ਨਵੀਂ ਦਿੱਲੀ, 21 ਫਰਵਰੀ, (ਪੋਸਟ ਬਿਊਰੋ)- ਕਾਂਗਰਸ ਪਾਰਟੀ ਨੇ ਪੁਲਵਾਮਾ ਦੇ ਅੱਤਵਾਦੀ ਹਮਲੇ ਦੇ ਪਿਛੋਕੜ ਵਿੱਚ ਅੱਜ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਉੱਤੇ ਨਵਾਂ ਅਤੇ ਬਹੁਤ ਤਿੱਖਾ ਹਮਲਾ ਬੋਲਿਆ ਤੇ ਇਹ ਦੋਸ਼ ਲਾਇਆ ਕਿ ਸੱਤਾ ਨੂੰ ਬਚਾਉਣ ਲਈ ਉਹ ਆਪਣੇ ਜਵਾਨਾਂ ਦੀ ਸ਼ਹਾਦਤ ਅਤੇ ਰਾਜ ਧਰਮ ਨੂੰ ਵੀ ਭੁੱਲ ਗਏ ਸਨ।
ਇਸ ਸੰਬੰਧ ਵਿੱਚ ਕਾਂਗਰਸ ਪਾਰਟੀ ਦੇ ਮੁੱਖ ਬੁਲਾਰੇ ਰਣਦੀਪ ਸਿੰਘ ਸੂਰਜੇਵਾਲਾ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਅੱਜ ਏਥੇ ਕਿਹਾ ਕਿ ਪੁਲਵਾਮਾ ਹਮਲੇ ਬਾਰੇ ਮੋਦੀ ਸਰਕਾਰ ਨਾ ਕੋਈ ਸਿਆਸੀ ਜਵਾਬ ਦੇ ਰਹੀ ਹੈ ਤੇ ਨਾ ਆਪਣੀ ਜ਼ਿੰਮੇਵਾਰੀ ਦਾ ਪਾਲਣ ਕਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਪੁਲਵਾਮਾ ਵਿੱਚ ਹੋਏ ਹਮਲੇ ਸਮੇਂ ਦੇਸ਼ ਸਦਮੇ ਵਿੱਚ ਸੀ, ਪਰ ਮੋਦੀ ਜੀ ਡਿਸਕਵਰੀ ਚੈਨਲ ਲਈ ਆਪਣੀ ਫਿਲਮ ਬਣਵਾ ਰਹੇ ਅਤੇ ਚਾਹ ਪੀ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਅਸੀਂ ਦੇਸ਼ ਨੂੰ ਯਾਦ ਦਿਵਾਉਣਾ ਚਾਹਾਂਗੇ ਕਿ ਜਦੋਂ ਮੁੰਬਈ ਵਿੱਚ 26 ਨਵੰਬਰ 2008 ਨੂੰ ਅੱਤਵਾਦੀ ਹਮਲਾ ਹੋਇਆ ਤਾਂ ਓਦੋਂ ਨਰਿੰਦਰ ਮੋਦੀ ਮੁੰਬਈ ਵਿੱਚ ਹਮਲੇ ਵਾਲੀ ਥਾਂ ਨੇੜੇ ਓਦੋਂ ਦੀ ਮਨਮੋਹਨ ਸਿੰਘ ਸਰਕਾਰ ਦੀ ਆਲੋਚਨਾ ਕਰਨ ਲਈ ਪ੍ਰੈੱਸ ਕਾਨਫਰੰਸ ਕਰ ਰਹੇ ਸਨ। ਮੰਦੇ ਭਾਗੀਂ ਨਰਿੰਦਰ ਮੋਦੀ ਲਈ ਸੱਤਾ ਦੀ ਲਾਲਸਾ ਇਸ ਦੇਸ਼ ਦੀ ਫੌਜ ਅਤੇ ਸ਼ਹੀਦਾਂ ਦੇ ਸਤਕਾਰ ਤੋਂ ਵੱਡੀ ਜਾਪਦੀ ਹੈ। ਮੋਦੀ ਜੀ ਰਾਜ-ਧਰਮ ਭੁੱਲ ਕੇ ਆਪਣਾ ਰਾਜ ਬਚਾਉਣ ਦੇ ਜੁਗਾੜ ਵਿੱਚ ਲੱਗੇ ਹੋਏ ਹਨ।