ਮੁੰਬਈ, 19 ਫਰਵਰੀ (ਪੋਸਟ ਬਿਊਰੋ)- ਮਹਾਰਾਸ਼ਟਰ ਦੇ ਠਾਣੇ ਜ਼ਿਲੇ ਦੇ ਕਲਿਆਣ ਇਲਾਕੇ ਵਿੱਚ ਲੋਕ ਓਦੋਂ ਹੈਰਾਨ ਰਹਿ ਗਏ, ਜਦ ਉਥੋਂ ਦੇ ਵਾਈ ਫਾਈ ਨੈਟਵਰਕ ਵਿੱਚ ਲਸ਼ਕਰ-ਏ-ਤਾਲਿਬਾਨ ਨਜ਼ਰ ਆਇਆ। ਇਹ ਨਾਮ ਤਦ ਨਜ਼ਰ ਆਉਂਦਾ ਸੀ, ਜਦ ਕੋਈ ਵਾਈ ਫਾਈ ਲਾਗ ਇਨ ਦੀ ਸਰਚਿੰਗ ਵਿੱਚ ਜਾਂਦਾ ਸੀ।
ਸੁਰੱਖਿਆ ਦੀ ਦਿ੍ਰਸ਼ਟੀ ਤੋਂ ਅਮ੍ਰਿਤ ਹੈਵਨ ਹਾਊਸਿੰਗ ਕੰਪਲੈਕਸ ਦੇ ਕੁਝ ਵਾਸੀਆਂ ਨੇ ਸੋਸ਼ਲ ਮੀਡੀਆ ਗਰੁੱਪ ਉੱਤੇ ਮੈਸੇਜ ਭੇਜਿਆ। ਇਸ ਉੱਤੇ ਕਾਲੋਨੀ ਦੇ ਲੋਕਾਂ ਨੇ ਇਸ ਮੁੱਦੇ 'ਤੇ ਬੈਠਕ ਕੀਤੀ ਅਤੇ ਇਸ ਕੇਸ ਨੂੰ ਪੁਲਸ ਕੋਲ ਲੈ ਗਏ। ਪੁਲਸ ਇਸ 'ਤੇ ਤੁਰੰਤ ਸਰਗਰਮ ਹੋ ਗਈ ਅਤੇ ਇਸ ਲਾਗ ਇਨ ਦੇ ਬਾਰੇ ਜਾਂਚ ਵਿੱਚ ਪਤਾ ਲੱਗਾ ਕਿ ਗੁਆਂਢ ਦੇ ਕੰਪਲੈਕਸ ਵਿੱਚ ਇਹ ਵਾਈ ਫਾਈ ਨੈਟਵਰਕ ਕੰਮ ਕਰ ਰਿਹਾ ਸੀ। ਇਸ ਦਾ ਪਤਾ ਲੱਗਦੇ ਹੀ ਪੁਲਸ ਫਲੈਟ ਮਾਲਕ ਅਤੇ ਉਸ ਦੇ ਬੇਟੇ ਨੂੰ ਚੁੱਕ ਕੇ ਲੈ ਗਈ। ਥਾਣੇ ਵਿੱਚ ਫਲੈਟ ਮਾਲਕ ਦੇ ਬੇਟੇ ਨੇ ਇਹ ਮੰਨਿਆ ਕਿ ਉਸੇ ਨੇ ਆਪਣੇ ਵਾਈ ਫਾਈ ਲਾਗ ਇਨ ਦਾ ਨਾਮ ਅੱਤਵਾਦੀ ਸੰਗਠਨ ਦੇ ਨਾਮ ਉੱਤੇ ਰੱਖਿਆ ਸੀ। ਜਦ ਲੜਕੇ ਤੋਂ ਇਸ ਦੇ ਬਾਰੇ ਸਵਾਲ ਕੀਤਾ ਗਿਆ ਤਾਂ ਉਸ ਨੇ ਕਿਹਾ ਕਿ ਕੁਝ ਯੂਨੀਕ ਕਰਨ ਲਈ ਉਸ ਨੇ ਅਜਿਹਾ ਕੀਤਾ। ਪੁਲਸ ਦੇ ਸਮਝਾਉਣ 'ਤੇ ਉਸ ਨੇ ਵਾਈ ਫਾਈ ਲਾੱਗਿਨ ਦਾ ਨਾਮ ਬਦਲਣ ਦੀ ਗੱਲ ਕਹੀ।