੋ ਰਹੇ ਚੰਗੇ ਕੰਮਾਂ `ਚ ਵਧ ਚੜ੍ਹ ਕੇ ਹਿੱਸਾ ਪਾਇਆ। ਇਸ ਸੰਸਥਾ ਦੇ ਇਸ ਸਮੇਂ 30 ਦੇ ਕਰੀਬ ਮੈਬਰ ਹਨ, ਜੋ ਵੱਖ-ਵੱਖ ਰੇਡੀਓ ਤੇ ਟੀਵੀ ਚੈਨਲਾਂ ਤੋ ਆਪਣੇ ਪ੍ਰੋਗਰਾਮ ਪ੍ਰਸਾਰਿਤ ਕਰਦੇ ਹਨ। ਜਗਦੀਸ਼ ਗਰੇਵਾਲ, ਜੋ ਇਸ ਸੰਸਥਾ ਦੇ ਫਾਊਡਰ ਮੈਬਰ ਹਨ, ਨੇ ਸਾਰੇ ਸਾਥੀਆਂ ਦਾ ਇਹ ਜਿ਼ੰਮੇਵਾਰੀ ਸੌਪਣ ਲਈ ਜਿਥੇ ਧੰਨਵਾਦ ਕੀਤਾ, ਉਥੇ ਹੀ ਸਹਿਯੋਗ ਲਈ ਵੀ ਮੰਗ ਕੀਤੀ। ਇਸੇ ਤਰ੍ਹਾਂ ਹੀ ਸੋਢੀ ਨਾਗਰਾ, ਜੋ ਲੰਬੇ ਸਮੇ ਤੋਂ ਖਜਾਨਚੀ ਦੇ ਅਹੁਦੇ ਉਤੇ ਸਨ, ਉਨ੍ਹਾਂ ਦੀ ਥਾਂ ਉਤੇ ਹੁਣ ਮਨਨ ਗੁਪਤਾ ਨੂੰ ਇਹ ਅਹੁਦਾ ਸੰਭਾਲਿਆ ਗਿਆ ਹੈ। ਜਗਦੀਸ਼ ਗਰੇਵਾਲ ਨੇ ਦੱਸਿਆ ਕਿ ਪੰਜਾਬੀ ਭਾਈਚਾਰੇ ਲਈ ਇਹ ਇਕ ਬਹੁਤ ਬਿਹਤਰੀਨ ਪਲੇਟਫਾਰਮ ਬਣ ਚੁੱਕਿਆ ਹੈ। ਜਿਥੇ ਕੋਈ ਵੀ ਇਕ ਫੋਨ ਕਾਲ ਰਾਹੀਂ ਸੰਸਥਾ ਦੇ ਸਾਰੇ ਹੀ ਮੈਬਰਾਂ ਤੱਕ ਆਪਣਾ ਸੁਨੇਹਾ ਪਹੁੰਚਾ ਸਕਦਾ ਹੈ। ਇਸ ਮੌਕੇ ਕਲੱਬ ਦੇ ਪਹਿਲਾਂ ਰਹਿ ਚੁੱਕੇ ਕੋਆਰਡੀਨੇਟਰ ਰਣਧੀਰ ਰਾਣਾ ਵਲੋਂ ਵੀ ਜਿਥੇ ਹਰਜਿੰਦਰ ਗਿਲ ਦਾ ਧੰਨਵਾਦ ਕੀਤਾ ਗਿਆ, ਉਥੇ ਜਗਦੀਸ਼ ਗਰੇਵਾਲ ਅਤੇ ਮਨਨ ਗੁਪਤਾ ਨੂੰ ਸ਼ੁਭ ਇਛਾਵਾਂ ਵੀ ਦਿੱਤੀਆਂ।