ਮੈਲਬਰਨ, 21 ਫਰਵਰੀ (ਪੋਸਟ ਬਿਊਰੋ)- ਇਰਾਕ ਜਾਂ ਸੀਰੀਆ ਵਿੱਚ ਇਸਲਾਮਿਕ ਸਟੇਟ ਲਈ ਲੜਨ ਵਾਸਤੇ ਗਏ ਆਪਣੇ ਉਨ੍ਹਾਂ ਨਾਗਰਿਕਾਂ ਦੇ ਦੇਸ਼ ਵਿੱਚ ਦਾਖਲੇ ਉੱਤੇ ਆਸਟਰੇਲੀਆ ਸਰਕਾਰ ਨੇ ਦੋ ਸਾਲਾ ਪਾਬੰਦੀ ਲਾਉਣ ਦਾ ਐਲਾਨ ਕੀਤਾ ਹੈ। ਇਹ ਲੋਕ ਅੱਤਵਾਦੀ ਗਰੁੱਪ ਦੇ ਪਤਨ ਪਿੱਛੋਂ ਦੇਸ਼ ਮੁੜਨਾ ਚਾਹੁੰਦੇ ਹਨ। ਆਸਟਰੇਲੀਆ ਸਰਕਾਰ ਨੇ ਕਾਨੂੰਨ ਵਿੱਚ ਸੋਧ ਕਰਨ ਲਈ ਫੈਡਰਲ ਪਾਰਲੀਮੈਂਟ ਵਿੱਚ ਇਕ ਬਿੱਲ ਪੇਸ਼ ਕੀਤਾ ਹੈ।
ਵਰਨਣ ਯੋਗ ਹੈ ਕਿ ਕੁਝ ਦਿਨ ਪਹਿਲਾਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਬ੍ਰਿਟੇਨ, ਫਰਾਂਸ, ਜਰਮਨੀ ਤੇ ਹੋਰ ਯੂਰਪੀ ਸਹਿਯੋਗੀ ਦੇਸ਼ਾਂ ਨੂੰ ਫੜੇ ਜਾ ਚੁੱਕੇ ਉਨ੍ਹਾਂ ਲੜਾਕਿਆਂ ਨੂੰ ਵਾਪਸ ਲੈਣ ਅਤੇ ਉਨ੍ਹਾਂ ਖਿਲਾਫ ਕੇਸ ਚਲਾਉਣ ਨੂੰ ਕਿਹਾ ਸੀ, ਜੋ ਇਨ੍ਹਾਂ ਦੇਸ਼ਾਂ ਦੇ ਨਾਗਰਿਕ ਹਨ। ਆਸਟਰੇਲੀਆ ਦੇ ਗ੍ਰਹਿ ਮੰਤਰੀ ਪੀਟਰ ਡਿਊਟੇਂਨ ਨੇ ਦੱਸਿਆ ਕਿ 230 ਤੋਂ ਵੱਧ ਆਸਟਰੇਲੀਅਨ ਨਾਗਰਿਕ 2012 ਤੋਂ ਇਸਲਾਮਿਕ ਸਟੇਟ ਦੇ ਕਟੜਪੰਥੀਆਂ ਲਈ ਲੜਨ ਜਾਂ ਉਨ੍ਹਾਂ ਨੂੰ ਸਮਰਥਨ ਦੇਣ ਲਈ ਸੀਰੀਆ ਜਾਂ ਇਰਾਕ ਚਲੇ ਗਏ ਸਨ, ਪਰ ਆਈ ਐੱਸ ਦੀ ਤਾਕਤ ਘਟਣ ਪਿੱਛੋਂ ਇਨ੍ਹਾਂ ਵਿੱਚੋਂ ਆਸਟਰੇਲੀਆ ਦੇ ਕੁਝ ਲੋਕ ਵਾਪਸ ਪਰਤਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਪਾਰਲੀਮੈਂਟ ਦੇ ਹੇਠਲੇ ਸਦਨ ਵਿੱਚ ਇਹ ਬਿੱਲ ਪੇਸ਼ ਕਰਦੇ ਹੋਏ ਡਿਊਟੇਨ ਨੇ ਕਿਹਾ ਕਿ ਕੌਮੀ ਸੁਰੱਖਿਆ ਲਈ ਇਹ ਗੱਲ ਬੜੀ ਮਹੱਤਵ ਪੂਰਨ ਹੈ ਕਿ ਅਸੀਂ ਇਰਾਕ ਜਾਂ ਸੀਰੀਆ ਵਿੱਚ ਸੰਘਰਸ਼ ਵਾਲੇ ਹਿੱਸੇ ਵਿੱਚ ਗਏ ਆਸਟ੍ਰੇਲੀਅਨ ਨਾਗਰਿਕਾਂ ਨੂੰ ਜਿਥੋਂ ਤੱਕ ਹੋ ਸਕੇ, ਦੂਰ ਰੱਖੀਏ। ਉਨ੍ਹਾਂ ਕਿਹਾ ਕਿ ਸੀਰੀਆ ਜਾਂ ਇਰਾਕ `ਚ ਅੱਤਵਾਦੀਆਂ ਲਈ ਲੜਨ ਵਾਲੇ ਜਾਂ ਅੱਤਵਾਦ ਨੂੰ ਸਮਰਥਨ ਦੇਣ ਵਾਲੇ ਆਸਟ੍ਰੇਲੀਅਨ ਲੋਕ ਖਾਸ ਕਰਕੇ ਆਈ ਐੱਸ ਦੀ ਤਾਕਤ ਕਮਜ਼ੋਰ ਹੋਣ ਪਿੱਛੋਂ ਖਤਰਾ ਪੇਸ਼ ਕਰਦੇ ਹਨ। ਡਿਊਟੇਨ ਨੇ ਕਿਹਾ ਕਿ ਇਸ ਕਰ ਕੇ ਅਸੀਂ ਟੈਂਪਰੇਰੀ ਐਕਸਕਲੂਜ਼ਨ ਆਰਡਰਸ ਬਿੱਲ ਪੇਸ਼ ਕਰ ਰਹੇ ਹਾਂ, ਜਿਹੜਾ ਦੂਜੇ ਦੇਸ਼ਾਂ ਵਿੱਚ ਗਲਤ ਕੰਮਾਂ ਵਿੱਚ ਸ਼ਾਮਲ ਰਹੇ ਆਸਟਰੇਲੀਆ ਨਾਗਰਿਕਾਂ ਨੂੰ ਆਸਟਰੇਲੀਆ ਮੁੜਨ ਤੋਂ ਕਾਨੂੰਨੀ ਤੌਰ `ਤੇ ਦਸ ਸਾਲ ਰੋਕੇਗਾ।