ਜਗ੍ਰੇਬ, 20 ਫਰਵਰੀ (ਪੋਸਟ ਬਿਊਰੋ)- ਇਕ ਕ੍ਰੋਏਸ਼ੀਆਈ ਵਿਦਿਆਰਥਣ ਕਰੀਬ 18 ਸਾਲ ਪਹਿਲਾਂ ਭੇਦਭਰੇ ਢੰਗ ਨਾਲ ਲਾਪਤਾ ਹੋ ਗਈ ਸੀ। ਅਗਲੇ ਦਿਨੀਂ ਉਸ ਦੇ ਕਤਲ ਦੀ ਗੁੱਥੀ ਸੁਲਝਣ ਤੇ 18 ਸਾਲ ਤੋਂ ਦੱਬਿਆ ਰਾਜ਼ ਖੁੱਲ੍ਹਣ ਦੀ ਆਸ ਹੈ। ਅਸਲ ਵਿੱਚ ਪੁਲਸ ਨੂੰ ਫਰਿੱਜ ਵਿੱਚੋਂ ਇਕ ਲਾਸ਼ ਮਿਲੀ ਹੈ, ਜੋ 18 ਸਾਲ ਪੁਰਾਣੀ ਦੱਸੀ ਗਈ ਹੈ।
ਇਸ ਸੰਬੰਧ ਵਿੱਚ ਜਾਂਚ ਅਧਿਕਾਰੀਆਂ ਨੇ ਦੱਸਿਆ ਕਿ ਫਰਿੱਜ ਉੱਤਰੀ ਕ੍ਰੋਏਸ਼ੀਆ ਦੇ ਮਾਲਾ ਸੁਬੋਟਿਕਾ ਦੇ ਇਕ ਘਰ ਵਿੱਚ ਰੱਖੀ ਗਈ ਸੀ। ਇਸ ਵਿੱਚਲੀ ਲਾਸ਼ ਜੈਸਮੀਨਾ ਡੋਮੀਨਿਕ ਦੀ ਮੰਨੀ ਗਈ ਹੈ, ਜੋ 23 ਸਾਲ ਦੀ ਉਮਰ ਵਿੱਚ ਸਾਲ 2000 ਵਿੱਚ ਲਾਪਤਾ ਹੋ ਗਈ ਸੀ। ਡੋਮੀਨਿਕ ਉਸ ਸਮੇਂ ਜਗ੍ਰੇਬ ਵਿੱਚ ਪੜ੍ਹਦੀ ਸੀ। ਉਸ ਦੇ ਪਰਿਵਾਰ ਨੇ ਪੁਲਸ ਨੂੰ ਘਟਨਾ ਬਾਰੇ 5 ਸਾਲ ਬਾਅਦ ਦੱਸਿਆ ਸੀ। ਇਸ ਕੇਸ ਵਿੱਚ 45 ਸਾਲਾ ਔਰਤ ਨੂੰ ਮਾਲਾ ਸੁਬੋਟਿਕਾ ਤੋਂ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਸ ਨੇ ਕਿਹਾ ਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਫ੍ਰੀਜ਼ਰ ਵਿੱਚ ਪਈ ਲਾਸ਼ ਸਾਲ 1977 ਵਿੱਚ ਜੰਮੀ ਔਰਤ ਦੀ ਹੈ, ਜਿਸ ਦੇ ਲਾਪਤਾ ਹੋਣ ਦੀ ਜਾਣਕਾਰੀ 16 ਅਗਸਤ 2005 ਨੂੰ ਦਿੱਤੀ ਗਈ ਸੀ। ਉਨ੍ਹਾਂ ਨੇ ਇਸ ਕੇਸ ਦੀ ਹੋਰ ਜਾਣਕਾਰੀ ਦੇਣ ਤੋਂ ਇਨਕਾਰ ਕਰ ਦਿੱਤਾ ਹੈ।
ਸਥਾਨਕ ਮੀਡੀਆ ਦੇ ਮੁਤਾਬਕ ਗ੍ਰਿਫਤਾਰ ਕੀਤੀ ਗਈ ਔਰਤ ਮ੍ਰਿਤਕ ਕੁੜੀ ਦੀ ਭੈਣ ਹੈ। ਦੱਸਿਆ ਜਾਂਦਾ ਹੈ ਕਿ ਇਹ ਲਾਸ਼ ਉਸ ਦੇ ਘਰ ਵਿੱਚੋਂ ਮਿਲੀ ਹੈ, ਜਿੱਥੇ ਉਹ ਆਪਣੇ ਪਤੀ ਅਤੇ 3 ਬੱਚਿਆਂ ਨਾਲ ਰਹਿ ਰਹੀ ਸੀ। ਡੋਮਿਨਿਕ ਦੇ ਪਿਤਾ ਦੀ ਮੌਤ ਕੁਝ ਸਾਲ ਪਹਿਲਾਂ ਹੋ ਗਈ ਸੀ। ਉਨ੍ਹਾਂ ਨੇ ਸਾਲ 2011 ਵਿੱਚ ਕਿਹਾ ਸੀ ਕਿ ਉਨ੍ਹਾਂ ਦੀ ਧੀ ਨੇ ਸਾਲ 2000 ਵਿੱਚ ਦੱਸਿਆ ਸੀ ਕਿ ਉਸ ਦਾ ਇਰਾਦਾ ਕਰੂਜ਼ ਜਹਾਜ਼ ਵਿੱਚ ਕੰਮ ਕਰਨ ਦਾ ਹੈ।