* ਆਰ ਟੀ ਆਈ ਨਾਲ ਪਟਿਆਲੇ ਦਾ ਸਕੈਂਡਲ ਜ਼ਾਹਰ
ਪਟਿਆਲਾ, 20 ਫਰਵਰੀ (ਪੋਸਟ ਬਿਊਰੋ)- ਸਾਲ 2016 ਵਿੱਚ ਡੀ ਟੀ ਓ ਦਫਤਰ ਤੋਂ ਪਾਸ ਕੀਤੀਆਂ ਕਰੀਬ 179 ਗੱਡੀਆਂ ਦੇ ਫਾਰਮ 'ਤੇ ਡਿਸਟਿ੍ਰਕਟ ਟਰਾਂਸਪੋਰਟ ਅਫਸਰ ਦੇ ਦਸਤਖਤ ਫਰਜ਼ੀ ਹਨ। ਇਸ ਦਾ ਪਰਦਾ ਫਾਸ਼ ਟਰਾਂਸਪੋਰਟ ਡਿਪਾਰਟਮੈਂਟ ਵਿੱਚ ਪਾਈ ਇੱਕ ਆਰ ਟੀ ਆਈ ਅਰਜ਼ੀ ਨਾਲ ਹੋਇਆ ਹੈ। ਓਦੋਂ ਦੇ ਡੀ ਟੀ ਓ ਪਟਿਆਲਾ ਗੁਰਪ੍ਰੀਤ ਸਿੰਘ ਥਿੰਦ ਨੇ ਕਿਹਾ ਹੈ ਕਿ ਨੁਕਸ ਫਾਰਮ ਉੱਤੇ ਕੀਤੇ ਗਏ ਦਸਤਖਤ ਉਨ੍ਹਾਂ ਦੇ ਨਹੀਂ ਹਨ।
ਸਵਾਲ ਉਠਦਾ ਹੈ ਕਿ ਪੀ ਸੀ ਐੱਸ ਅਧਿਕਾਰੀ ਦੇ ਦਸਤਖਤ ਕਿਸ ਨੇ ਕੀਤੇ। ਕੇਸ ਸਾਹਮਣੇ ਆਉਣ ਦੇ ਬਾਅਦ ਵਿਭਾਗੀ ਅਧਿਕਾਰੀਆਂ ਵੱਲੋਂ ਕੋਈ ਕਾਰਵਾਈ ਵੀ ਨਹੀਂ ਕੀਤੀ ਗਈ। ਪਤਾ ਲੱਗਾ ਹੈ ਕਿ ਪਿੱਛੇ ਜਿਹੇ ਡੀ ਟੀ ਓ ਥਿੰਦ ਦਾ ਬਠਿੰਡਾ ਵਿੱਚ ਏ ਡੀ ਸੀ ਵਜੋਂ ਤਬਾਦਲਾ ਹੋ ਗਿਆ ਹੈ। ਆਰ ਟੀ ਆਈ ਐਕਟੀਵਿਸਟ ਮਨਜੀਤ ਸਿੰਘ ਨੇ ਡੀ ਟੀ ਓ ਦਫਤਰ ਤੋਂ ਸਾਲ 2016 ਵਿੱਚ ਪਾਸ ਹੋਈਆਂ ਗੱਡੀਆਂ ਦੇ ਬਾਰੇ 7075 ਤੋਂ ਲੈ ਕੇ 7254 ਨੰਬਰ ਤੱਕ ਦੇ ਦਸਤਾਵੇਜ਼ਾਂ ਦੀ ਜਾਣਕਾਰੀ ਮੰਗੀ ਸੀ। ਇਨ੍ਹਾਂ ਦਸਤਾਵੇਜ਼ਾਂ ਨਾਲ ਇੱਕ ਨੁਕਸ ਫਾਰਮ ਮੰਗਿਆ ਗਿਆ ਸੀ। ਨੁਕਸ ਫਾਰਮ 'ਤੇ ਤਤਕਾਲੀ ਡੀ ਟੀ ਓ ਗੁਰਪ੍ਰੀਤ ਸਿੰਘ ਥਿੰਦ ਦੇ ਦਸਤਖਤ ਸਨ। ਆਰ ਟੀ ਆਈ ਦੇ ਜਵਾਬ ਵਿੱਚ ਤਤਕਾਲੀ ਡੀ ਟੀ ਓ ਨੇ ਦੱਸਿਆ ਹੈ ਕਿ ਨੁਕਸ ਫਾਰਮ ਉੱਤੇੇ ਉਨ੍ਹਾਂ ਦੇ ਹਸਤਾਖਰ ਨਹੀਂ ਹਨ। ਆਰ ਟੀ ਆਈ ਵਿੱਚ ਇਹ ਜਾਣਕਾਰੀ ਵੀ ਮੰਗੀ ਗਈ ਕਿ ਦਸਤਖਤ ਕਰਨ ਵੇਲੇ ਡੀ ਟੀ ਓ ਨੇ ਖੁਦ ਗੱਡੀਆਂ ਚੈੱਕ ਕੀਤੀਆਂ ਜਾਂ ਨਹੀਂ। ਜਵਾਬ ਵਿੱਚ ਸਿਰਫ ਇਹੀ ਕਿਹਾ ਗਿਆ ਕਿ ਗੱਡੀਆਂ ਦੇ ਨੁਕਸ ਫਾਰਮ ਉੱਤੇ ਤਤਕਾਲੀ ਡੀ ਟੀ ਓ ਦੇ ਦਸਤਖਤ ਨਹੀਂ ਹਨ।