ਟੋਰਾਂਟੋ, 20 ਫਰਵਰੀ (ਪੋਸਟ ਬਿਊਰੋ) : ਆਟਿਜ਼ਮ ਦਾ ਸਿ਼ਕਾਰ ਬੱਚਿਆਂ ਦੇ ਮਾਪਿਆਂ ਉੱਤੇ ਟਿੱਪਣੀ ਕਰਨ ਵਾਲੇ ਆਪਣੇ ਕਾਕਸ ਮੈਂਬਰ ਨੂੰ ਬੁੱਧਵਾਰ ਨੂੰ ਪ੍ਰੀਮੀਅਰ ਡੱਗ ਫੋਰਡ ਨੇ ਸਸਪੈਂਡ ਕਰ ਦਿੱਤਾ। ਵਿਧਾਨ ਸਭਾ ਵਿੱਚ ਮੌਜੂਦ ਇਹ ਮਾਪੇ ਫੰਡਿੰਗ ਵਿੱਚ ਹੋਈਆਂ ਤਬਦੀਲੀਆਂ ਨੂੰ ਲੈ ਕੇ ਰੋਹ ਵਿੱਚ ਸਨ।
ਕੁੱਝ ਮਾਪਿਆਂ ਨੇ ਆਖਿਆ ਕਿ ਰੈਂਡੀ ਹਿਲੀਅਰ ਨੇ ਪ੍ਰਸ਼ਨ ਕਾਲ ਮੁੱਕਣ ਤੋਂ ਪਹਿਲਾਂ ਉਨ੍ਹਾਂ ਨੂੰ ਮੁਖਾਤਬ ਹੁੰਦਿਆਂ ਇਸ ਮੁੱਦੇ ਨੂੰ ਕੋਰੀ ਬਕਵਾਸ ਆਖਿਆ। ਪਰ ਹਿਲੀਅਰ ਨੇ ਆਖਿਆ ਕਿ ਉਨ੍ਹਾਂ ਦੀ ਟਿੱਪਣੀ ਅਸਲ ਵਿੱਚ ਐਨਡੀਪੀ ਲਈ ਸੀ। ਫਿਰ ਵੀ ਫੋਰਡ ਨੇ ਹਿਲੀਅਰ ਨੂੰ ਅਣਮਿੱਥੇ ਸਮੇਂ ਲਈ ਟੋਰੀ ਕਾਕਸ ਤੋਂ ਸਸਪੈਂਡ ਕਰ ਦਿੱਤਾ। ਫੋਰਡ ਨੇ ਆਖਿਆ ਕਿ ਉਸ ਦੀਆਂ ਟਿੱਪਣੀਆਂ ਆਟਿਜ਼ਮ ਵਾਲੇ ਬੱਚਿਆਂ ਦੇ ਮਾਪਿਆਂ ਲਈ ਬੜੀਆਂ ਅਪਮਾਨਜਨਕ ਸਨ। ਫੋਰਡ ਨੇ ਆਖਿਆ ਕਿ ਹਿਲੀਅਰ ਨੇ ਆਪਣੀਆਂ ਅਜਿਹੀਆਂ ਟਿੱਪਣੀਆਂ ਨਾਲ ਹੱਦ ਪਾਰ ਕਰ ਲਈ ਹੈ ਤੇ ਇਸ ਨੂੰ ਸਵੀਕਾਰ ਨਹੀਂ ਕੀਤਾ ਜਾਵੇਗਾ।
ਇਸ ਉੱਤੇ ਹਿਲੀਅਰ ਨੇ ਆਖਿਆ ਕਿ ਉਨ੍ਹਾਂ ਨੂੰ ਬਹੁਤ ਹੀ ਦੁੱਖ ਹੈ ਜੇ ਐਨਡੀਪੀ ਲਈ ਕੀਤੀਆਂ ਟਿੱਪਣੀਆਂ ਕਾਰਨ ਪਰਿਵਾਰ ਦੁਖੀ ਹੋਏ ਹਨ। ਉਨ੍ਹਾਂ ਆਖਿਆ ਕਿ ਉਹ ਮਾਪਿਆਂ ਤੋਂ ਮੁਆਫੀ ਮੰਗਦੇ ਹਨ ਕਿ ਐਨਡੀਪੀ ਲਈ ਕੀਤੀਆਂ ਟਿੱਪਣੀਆਂ ਬਾਰੇ ਉਹ ਇਹ ਸਮਝ ਬੈਠੇ ਕਿ ਉਹ ਉਨ੍ਹਾਂ ਲਈ ਕੀਤੀਆਂ ਗਈਆਂ ਹਨ। ਇਹ ਗੱਲ ਉਨ੍ਹਾਂ ਨੂੰ ਨਹੀਂ ਆਖੀ ਗਈ ਤੇ ਨਾ ਹੀ ਆਖੀ ਜਾ ਸਕਦੀ ਹੈ।
ਜਿ਼ਕਰਯੋਗ ਹੈ ਕਿ ਚਿਲਡਰਨ, ਕਮਿਊਨਿਟੀ ਐਂਡ ਸੋਸ਼ਲ ਸਰਵਿਸਿਜ਼ ਮੰਤਰੀ ਲੀਜ਼ਾ ਮੈਕਲਿਓਡ ਨੇ ਆਟਿਜ਼ਮ ਸਬੰਧੀ ਫੰਡਿੰਗ ਵਿੱਚ ਤਬਦੀਲੀਆਂ ਦਾ ਐਲਾਨ ਕੀਤਾ ਸੀ ਜਿਸ ਤਹਿਤ ਆਖਿਆ ਗਿਆ ਕਿ ਛੇ ਸਾਲ ਤੋਂ ਘੱਟ ਉਮਰ ਦੇ ਬੱਚਿਆਂ ਲਈ ਪਰਿਵਾਰਾਂ ਨੂੰ 20,000 ਡਾਲਰ ਇਲਾਜ ਲਈ ਮਿਲੇਗਾ ਤੇ ਛੇ ਤੋਂ 18 ਸਾਲ ਦੇ ਬੱਚਿਆਂ ਦੇ ਇਲਾਜ ਲਈ ਸਾਲ ਦਾ 5000 ਡਾਲਰ ਮਿਲੇਗਾ। ਪਰ ਇੰਟੈਂਸਿਵ ਥੈਰੇਪੀ ਸਾਲ ਦੀ 80,000 ਡਾਲਰ ਤੱਕ ਪੈ ਸਕਦੀ ਹੈ। ਪਰ ਕੁੱਝ ਮਾਪਿਆਂ ਨੇ ਮੰਗ ਕੀਤੀ ਕਿ ਇਹ ਫੰਡਿੰਗ ਉਮਰ ਦੀ ਥਾਂ ਬੱਚਿਆਂ ਦੀਆਂ ਵਿਅਕਤੀਗਤ ਲੋੜਾਂ ਦੇ ਹਿਸਾਬ ਨਾਲ ਤੈਅ ਹੋਣੀ ਚਾਹੀਦੀ ਹੈ।