ਦੁਬਈ, 21 ਫਰਵਰੀ (ਪੋਸਟ ਬਿਊਰੋ)- ਅੰਤਰਰਾਸ਼ਟਰੀ ਕ੍ਰਿਕਟ ਕੌਂਸਲ (ਆਈ ਸੀ ਸੀ) ਨੇ ਕੱਲ੍ਹ ਯੂ ਏ ਈ ਵਿੱਚ ਰਹਿਣ ਵਾਲੇ ਕੋਚ ਇਰਫਾਨ ਅੰਸਾਰੀ ਉੱਤੇ 10 ਸਾਲ ਲਈ ਪਾਬੰਦੀ ਲਾ ਦਿੱਤੀ। ਅੰਸਾਰੀ ਨੂੰ 2017 ਵਿੱਚ ਪਾਕਿਸਤਾਨ ਦੇ ਕਪਤਾਨ ਸਰਫਰਾਜ਼ ਅਹਿਮਦ ਨਾਲ ‘ਭਿ੍ਰਸ਼ਟ ਸੰਪਰਕ' ਕਰਨ ਦਾ ਦੋਸ਼ੀ ਪਾਇਆ ਗਿਆ ਹੈ।
ਇਸ ਸੰਬੰਧ ਵਿੱਚ ਆਈ ਸੀ ਸੀ ਨੇ ਕਿਹਾ ਕਿ ਇਸ ਦੇ ਭਿ੍ਰਸ਼ਟਾਚਾਰ ਰੋਕੂ ਟਿ੍ਰਬਿਊਨਲ ਨੇ ਇਰਫਾਨ ਅੰਸਾਰੀ ਨੂੰ ਇਥੇ ਸੁਣਵਾਈ ਦੌਰਾਨ ਭਿ੍ਰਸ਼ਟਾਚਾਰ ਰੋਕੂ ਜ਼ਾਬਤੇ ਦੇ ਤਿੰਨ ਨਿਯਮਾਂ ਦੇ ਉਲੰਘਣ ਦਾ ਦੋਸ਼ੀ ਪਾਇਆ ਹੈ, ਜਿਸ ਤੋਂ ਬਾਅਦ ਉਨ੍ਹਾਂ 'ਤੇ ਪਾਬੰਦੀ ਲਾਈ ਗਈ। ਪਾਕਿਸਤਾਨ ਕ੍ਰਿਕਟ ਟੀਮ ਨਾਲ ਜੁੜੇ ਹੋਣ ਅਤੇ ਯੂ ਏ ਈ ਦੇ ਘਰੇਲੂ ਕ੍ਰਿਕਟ ਵਿੱਚ ਹਿੱਸਾ ਲੈਣ ਵਾਲੀਆਂ ਦੋ ਟੀਮਾਂ ਦਾ ਕੋਚ ਹੋਣ ਕਾਰਨ ਅੰਸਾਰੀ ਆਈ ਸੀ ਸੀ ਦੇ ਜ਼ਾਬਤੇ ਨਾਲ ਬੱਝੇ ਹੋਏ ਹਨ। ਆਈ ਸੀ ਸੀ ਦੇ ਏ ਸੀ ਯੂ ਜਨਰਲ ਮੈਨੇਜਰ ਐਲੇਕਸ ਮਾਰਸ਼ਲ ਨੇ ਕਿਹਾ ਕਿ ਮੈਂ ਸਰਫਰਾਜ਼ ਅਹਿਮਦ ਦਾ ਧੰਨਵਾਦ ਕਰਨਾ ਚਾਹੁੰਦਾ ਹਾਂ ਜਿਨ੍ਹਾਂ ਨੇ ਇਸ ਸੰਪਰਕ ਦੀ ਜਾਣਕਾਰੀ ਦੇ ਕੇ ਅਸਲੀ ਅਗਵਾਈ ਵਾਲੀ ਯੋਗਤਾ ਅਤੇ ਪੇਸ਼ੇਵਰ ਵਤੀਰਾ ਦਿਖਾਇਆ। ਉਨ੍ਹਾਂ ਨੇ ਪਛਾਣਿਆ ਕਿ ਇਹ ਕੀ ਹੈ, ਇਸ ਨੂੰ ਰੱਦ ਕੀਤਾ ਅਤੇ ਸ਼ਿਕਾਇਤ ਕੀਤੀ। ਉਨ੍ਹਾਂ ਨੇ ਇਸ ਤੋਂ ਬਾਅਦ ਸਾਡੀ ਜਾਂਚ ਤੇ ਫਿਰ ਟਿ੍ਰਬਿਊਨਲ ਵਿੱਚ ਸਹਿਯੋਗ ਕੀਤਾ।
ਵਰਨਣ ਯੋਗ ਹੈ ਕਿ ਇਰਫਾਨ ਅੰਸਾਰੀ ਨੇ ਅਕਤੂਬਰ 2017 ਵਿੱਚ ਯੂ ਏ ਈ ਵਿੱਚ ਸ੍ਰੀਲੰਕਾ ਖਿਲਾਫ ਸੀਰੀਜ਼ ਦੌਰਾਨ ਸਰਫਰਾਜ਼ ਨਾਲ ਸੰਪਰਕ ਕੀਤਾ ਸੀ। ਉਸ ਦਾ ਇਰਾਦਾ ਸਰਫਰਾਜ਼ ਤੋਂ ਸੂਚਨਾਵਾਂ ਹਾਸਲ ਕਰਕੇ ਉਸ ਨੂੰ ਭਿ੍ਰਸ਼ਟ ਸਰਗਰਮੀਆਂ ਵਿੱਚ ਸ਼ਾਮਲ ਕਰਨਾ ਸੀ। ਸਰਫਰਾਜ਼ ਨੇ ਇਸ ਦੀ ਸ਼ਿਕਾਇਤ ਕੀਤੀ, ਜਿਸ ਤੋਂ ਬਾਅਦ ਆਈ ਸੀ ਸੀ ਏ ਸੀ ਯੂ ਨੇ ਜਾਂਚ ਸ਼ੁਰੂ ਕੀਤੀ। ਮੀਡੀਆ ਵਿੱਚ ਆਈਆਂ ਖਬਰਾਂ ਮੁਤਾਬਕ ਅੰਸਾਰੀ ਨੇ 30 ਸਾਲ ਤੱਕ ਸ਼ਾਰਜਾਹ ਕ੍ਰਿਕਟ ਕੌਂਸਲ ਨਾਲ ਕੰਮ ਕੀਤਾ ਤੇ ਉਹ ਸ਼ਾਰਜਾਹ ਕ੍ਰਿਕਟ ਕਲੱਬ ਦਾ ਮੁੱਖ ਕੋਚ ਸੀ।