ਚੰਡੀਗੜ੍ਹ, 19 ਫਰਵਰੀ, (ਪੋਸਟ ਬਿਊਰੋ)- ਪੁਲਵਾਮਾ ਵਿਚ ਹੋਏ ਅੱਤਵਾਦੀ ਹਮਲੇ ਬਾਰੇ ਪਾਕਿਸਤਾਨੀ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਦੇ ਬਿਆਨ ਉੱਤੇ ਭਾਰਤੀ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਮੋੜਵਾਂ ਵਾਰ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਇਮਰਾਨ ਖ਼ਾਨ ਜੇ ਪੁਲਵਾਮਾ ਹਮਲੇ ਦੇ ਦੋਸ਼ੀਆਂ ਨੂੰ ਫੜਨ ਦੀ ਗੱਲ ਕਰਦਾ ਹੈ ਤਾਂ ਬਹਾਵਲਪੁਰ ਵਿਚ ਉਸ ਕੋਲ ਜੈਸ਼-ਏ-ਮੁਹੰਮਦ ਦਾ ਸਰਗਣਾ ਮਸੂਦ ਅਜ਼ਹਰ ਬੈਠਾ ਹੈ, ਉਸ ਨੂੰ ਜਾ ਕੇ ਫੜੇ।
ਇਮਰਾਨ ਖ਼ਾਨ ਦੇ ਇਸਲਾਮਾਬਾਦ ਵਿਚ ਦਿੱਤੇ ਬਿਆਨ ਤੋਂ ਬਾਅਦ ਕੈਪਟਨ ਅਮਰਿੰਦਰ ਸਿੰਘ ਨੇ ਚੰਡੀਗੜ੍ਹ ਵਿਚ ਇਸ ਉੱਤੇ ਪ੍ਰਤੀਕਿਰਿਆ ਲਈ ਇਮਰਾਨ ਨੂੰ ਸੰਬੋਧਨ ਕਰ ਕੇ ਟਵੀਟ ਕੀਤਾ। ਇਸ ਵਿਚ ਉਨ੍ਹਾਂ ਇਮਰਾਨ ਖ਼ਾਨ ਨੂੰ ਟੈਗ ਕਰ ਕੇ ਲਿਖਿਆ ਹੈ, ‘ਤੁਹਾਡੇ ਕੋਲ ਬਹਾਵਲਪੁਰ ਵਿਚ ਜੈਸ਼-ਇ-ਮੁਹੰਮਦ ਦਾ ਮੁਖੀ ਮਸੂਦ ਅਜ਼ਹਰ ਬੈਠਾ ਹੈ ਅਤੇ ਆਈ ਐੱਸ ਆਈ ਦੀ ਮਦਦ ਨਾਲ ਭਾਰਤ ਵਿਚ ਅੱਤਵਾਦੀ ਹਮਲੇ ਕਰਵਾ ਰਿਹਾ ਹੈ, ਜਾਓ ਉਸ ਨੂੰ ਓਥੋਂ ਚੁੱਕੋ। ਜੇ ਤੁਸੀਂ ਸਾਨੂੰ ਇਸ ਬਾਰੇ ਨਹੀਂ ਦੱਸ ਸਕਦੇ ਤੇ ਉਸ ਨੂੰ ਹੱਥ ਨਹੀਂ ਪਾ ਸਕਦੇ ਤਾਂ ਤੁਹਾਡੇ ਲਈ ਇਹ ਅਸੀਂ ਕਰਾਂਗੇ।`
ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਇਮਰਾਨ ਖ਼ਾਨ ਪੁਲਵਾਮਾ ਹਮਲੇ ਦੇ ਸਬੂਤਾਂ ਦੀ ਗੱਲ ਕਰਦੇ ਹਨ, ਇਨ੍ਹਾਂ ਸਾਲਾਂ ਦੌਰਾਨ ਮੁੰਬਈ ਦੇ ਹਮਲੇ ਦੇ ਸਬੂਤਾਂ ਬਾਰੇ ਪਾਕਿਸਤਾਨ ਨੇ ਕੀ ਕੀਤਾ, ਅੱਜ ਇਸ ਉੱਤੇ ਵੀ ਚਰਚਾ ਕਰਨ ਦਾ ਸਮਾਂ ਆ ਗਿਆ ਹੈ। ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਜੈਸ਼ ਤੇ ਅਜ਼ਹਰ ਮਸੂਦ ਨੂੰ ਆਈ ਐੱਸ ਆਈ ਚਲਾ ਰਹੀ ਹੈ ਅਤੇ ਆਈ ਐੱਸ ਆਈ ਨੂੰ ਪਾਕਿਸਤਾਨੀ ਫ਼ੌਜ ਦਾ ਮੁਖੀ ਜਨਰਲ ਕਮਰ ਅਹਿਮਦ ਬਾਜਵਾ ਚਲਾਉਂਦਾ ਹੈ ਅਤੇ ਇਮਰਾਨ ਖ਼ਾਨ ਨੂੰ ਵੀ ਜਨਰਲ ਬਾਜਵਾ ਨੇ ਪ੍ਰਧਾਨ ਮੰਤਰੀ ਬਣਾਇਆ ਹੈ। ਇਸ ਲਈ ਇਮਰਾਨ ਖ਼ਾਨ ਦੀਆਂ ਗੱਲਾਂ ਤੇ ਅੱਤਵਾਦੀਆਂ ਨਾਲ ਪਾਕਿ ਸਰਕਾਰ ਦੇ ਰਿਸ਼ਤੇ ਨੂੰ ਆਸਾਨੀ ਨਾਲ ਸਮਝਿਆ ਜਾ ਸਕਦਾ ਹੈ।