ਸੁਸ਼ਾਂਤ ਸਿੰਘ ਰਾਜਪੂਤ ਦੀ ਫਿਲਮ ‘ਸੋਨ ਚਿਰੱਈਆ’ ਰਿਲੀਜ਼ ਲਈ ਤਿਆਰ ਹੈ ਤੇ ਉਹ ਇਸ ਦੀ ਪ੍ਰਮੋਸ਼ਨ ਵਿੱਚ ਲੱਗਾ ਹੋਇਆ ਹੈ। ਇਸ ਦੌਰਾਨ ਉਹ ਮੀਡੀਆ ਦੇ ਸਵਾਲਾਂ ਦੇ ਜਵਾਬਾਂ ਦੇ ਨਾਲ-ਨਾਲ ਉਨ੍ਹਾਂ ਨੂੰ ਆਪਣੀਆਂ ਫੋਟੋਆਂ ਵੀ ਦੇ ਰਿਹਾ ਹੈ। ਉਹ ਲੰਬੇ ਸਮੇਂ ਤੋਂ ਨਿਰਦੇਸ਼ਕ ਅਭਿਸ਼ੇਕ ਚੌਬੇ ਨਾਲ ਕੰਮ ਕਰਨਾ ਚਾਹੁੰਦਾ ਸੀ। ਉਸ ਦਾ ਇਹ ਸੁਫਨਾ ਫਿਲਮ ‘ਸੋਨ ਚਿਰੱਈਆ’ ਨਾਲ ਪੂਰਾ ਹੋ ਚੁੱਕਾ ਹੈ। ਪੇਸ਼ ਹਨ ਉਸ ਨਾਲ ਇੱਕ ਗੱਲਬਾਤ ਦੇ ਕੁਝ ਅੰਸ਼ :
* ਫਿਲਮ ‘ਸੋਨ ਚਿਰੱਈਆ’ 'ਚ ਮੰਝੇ ਹੋਏ ਕਲਾਕਾਰਾਂ ਨਾਲ ਕੰਮ ਕਰਨ ਦਾ ਤਜਰਬਾ ਕਿਹੋ ਜਿਹਾ ਰਿਹਾ?
- ਇਸ ਫਿਲਮ ਵਿੱਚ ਬਹੁਤ ਵਧੀਆ ਐਕਟਰਸ ਹਨ। ਫਿਲਮ ਵਿੱਚ ਮੇਰਾ ਕਿਰਦਾਰ ਕਾਫੀ ਚੈਲੇਂਜਿੰਗ ਹੈ। ਇਸ ਫਿਲਮ ਵਿੱਚ ਮੇਰੀ ਪ੍ਰਫਾਰਮੈਂਸ ਅੱਜ ਤੱਕ ਦੀ ਮੇਰੀ ਬਿਹਤਰੀਨ ਪ੍ਰਫਾਰਮੈਂਸ ਹੈ। ਚੰਬਲ 'ਚ ਜਿਊਣਾ ਇੰਨਾ ਸੌਖਾ ਨਹੀਂ, ਪਰ ਜਦੋਂ ਤੁਹਾਨੂੰ ਸ਼ੂਟਿੰਗ ਲਈ ਵਧੀਆ ਲੋਕੇਸ਼ਨ ਮਿਲ ਜਾਂਦੀ ਹੈ ਤਾਂ ਤੁਹਾਡਾ ਅੱਧਾ ਕੰਮ ਖਤਮ ਹੋ ਜਾਂਦਾ ਹੈ। ਮੈਂ ਇਸ ਫਿਲਮ ਲਈ ਆਪਣਾ 100 ਫੀਸਦੀ ਦਿੱਤਾ ਹੈ। ਮੈਂ ਕਹਿ ਸਕਦਾ ਹਾਂ ਕਿ ਇਹ ਮੇਰੀ ਜ਼ਿੰਦਗੀ ਦੀ ਸਭ ਤੋਂ ਵਧੀਆ ਪ੍ਰਫਾਰਮੈਂਸ ਹੈ ਕਿਉਂਕਿ ਮੈਂ ਆਪਣੇ ਕਿਰਦਾਰ ਨੂੰ ਆਪਣੇ ਦਿਮਾਗ ਵਿੱਚ ਹਮੇਸ਼ਾ ਵਸਾ ਲੈਂਦਾ ਹਾਂ। ਇਥੋਂ ਤੱਕ ਕਿ ਮੈਂ ਆਪਣੇ ਦੋਸਤਾਂ ਤੋਂ ਵੀ ਦੂਰ ਹੋ ਜਾਂਦਾ ਹਾਂ। ਅਜਿਹੀ ਸਥਿਤੀ ਵਿੱਚ ਹੀ ਚੰਗਾ ਕੰਮ ਸੰਭਵ ਹੋ ਸਕਦਾ ਹੈ।
* ਇਸ ਫਿਲਮ ਵਿੱਚ ਕੰਮ ਕਰਨ ਦੌਰਾਨ ਮਨੋਜ ਵਾਜਪਾਈ ਨਾਲ ਤੁਸੀਂ ਉਨ੍ਹਾਂ ਦੀਆਂ ਡਾਕੂ ਵਾਲੀਆਂ ਫਿਲਮਾਂ ਜ਼ਿਕਰ ਤਾਂ ਕੀਤਾ ਹੋਵੇਗਾ?
