ਹਿੰਦੀ ਸਿਨੇਮਾ ਵਿੱਚ ਕਈ ਭਰਾ-ਭੈਣ ਐਕਟਿੰਗ ਵਿੱਚ ਸਰਗਰਮ ਹਨ। ਮਸਲਨ ਕਰੀਨਾ ਕਪੂਰ-ਰਣਬੀਰ ਕਪੂਰ, ਸਾਕਿਬ ਸਲੀਮ-ਹੁਮਾ ਕੁਰੈਸ਼ੀ, ਸ਼ਰਧਾ ਕਪੂਰ-ਸਿਧਾਂਤ ਕਪੂਰ। ਸੁਨੀਲ ਸ਼ੈਟੀ ਦੀ ਬੇਟੀ ਅਥੀਆ ਸ਼ੈਟੀ ਨੇ ‘ਹੀਰੋ’ ਨਾਲ ਹਿੰਦੀ ਸਿਨੇਮਾ ਵਿੱਚ ਕਦਮ ਰੱਖਿਆ ਸੀ। ਉਸ ਦਾ ਭਰਾ ਆਹਾਨ ਸ਼ੈਟੀ ਵੀ ਆਪਣੀ ਡੈਬਿਊ ਫਿਲਮ ਦੀ ਤਿਆਰੀ ਵਿੱਚ ਜ਼ੋਰ-ਸ਼ੋਰ ਨਾਲ ਲੱਗਾ ਹੋਇਆ ਹੈ। ਇਸ ਲੜੀ ਵਿੱਚ ਅਗਲਾ ਨਾਂਅ ਕ੍ਰਿਤੀ ਸਨਨ ਦੀ ਭੈਣ ਨੁਪੂਰ ਦਾ ਜੁੜਨ ਵਾਲਾ ਹੈ। ਦੋਵੇਂ ਭੈਣਾਂ ਇੱਕ ਇਸ਼ਤਿਹਾਰ ਵਿੱਚ ਇਕੱਠੇ ਨਜ਼ਰ ਆ ਚੁੱਕੀਆਂ ਹਨ।
ਨੁਪੂਰ ਦੇ ਐਕਟਿੰਗ ਸਫਰ ਦੇ ਸੰਬੰਧ ਵਿੱਚ ਪੁੱਛੇ ਜਾਣ ਉੱਤੇ ਕ੍ਰਿਤੀ ਨੇ ਕਿਹਾ, ‘ਅਜੇ ਅਜਿਹਾ ਕੁਝ ਪੱਕਾ ਨਹੀਂ ਹੈ, ਜਿਸ ਦੇ ਬਾਰੇ ਮੈਂ ਬੋਲ ਸਕਾਂ, ਪਰ ਉਸ ਨੂੰ ਐਕਟਿੰਗ ਪਸੰਦ ਹੈ। ਉਸ ਨੂੰ ਕੈਮਰੇ ਸਾਹਮਣੇ ਰਹਿਣਾ ਚੰਗਾ ਲੱਗਦਾ ਹੈ। ਮੈਨੂੰ ਵੀ ਖੁਦ ਮਹਿਸੂਸ ਹੋਇਆ ਸੀ ਕਿ ਕੈਮਰੇ ਦੇ ਸਾਹਮਣੇ ਹੋਣਾ ਪਸੰਦ ਹੈ। ਮੈਂ ਇੰਜੀਨੀਅਰਿੰਗ ਦੀ ਪੜ੍ਹਾਈ ਕਰ ਕੇ ਆਈ ਸੀ। ਹਰ ਕਿਸੇ ਦੀ ਆਪਣੀ ਜਰਨੀ ਹੁੰਦੀ ਹੈ। ਉਹ ਬਹੁਤ ਜਲਦੀ ਵਿੱਚ ਨਹੀਂ। ਚੰਗੀ ਫਿਲਮ ਦੇ ਇੰਤਜ਼ਾਰ ਵਿੱਚ ਹੈ। ਜਦ ਉਸ ਨੂੰ ਆਪਣੇ ਡੈਬਿਊ ਦੇ ਲਾਇਕ ਸਕ੍ਰਿਪਟ ਮਿਲੀ ਤਾਂ ਸਹੀ ਕਦਮ ਚੁੱਕੇਗੀ। ਪਹਿਲੀ ਫਿਲਮ ਬਹੁਤ ਅਹਿਮ ਹੁੰਦੀ ਹੈ। ਤੁਹਾਡਾ ਕਰੀਅਰ ਗ੍ਰਾਫ ਉਸ 'ਤੇ ਕਾਫੀ ਹੱਦ ਤੱਕ ਨਿਰਭਰ ਕਰਦਾ ਹੈ। ਇਸ ਲਈ ਉਹ ਆਪਣੀਆਂ ਰਾਹਾਂ ਲੱਭ ਰਹੀ ਹੈ। ਮੈਂ ਉਸ ਨੂੰ ਸਲਾਹ ਦੇਣ ਦੇ ਲਈ ਹਰਦਮ ਮੌਜੂਦ ਹਾਂ। ਉਹ ਆਤਮ ਨਿਰਭਰ ਹੈ, ਆਪਣੀ ਰਾਹਾਂ ਖੁਦ ਹੀ ਚੁਣੇਗੀ।’