ਨਵੀਂ ਦਿੱਲੀ, 19 ਫਰਵਰੀ, (ਪੋਸਟ ਬਿਊਰੋ)- ਜੰਮੂ-ਕਸ਼ਮੀਰ ਦੇ ਪੁਲਵਾਮਾ ਵਿੱਚ ਅੱਤਵਾਦੀ ਹਮਲੇ ਵਿਚ ਸੀ ਆਰ ਪੀ ਐੱਫ ਦੇ ਚਾਲੀ ਦੇ ਕਰੀਬ ਜਵਾਨ ਮਾਰੇ ਜਾਣ ਪਿੱਛੋਂ ਸੋਮਵਾਰ ਅੱਤਵਾਦੀਆਂ ਨਾਲ ਮੁਕਾਬਲੇ ਵਿਚ ਚਾਰ ਹੋਰ ਫ਼ੌਜੀ ਮਾਰੇ ਗਏ ਤਾਂ ਇਸ ਦੌਰਾਨ ਫ਼ੌਜ ਨੇ ਤਿੰਨ ਅੱਤਵਾਦੀ ਵੀ ਮਾਰੇ ਹਨ। ਇਸ ਬਾਰੇ ਭਾਰਤੀ ਫ਼ੌਜ, ਸੀ ਆਰ ਪੀ ਐੱਫ ਅਤੇ ਜੰਮੂ-ਕਸ਼ਮੀਰ ਪੁਲਿਸ ਨੇ ਅੱਜ ਸਵੇਰੇ ਸਾਂਝੀ ਪ੍ਰੈੱਸ ਕਾਨਫਰੰਸ ਕੀਤੀ ਹੈ, ਜਿਸ ਵਿੱਚ ਅੱਤਵਾਦ ਛੱਡ ਕੇ ਮੁੱਖ ਧਾਰਾ ਨੂੰ ਆਉਣ ਦੀ ਅਪੀਲ ਦੇ ਨਾਲ ਇਹ ਵੀ ਸਾਫ ਕਹਿ ਦਿੱਤਾ ਹੈ ਕਿ ਜਿਸ ਨੇ ਬੰਦੂਕ ਉਠਾਈ, ਮਾਰਿਆ ਜਾਵੇਗਾ।
ਇਸ ਸੰਬੰਧ ਵਿੱਚ ਸੀ ਆਰ ਪੀ ਐੱਫ ਦੇ ਆਈ ਜੀ ਆਪ੍ਰੇਸ਼ਨ ਜੁਲਫਕਾਰ ਹਸਨ ਨੇ ਕਿਹਾ: ਸਾਡੀ ਹੈਲਪਲਾਈਨ 14411 ਇਸ ਅੱਤਵਾਦੀ ਹਮਲੇ ਬਾਰੇ ਦੇਸ਼ ਵਿੱਚ ਕਿਸੇ ਵੀ ਥਾਂ ਰਹਿੰਦੇ ਕਸ਼ਮੀਰੀ ਲੋਕਾਂ ਨੂੰ ਮਦਦ ਕਰ ਰਹੀ ਹੈ। ਭਾਰਤ ਦੇ ਕਈ ਰਾਜਾਂ ਵਿੱਚ ਕਸ਼ਮੀਰੀ ਵਿਦਿਆਰਥੀਆਂ ਨੇ ਸਾਥੋਂ ਮਦਦ ਮੰਗੀ ਤੇ ਅਸੀਂ ਕੀਤੀ ਹੈ। ਕਸ਼ਮੀਰ ਤੋਂ ਬਾਹਰ ਪੜ੍ਹਦੇ ਵਿਦਿਆਰਥੀਆਂ ਦੀ ਸੁਰੱਖਿਆ ਦਾ ਖਾਸ ਧਿਆਨ ਰੱਖ ਰਹੇ ਹਾਂ। ਉਨ੍ਹਾਂ ਦੇ ਨਾਲ ਬੈਠੇ ਜੰਮੂ-ਕਸ਼ਮੀਰ ਪੁਲਸ ਦੇ ਆਈ ਜੀ, ਐੱਸ ਪੀ ਪਾਨੀ ਨੇ ਕਿਹਾ: ਅੱਤਵਾਦੀਆਂ ਦੀ ਭਰਤੀ ਵਿਚ ਕਮੀ ਆਈ ਹੈ। ਪਿਛਲੇ ਤਿੰਨ ਮਹੀਨਿਆਂ ਵਿਚ ਉਨ੍ਹਾਂ ਦੀ ਕੋਈ ਭਰਤੀ ਨਹੀਂ ਹੋਈ। ਇਸ ਵਿਚ ਕਸ਼ਮੀਰ ਦੇ ਲੋਕ ਮਹੱਤਵ ਪੂਰਨ ਭੂਮਿਕਾ ਨਿਭਾ ਰਹੇ ਹਨ। ਸਾਡੀ ਪਰਿਵਾਰਾਂ ਨੂੰ ਬੇਨਤੀ ਹੈ ਕਿ ਉਹ ਅੱਤਵਾਦੀਆਂ ਦੀ ਭਰਤੀ ਰੋਕਣ ਵਿਚ ਹੋਰ ਭੂਮਿਕਾ ਨਿਭਾਉਣ।
ਉਨ੍ਹਾਂ ਦੋਵਾਂ ਨਾਲ ਪ੍ਰੈੱਸ ਕਾਨਫਰੰਸ ਵਿਚ ਮੌਜੂਦ ਭਾਰਤੀ ਫ਼ੌਜ ਦੇ ਲੈਫਟੀਨੈਂਟ ਜਨਰਲ ਕੇ ਜੇ ਐੱਸ ਢਿਲੋਂ ਨੇ ਇਸ ਮੌਕੇ ਕਸ਼ਮੀਰ ਵਿਚ ਨੌਜਵਾਨਾਂ ਦੀਆਂ ਮਾਵਾਂ ਨੂੰ ਆਪਣੇ ਪੁੱਤਰਾਂ ਨੂੰ ਬੰਦੂਕ ਦਾ ਰਾਹ ਛੱਡਣ ਦੀ ਅਪੀਲ ਕੀਤੀ ਅਤੇ ਕਿਹਾ: ‘ਕਸ਼ਮੀਰ ਵਿਚ ਕਿੰਨੇ ਗਾਜ਼ੀ ਆਏ ਤੇ ਕਿੰਨੇ ਚਲੇ ਗਏ। ਕਸ਼ਮੀਰੀ ਨੌਜਵਾਨਾਂ ਦੀਆਂ ਮਾਵਾਂ ਨੂੰ ਸਾਡੀ ਅਪੀਲ ਹੈ, ਆਪਣੇ ਪੁੱਤਰਾਂ ਨੂੰ ਸਮਝਾਓ ਕਿ ਘਰ ਮੁੜ ਆਉਣ। ਅਸੀਂ ਕਿਸੇ ਨਾਗਰਿਕ ਨੂੰ ਨੁਕਸਾਨ ਨਹੀਂ ਪੁਚਾਉਣਾ ਚਾਹੁੰਦੇ, ਪਰ ਜੋ ਬੰਦੂਕ ਚੁੱਕੇਗਾ, ਉਸ ਨੂੰ ਮਾਰ ਮੁਕਾਵਾਂਗੇ। ਅਸੀਂ ਪੁਲਵਾਮਾ ਮੁਕਾਬਲੇ ਦੇ ਤਿੰਨ ਅੱਤਵਾਦੀ ਮਾਰ ਦਿੱਤੇ ਹਨ। ਜੈਸ਼-ਏ-ਮੁਹੰਮਦ ਨੂੰ ਆਈ ਐੱਸ ਆਈ ਕੰਟਰੋਲ ਕਰਦੀ ਹੈ। ਪੁਲਵਾਮਾ ਦੇ ਪਿੱਛੋਂ ਹੋਏ ਐੱਨਕਾਉਂਟਰ ਵਿਚ ਅਸੀਂ ਇਹ ਖ਼ਾਸ ਖ਼ਿਆਲ ਰੱਖਿਆ ਕਿ ਕਿਸੇ ਆਮ ਨਾਗਰਿਕ ਦਾ ਜਾਨੀ ਨੁਕਸਾਨ ਨਾ ਹੋਵੇ। ਸਾਡੀ ਲੋਕਾਂ ਨੂੰ ