ਲੰਡਨ, 21 ਫਰਵਰੀ (ਪੋਸਟ ਬਿਊਰੋ)- ਬ੍ਰਿਟੇਨ ਨੇ ਅੱਤਵਾਦੀ ਸੰਗਠਨ ਇਸਲਾਮਿਕ ਸਟੇਟ 'ਚ ਸ਼ਾਮਲ ਹੋਣ ਲਈ ਚਾਰ ਸਾਲ ਪਹਿਲਾਂ ਘਰ ਤੋਂ ਭੱਜੀ ਬੰਗਲਾ ਦੇਸ਼ੀ ਮੂਲ ਦੀ ਕੁੜੀ ਸ਼ਮੀਮਾ ਬੇਗਮ (19) ਦੀ ਨਾਗਰਿਕਤਾ ਰੱਦ ਕਰ ਦਿੱਤੀ ਹੈ। ਸ਼ਮੀਮਾ ਨੇ ਇਸ ਨੂੰ ਆਪਣੇ ਨਾਲ ਨਾਇਨਸਾਫੀ ਦੱਸਿਆ ਹੈ।
ਪਿਛਲੇ ਦਿਨੀਂ ਸੀਰੀਆ ਦੇ ਇਕ ਸ਼ਰਨਾਰਥੀ ਕੈਂਪ ਵਿੱਚ ਆਪਣੇ ਤੀਸਰੇ ਬੱਚੇ ਨੂੰ ਜਨਮ ਦੇਣ ਵਾਲੀ ਸ਼ਮੀਮਾ ਬੇਗਮ ਨੇ ਬ੍ਰਿਟੇਨ ਪਰਤਣ ਦੀ ਇੱਛਾ ਪ੍ਰਗਟਾਈ ਸੀ। ਇਸ ਪਿੱਛੋਂ ਉਸ ਦੀ ਵਾਪਸੀ ਬਾਰੇ ਬ੍ਰਿਟੇਨ 'ਚ ਬਹਿਸ ਛਿੜ ਗਈ ਸੀ। ਸ਼ਮੀਮਾ ਦੇ ਪਰਵਾਰ ਨੂੰ ਬੀਤੇ ਦਿਨੀਂ ਗ੍ਰਹਿ ਮੰਤਰਾਲੇ ਦਾ ਪੱਤਰ ਮਿਲਿਆ ਜਿਸ ਵਿੱਚ ਉਸ ਦੀ ਨਾਗਰਿਕਤਾ ਖਤਮ ਕੀਤੇ ਜਾਣ ਦਾ ਜ਼ਿਕਰ ਕੀਤਾ ਗਿਆ ਸੀ। ਇਸ ਫੈਸਲੇ ਤੋਂ ਨਾਰਾਜ਼ ਸ਼ਮੀਮਾ ਨੇ ਕਿਹਾ ਕਿ ਮੈਂ ਹੈਰਾਨ ਹਾਂ। ਕਈ ਲੋਕਾਂ ਨੂੰ ਬ੍ਰਿਟੇਨ ਸਰਕਾਰ ਵਾਪਸ ਬੁਲਾ ਚੁੱਕੀ ਹੈ ਤਾਂ ਮੇਰਾ ਕੇਸ ਅਲੱਗ ਕਿਵੇਂ ਹੋ ਗਿਆ? ਉਸ ਦੇ ਪਰਵਾਰ ਵਾਲੇ ਵੀ ਸਰਕਾਰ ਦੇ ਇਸ ਕਦਮ ਤੋਂ ਹੈਰਾਨ ਹਨ। ਆਈ ਐਸ ਵਿੱਚ ਸ਼ਾਮਲ ਹੋਣ ਲਈ ਸ਼ਮੀਮਾ 2015 'ਚ ਆਪਣੀਆਂ ਦੋ ਜਮਾਤਣਾਂ ਨਾਲ ਸੀਰੀਆ ਪੁੱਜ ਗਈ ਸੀ। ਉਥੇ ਉਸ ਨੇ ਇਕ ਅੱਤਵਾਦੀ ਨਾਲ ਨਿਕਾਹ ਕਰ ਲਿਆ। ਉਸ ਦੇ ਦੋ ਬੱਚਿਆਂ ਦੀ ਮੌਤ ਹੋ ਚੁੱਕੀ ਹੈ। ਬੀਤੇ ਦਿਨੀਂ ਾਈ ਐਸ ਦੇ ਕਬਜ਼ੇ ਵਾਲੇ ਇਕਲੌਤੇ ਸੀਰੀਆਈ ਪਿੰਡ ਤੋਂ ਭੱਜ ਕੇ ਆਉਣ ਪਿੱਛੋਂ ਸ਼ਰਨਾਰਥੀ ਕੈਂਪ 'ਚ ਉਸ ਨੇ ਆਪਣੇ ਤੀਜੇ ਬੱਚੇ ਨੂੰ ਜਨਮ ਦਿੱਤਾ ਸੀ।