ਬੀਜਿੰਗ, 20 ਫਰਵਰੀ (ਪੋਸਟ ਬਿਊਰੋ)- ਚੀਨੀ ਟੈਲੀਕਾਮ ਕੰਪਨੀ ਹੁਵਾਵੇ ਦੇ ਮੋਢੀ ਰੇਨ ਝੇਂਗਫੇਈ ਨੇ ਅਮਰੀਕਾ ਉਤੇ ਪਲਟਵਾਰ ਕੀਤਾ ਹੈ। ਝੇਂਗਫੇਈ ਨੇ ਕਿਹਾ ਕਿ ਅਮਰੀਕਾ ਸਭ ਕੋਸ਼ਿਸ਼ਾਂ ਦੇ ਬਾਵਜੂਦ ਸਾਨੂੰ ਦਬਾ ਨਹੀਂ ਸਕਦਾ। ਉਨ੍ਹਾਂ ਕਿਹਾ ਕਿ ਦੁਨੀਆ ਹੁਵਾਵੇ ਦੇ ਬਿਨਾਂ ਨਹੀਂ ਰਹਿ ਸਕਦੀ, ਕਿਉਂਕਿ ਕੰਪਨੀ ਦੇ ਕੋਲ ਸਭ ਤੋਂ ਉਨਤ ਤਕਨੀਕ ਹੈ।
ਆਪਣੀ ਬੇਟੀ ਅਤੇ ਕੰਪਨੀ ਦੀ ਚੀਫ ਫਾਈਨੈਂਸ਼ੀਅਲ ਅਫਸਰੇ ਮੇਂਗ ਵਾਨਝੋਉ ਦੀ ਦਸੰਬਰ ਵਿੱਚ ਕੈਨੇਡਾ ਵਿੱਚ ਗ੍ਰਿਫਤਾਰੀ ਨੂੰ ਝੇਂਗਫੇਈ ਨੇ ਸਿਆਸਤ ਤੋਂ ਪ੍ਰੇਰਿਤ ਦੱਸਿਆ। ਵਾਨਹੋਉ ਉਤੇ ਈਰਾਨ ਵਿੱਚ ਅਮਰੀਕੀ ਪਾਬੰਦੀਆਂ ਦੀ ਉਲੰਘਣਾ ਕਰਨ ਦਾ ਦੋਸ਼ ਲਾਇਆ ਗਿਆ ਸੀ। ਉਨ੍ਹਾਂ ਦੇ ਅਮਰੀਕਾ ਹਵਾਲਗੀ ਲਈ ਅਗਲੇ ਮਹੀਨੇ ਸੁਣਵਾਈ ਹੋਣੀ ਹੈ। ਝੇਂਗਫੇਈ ਨੇ ਕਿਹਾ ਕਿ ਅਸੀਂ ਇਸ ਕਦਮ ਦਾ ਵਿਰੋਧ ਕਰਦੇ ਹਾਂ, ਪਰ ਅਸੀਂ ਕੋਰਟ ਦੇ ਫੈਸਲੇ ਦਾ ਇੰਤਜ਼ਾਰ ਕਰਾਂਗੇ।
ਪਿਛਲੇ ਸਾਲ ਸੁਰੱਖਿਆ ਚਿੰਤਾਵਾਂ ਕਾਰਨ ਆਸਟਰੇਲੀਆ ਨੇ ਆਪਣੇ ਭਵਿੱਖ ਦੇ 5ਜੀ ਨੈੱਟਵਰਕ ਲਈ ਹੁਵਾਵੇ ਦੇ ਜੰਤਰਾਂ 'ਤੇ ਪਾਬੰਦੀ ਲਾ ਦਿੱਤੀ ਸੀ। ਨਿਊਜ਼ੀਲੈਂਡ ਨੇ ਵੀ 5ਜੀ ਨੈੱਟਵਰਕ ਲਈ ਆਪਣੇ ਸਭ ਤੋਂ ਵੱਡੇ ਟੈਲੀਕਾਮ ਕੈਰੀਅਰ ਨੂੰ ਹੁਵਾਵੇ ਦੇ ਜੰਤਰ ਲੈਣ ਤੋਂ ਰੋਕ ਦਿੱਤਾ ਸੀ। ਚੈੱਕ ਗਣਰਾਜ ਨੇ ਵੀ ਟੈਂਡਰ ਪ੍ਰਕਿਰਿਆ ਤੋਂ ਹੁਵਾਵੇ ਨੂੰ ਬਾਹਰ ਰੱਖਿਆ ਹੈ। ਅਮਰੀਕਾ ਵਿੱਚ ਹੁਵਾਵੇ 'ਤੇ ਟ੍ਰੇਡ ਸੀਕ੍ਰੇਟ ਚੋਰੀ ਕਰਨ ਦੇ ਦੋਸ਼ ਹਨ। ਅਮਰੀਕਾ ਦਾ ਕਹਿਣਾ ਹੈ ਕਿ ਹੁਵਾਵੇ ਆਪਣੇ ਕਰਮਚਾਰੀਆਂ ਨੂੰ ਦੂਸਰੀਆਂ ਕੰਪਨੀਆਂ ਦੀ ਟੈਕਨਾਲੋਜੀ ਚੋਰੀ ਕਰਨ ਦੇ ਲਈ ਇਨਾਮ ਵੀ ਦਿੰਦਾ ਹੈ।
ਝੇਂਗਫੇਈ ਨੇ ਕਿਹਾ ਕਿ ਪੱਛਮੀ ਦੇਸ਼ਾਂ ਦੇ ਰਵੱਈਏ ਤੋਂ ਉਹ ਦੁਖੀ ਨਹੀਂ ਹਨ। ਉਨ੍ਹਾਂ ਨੇ ਕਿਹਾ ਕਿ ਜੇ ਪੱਛਮ ਵਿੱਚ ਰੋਸ਼ਨੀ ਚਲੀ ਵੀ ਜਾਂਦੀ ਹੈ ਤਾਂ ਸਾਡੇ ਲਈ ਪੂਰਬ ਚਮਕਦਾ ਰਹੇਗਾ। ਉਨ੍ਹਾਂ ਨੇ ਕਿਹਾ ਕਿ ਜੇ ਅਮਰੀਕਾ ਕੁਝ ਹੋਰਨਾਂ ਦੇਸ਼ਾਂ ਨੂੰ ਸਾਡੇ ਖਿਲਾਫ ਕਰਨ ਵਿੱਚ ਸਫਲ ਵੀ ਹੋ ਜਾਂਦਾ ਹੈ ਤਾਂ ਅਸੀਂ ਕਦੇ ਆਪਣਾ ਆਕਾਰ ਘਟਾ ਨਹੀਂ ਸਕਦੇ ਹਾਂ। ਉਂਝ ਕਈ ਦੇਸ਼ਾਂ ਵਿੱਚ ਅਮਰੀਕੀ ਕੋਸ਼ਿਸ਼ ਫੇਲ ਵੀ ਹੋ ਰਹੀ ਹੈ। ਬ੍ਰਿਟੇਨ ਦੀਆਂ ਖੁਫੀਆ ਏਜੰਸੀਆਂ ਦਾ ਮੰਨਣਾ ਹੈ ਕਿ ਹੁਵਾਵੇ ਤੋਂ ਜਾ ਖਤਰਾ ਪੈਦਾ ਹੋਵੇਗਾ ਉਸ ਨੂੰ ਮੈਨੇਜ ਕੀਤਾ ਜਾ ਸਕਦਾ ਹੈ। ਝੇਂਗਫੇਈ ਨੇ ਕਿਹਾ ਕਿ ਜੇ ਬ੍ਰਿਟੇਨ ਨੂੰ ਸਾਡੇ 'ਤੇ ਭਰੋਸਾ ਹੈ ਤਾਂ ਇਹ ਦੂਸਰੇ ਦੇਸ਼ਾਂ ਨੂੰ ਵੀ ਹੋ ਸਕਦਾ ਹੈ। ਸਾਨੂੰ ਉਮੀਦ ਹੈ ਕਿ ਦੇਸ਼ ਸਮਝਣਗੇ ਕਿ ਹੁਵਾਵੇ ਖਤਰਾ ਨਹੀਂ ਮੌਕਾ ਹੈ।