ਪਟਨਾ, 19 ਫਰਵਰੀ (ਪੋਸਟ ਬਿਊਰੋ)- ਬਿਹਾਰ ਦੀ ਪਟਨਾ ਹਾਈ ਕੋਰਟ ਨੇ ਵੱਡਾ ਫੈਸਲਾ ਦਿੱਤਾ ਹੈ ਕਿ ਬਿਹਾਰ ਦੇ ਸਾਰੇ ਸਾਬਕਾ ਮੁੱਖ ਮੰਤਰੀਆਂ ਨੂੰ ਸਰਕਾਰੀ ਘਰ ਖਾਲੀ ਕਰਨੇ ਹੋਣਗੇ। ਉਨ੍ਹਾਂ ਦੀ ਸਾਰੀ ਉਮਰ ਸਰਕਾਰੀ ਬੰਗਲੇ ਵਾਲੀ ਸਹੂਲਤ ਖਤਮ ਕਰਨ ਦੀ ਮੰਗ ਉੱਤੇ ਸੁਣਵਾਈ ਕਰਦੇ ਹੋਏ ਕੋਰਟ ਨੇ ਇਹ ਫੈਸਲਾ ਰਾਖਵਾਂ ਰੱਖਿਆ ਸੀ, ਜਿਸ ਉੱਤੇ ਅੱਜ ਕੋਰਟ ਵੱਲੋਂ ਚੀਫ ਜਸਟਿਸ ਏ ਪੀ ਸ਼ਾਹੀ ਦੇ ਬੈਂਚ ਨੇ ਇਹ ਫੈਸਲਾ ਸੁਣਾਇਆ ਹੈ
ਇਸ ਫੈਸਲੇ ਦੇ ਬਾਅਦ ਕਈ ਸਾਬਕਾ ਮੁੱਖ ਮੰਤਰੀਆਂ ਤੋਂ ਬੰਗਲੇ ਵਾਪਸ ਲੈ ਲਏ ਜਾਣਗੇ। ਰਾਜ ਸਰਕਾਰ ਨੇ ਸਾਰੇ ਸਾਬਕਾ ਮੁੱਖ ਮੰਤਰੀਆਂ ਨੂੰ ਇਹ ਸਹੂਲਤ ਦੇ ਰੱਖੀ ਸੀ। ਇਸ ਦੇ ਨਾਲ ਸਰਕਾਰੀ ਬੰਗਲੇ ਵਿਚ ਬੇਹੱਦ ਖਰਚ ਕਰਨ ਦੀ ਛੋਟ ਨੂੰ ਹਾਈ ਕੋਰਟ ਨੇ ਗੈਰ ਸੰਵਧਾਨਿਕ ਐਲਾਨ ਕਰ ਦਿੱਤਾ ਤੇ ਕਿਹਾ ਹੈ ਕਿ ਜਨਤਾ ਦੇ ਪੈਸੇ ਨਾਲ ਆਰਾਮ ਤਲਬੀ ਨਹੀਂ ਚੱਲੇਗੀ। ਅਦਾਲਤ ਨੇ ਕਿਹਾ ਹੈ ਕਿ ਐਮ ਐਲ ਏ ਅਤੇ ਐਮ ਐਲ ਸੀ ਦੀ ਹੈਸੀਅਤ ਵਿੱਚ ਉਹ ਫਲੈਟ ਰੱਖ ਸਕਦੇ ਹਨ, ਪਰ ਸਾਬਕਾ ਮੁੱਖ ਮੰਤਰੀ ਦੀ ਹੈਸੀਅਤ ਵਿੱਚ ਮਿਲਿਆ ਬੰਗਲਾ ਛੱਡਣਾ ਹੋਵੇਗਾ।
ਪਟਨਾ ਹਾਈ ਕੋਰਟ ਦੇ ਇਸ ਫੈਸਲੇ ਨਾਲ ਕਈ ਸਾਬਕਾ ਮੁੱਖ ਮੰਤਰੀਆਂ ਨੂੰ ਸਰਕਾਰੀ ਘਰ ਛੱਡਣੇ ਪੈ ਜਾਣੇ ਹਨ, ਜਿਨ੍ਹਾਂ ਵਿਚ ਲਾਲੂ ਪ੍ਰਸਾਦ ਯਾਦਵ, ਰਾਬੜੀ ਦੇਵੀ, ਸਤੀਸ਼ ਪ੍ਰਸਾਦ ਸਿੰਘ, ਡਾਕਟਰ ਜਗਨਨਾਥ ਮਿਸ਼ਰਾ ਅਤੇ ਜੀਤਨ ਰਾਮ ਮਾਂਝੀ ਸ਼ਾਮਲ ਹਨ। ਇਨ੍ਹਾਂ ਸਾਰਿਆਂ ਨੂੰ ਆਪਣਾ ਸਰਕਾਰੀ ਘਰ ਛੱਡਣਾ ਪਵੇਗਾ।