- ਡਾਕੂ ਵਾਲੀਆਂ ਫਿਲਮਾਂ ਕਈ ਬਣੀਆਂ ਹਨ ਜਿਵੇਂ ‘ਬੈਂਡਿਟ ਕੁਈਨ’ ਆਦਿ, ਪਰ ਸੈਟ ਉਤੇ ਮੈਂ ਅਜਿਹੀਆਂ ਫਿਲਮਾਂ ਬਾਰੇ ਸੋਚਦਾ ਤਾਂ ਹਟ ਕੇ ਪ੍ਰਫਾਰਮੈਂਸ ਨਾ ਦੇ ਸਕਦਾ। ਇਸ ਲਈ ਸੈੱਟ 'ਤੇ ਮੈਂ ਮਨੋਜ ਸਰ ਨਾਲ ਉਨ੍ਹਾਂ ਫਿਲਮਾਂ ਬਾਰੇ ਗੱਲ ਨਹੀ ਕੀਤੀ। ਸ਼ੂਟਿੰਗ ਤੋਂ ਬਾਅਦ ਜਦੋਂ ਅਸੀਂ ਸੈੱਟ 'ਤੇ ਨਹੀਂ ਹੁੰਦੇ ਸੀ ਉਦੋਂ ਉਨ੍ਹਾਂ ਤੋਂ ਅਜਿਹੀਆਂ ਫਿਲਮਾਂ ਬਾਰੇ ਬਹੁਤ ਕੁਝ ਪੁੱਛਿਆ। ਉਨ੍ਹਾਂ ਨੇ ਮੈਨੂੰ ਬਹੁਤ ਚੰਗੀਆਂ ਗੱਲਾਂ ਦੱਸੀਆਂ।
* ਤੁਸੀਂ ਇਹ ਕਹਾਣੀ ਕਿਉਂ ਚੁਣੀ ਅਤੇ ਅਭਿਸ਼ੇਕ ਚੌਬੇ ਨਾਲ ਕੰਮ ਕਰਨ ਦਾ ਕੀ ਕਾਰਨ ਰਿਹਾ ਸੀ?
- ਮੇਰੇ ਲਈ ਕਹਾਣੀ ਦਾ ਮਹੱਤਵ ਬਹੁਤ ਜ਼ਿਆਦਾ ਹੈ। ਕਹਾਣੀ ਨਾ ਸਿਰਫ ਲੋਕਾਂ ਨੂੰ ਐਂਟਰਟੇਨ ਕਰੇਗੀ ਸਗੋਂ ਵੱਖਰੀ ਵੀ ਲੱਗੇਗੀ। ਸਕ੍ਰਿਪਟ ਪੜ੍ਹਨ ਤੋਂ ਬਾਅਦ ਮੈਨੂੰ ਫਿਲਮ ਦੀ ਕਹਾਣੀ ਅਤੇ ਆਪਣਾ ਕਿਰਦਾਰ ਦੋਵੇਂ ਚੰਗੇ ਲੱਗੇ। ਇਸ ਲਈ ਮੈਂ ਫਿਲਮ ਕਰਨ ਲਈ ਹਾਂ ਕਹਿ ਦਿੱਤੀ ਸੀ। ਜਦੋਂ ਉਨ੍ਹਾਂ ਨੇ ਮੈਨੂੰ ਫੋਨ ਕੀਤਾ ਤਾਂ ਮੇਰਾ ਮਨ ਖੁਸ਼ ਹੋ ਗਿਆ। ਜਿਵੇਂ ਹੀ ਉਨ੍ਹਾਂ ਨੇ ਕਹਾਣੀ ਦਾ ਪਹਿਲਾ ਪੰਨਾ ਮੈਨੂੰ ਸੁਣਾਇਆ ਤਾਂ ਮੈਂ ਝਟ ਹਾਂ ਕਹਿ ਦਿੱਤੀ।
* ਤੁਸੀਂ ਪਿੱਛੇ ਜਿਹੇ ਕਈ ਵਾਰ ਗਾਲ੍ਹਾਂ ਕੱਢਦਿਆਂ ਵੀ ਨਜ਼ਰ ਆਏ ਹੋ। ਕੀ ਕਹੋਗੇ?
