ਮੁੱਲਾਂਪੁਰ ਦਾਖਾ, 21 ਫਰਵਰੀ (ਪੋਸਟ ਬਿਊਰੋ)- ਈਸੇਵਾਲ ਸਮੂਹਿਕ ਬਲਾਤਕਾਰ ਦੇ ਦੋਸ਼ 'ਚ ਗ੍ਰਿਫਤਾਰ ਤਿੰਨ ਦੋਸ਼ੀਆਂ ਮੁਲਜ਼ਮ ਜਗਰੂਪ ਸਿੰਘ, ਸਾਦਿਕ ਅਲੀ ਅਤੇ ਸੁਰਮੂ, ਜੋ ਦਾਖਾ ਪੁਲਸ ਕੋਲ ਸੱਤ ਦਿਨਾਂ ਪੁਲਸ ਰਿਮਾਂਡ ਉਤੇ ਸਨ, ਦਾ ਕੱਲ੍ਹ ਰਿਮਾਂਡ ਖਤਮ ਹੋਣ 'ਤੇ ਅਧੂਰੀ ਪਈ ਜਾਂਚ ਨੂੰ ਪੂਰਾ ਕਰਨ ਲਈ ਹੋਰ ਰਿਮਾਂਡ ਲੈਣ ਲਈ ਅਦਾਲਤ 'ਚ ਪੇਸ਼ ਕੀਤੇ ਗਏ, ਪਰ ਜੱਜ ਨੇ ਤਿੰਨਾਂ ਨੂੰ ਅੱਠ ਦਿਨ ਲਈ ਨਿਆਇਕ ਹਿਰਾਸਤ ਵਿੱਚ ਜੇਲ੍ਹ ਭੇਜ ਦਿੱਤਾ ਹੈ।
ਵਰਨਣ ਯੋਗ ਹੈ ਕਿ ਦਾਖਾ ਪੁਲਸ ਨੂੰ ਪੀੜਤਾ ਨੇ ਆਪਣੇ ਬਿਆਨਾਂ ਵਿੱਚ ਬਲਾਤਕਾਰ ਕਰਨ ਵਾਲੇ 10 ਜਣਿਆਂ ਦਾ ਜ਼ਿਕਰ ਕੀਤਾ ਸੀ ਅਤੇ ਜਾਂਚ ਦੌਰਾਨ ਦਾਖਾ ਪੁਲਸ ਨੇ ਸਿਰਫ ਛੇ ਜਣਿਆਂ ਨੂੰ ਗ੍ਰਿਫਤਾਰ ਕੀਤਾ ਤੇ ਚਾਰ ਹੋਰ ਪੁਲਸ ਲਈ ਬੁਝਾਰਤ ਬਣੇ ਹੋਏ ਹਨ। ਉਹ ਚਾਰ ਕਿਹੜੇ ਸਨ, ਇਸ ਦੀ ਜਾਂਚ ਲਈ 20 ਫਰਵਰੀ ਨੂੰ ਅਦਾਲਤ ਕੋਲੋਂ ਹੋਰ ਪੁਲਸ ਰਿਮਾਂਡ ਦੀ ਮੰਗ ਕੀਤੀ ਗਈ ਸੀ, ਪਰ ਜੱਜ ਨੇ ਉਨ੍ਹਾਂ ਨੂੰ ਅੱਠ ਦਿਨ ਲਈ ਜੇਲ੍ਹ ਭੇਜ ਦਿੱਤਾ ਹੈ। ਕੱਲ੍ਹ ਉਨ੍ਹਾਂ ਨੂੰ ਅਦਾਲਤ ਵਿੱਚ ਪੇਸ਼ ਕਰਨ ਤੋਂ ਪਹਿਲਾਂ ਵਿਸ਼ੇਸ਼ ਤੌਰ 'ਤੇ ਆਈ ਜੀ ਸ੍ਰੀਮਤੀ ਵੀ ਨੀਰਜਾ ਥਾਣਾ ਦਾਖਾ ਵਿਖੇ ਪੁੱਜੇ ਅਤੇ ਉਨ੍ਹਾਂ ਤੋਂ ਬਾਰੀਕੀ ਨਾਲ ਪੁੱਛਗਿੱਛ ਕਰਨ ਪਿੱਛੋਂ ਪੁਲਸ ਵਿਭਾਗ ਵੱਲੋਂ ਦੇਰ ਨਾਲ ਦਰਜ ਕੀਤੇ ਪਰਚੇ ਦੀਆਂ ਨਾਕਾਮੀਆਂ ਦੀ ਜਾਂਚ ਵੀ ਕੀਤੀ। ਥਾਣਾ ਮੁਖੀ ਜਗਦੀਸ਼ ਸ਼ਰਮਾ ਨੇ ਦੱਸਿਆ ਕਿ ਜੇਲ੍ਹ ਵਿੱਚ ਜੁਡੀਸ਼ਲ ਰਿਮਾਂਡ 'ਤੇ ਤਿੰਨਾਂ ਦੋਸ਼ੀਆਂ ਦੀ ਸ਼ਨਾਖਤ ਪ੍ਰੇਡ ਲਈ ਅਦਾਲਤ ਕੋਲ ਅਰਜ਼ੀ ਲਾਈ ਗਈ ਹੈ, ਮਨਜ਼ੂਰੀ ਮਿਲਦੇ ਹੀ ਸ਼ਨਾਖਤੀ ਪ੍ਰੇਡ ਕਰਵਾਈ ਜਾਵੇਗੀ।