- ਉਸ ਸਮੇਂ ਸ਼ਾਇਦ ਮੈਂ ਐਕਟਿੰਗ ਕਰ ਰਿਹਾ ਸੀ (ਹੱਸਦਿਆਂ)। ਅਸਲ 'ਚ ਹੁੰਦਾ ਕੀ ਹੈ ਕਿ ਤੁਸੀਂ ਆਪਣੇ ਬਾਰੇ ਬਹੁਤ ਕੁਝ ਪੜ੍ਹਦੇ ਤੇ ਦੇਖਦੇ ਹੋ, ਇਸ ਲਈ ਤੁਹਾਡਾ ਦਿਮਾਗ ਉਨ੍ਹਾਂ ਚੀਜ਼ਾਂ ਨਾਲ ਭਰਿਆ ਰਹਿੰਦਾ ਹੈ। ਇਹੀ ਕਾਰਨ ਹੈ ਕਿ ਜਦੋਂ ਕੋਈ ਉਲਟਾ-ਪੁਲਟਾ ਸਵਾਲ ਪੁੱਛਦਾ ਹੈ ਤਾਂ ਜਿਵੇਂ ਬੰਬ ਫੱਟ ਜਾਂਦਾ ਹੈ। ਅੱਜਕੱਲ੍ਹ ਮੈਂ ਬਹੁਤ ਆਮ ਤਰ੍ਹਾਂ ਦੇ ਸਵਾਲਾਂ ਦਾ ਜਵਾਬ ਦਿੰਦਾ ਹਾਂ, ਇਸ ਲਈ ਲੋਕ ਵੀ ਮੇਰੇ ਨਾਲ ਆਮ ਜਿਹੇ ਸਵਾਲ ਹੀ ਕਰਦੇ ਹਨ। ਉਂਝ ਕਈ ਵਾਰ ਸਿਚੁਏਸ਼ਨ ਵੀ ਅਜਿਹੀ ਹੋ ਜਾਂਦੀ ਹੈ ਕਿ ਤੁਸੀਂ ਕੁਝ ਵੀ ਬੋਲ ਦਿੰਦੇ ਹੋ।
* ਫਿਲਮ ‘ਕੇਦਾਰਨਾਥ’ 'ਚ ਸਾਰਾ ਅਲੀ ਖਾਨ ਦੀ ਬਹੁਤ ਤਾਰੀਫ ਹੋਈ ਸੀ। ਕੀ ਕਹਿਣਾ ਚਾਹੋਗੇ?
- ਚੰਗੀ ਗੱਲ ਹੈ। ‘ਕੇਦਾਰਨਾਥ' ਉਸ ਦੀ ਪਹਿਲੀ ਫਿਲਮ ਸੀ। ਮੈਨੂੰ ਇੰਡਸਟਰੀ 'ਚ 12 ਸਾਲਾਂ ਤੋਂ ਵੱਧ ਦਾ ਸਮਾਂ ਹੋ ਚੁੱਕਾ ਹੈ। ਅਜਿਹੇ ਵਿੱਚ ਸਾਰਾ ਦੀ ਤਾਰੀਫ ਤਾਂ ਬਣਦੀ ਹੈ। ਮੇਰੇ ਬਾਰੇ ਜ਼ਿਆਦਾ ਬੋਲਣਾ ਗਲਤ ਹੋਵੇਗਾ। ਮੈਂ ਖੁਸ਼ ਹਾਂ ਕਿ ਪਹਿਲੀ ਹੀ ਫਿਲਮ ਲਈ ਸਾਰਾ ਦੀ ਤਾਰੀਫ ਹੋਈ।
* ਪਿੱਛੇ ਜਿਹੇ ਜਦੋਂ ਅਸੀਂ ਅੰਕਿਤਾ ਲੋਖੰਡੇ ਨਾਲ ਮਿਲੇ ਸੀ ਤਾਂ ਉਨ੍ਹਾਂ ਨੇ ਕਿਹਾ ਸੀ ਕਿ ਉਨ੍ਹਾਂ ਨੂੰ ਤੁਹਾਡੇ ਨਾਲ ਕੰਮ ਕਰਨ ਵਿੱਚ ਕੋਈ ਇਤਰਾਜ਼ ਨਹੀਂ ਹੈ।
- ਉਸ ਦੀ ਫਿਲਮ ‘ਮਣੀਕਰਣਿਕਾ’ ਵਿੱਚ ਉਸ ਦੇ ਕੰਮ ਦੀ ਤਾਰੀਫ ਤਾਂ ਮੈਂ ਚੈਨਲ 'ਤੇ ਹੀ ਕਰ ਦਿੱਤੀ ਸੀ। ਜਿੱਥੋਂ ਤੱਕ ਇਕੱਠੇ ਕੰਮ ਕਰਨ ਦੀ ਗੱਲ ਹੈ, ਕੰਮ ਲਈ ਮੈਂ ਕਦੇ ਨਾਂਹ ਨਹੀਂ ਕਹਿ ਸਕਦਾ। ਮੈਂ ਕਿਸੇ ਨਾਲ ਵੀ ਕੰਮ ਕਰਨ ਲਈ ਤਿਆਰ ਹਾਂ। ਆਖਿਰ ਅਸੀਂ ਇਥੇ ਕੰਮ ਕਰਨ ਲਈ ਹੀ ਤਾਂ ਆਏ ਹਾਂ।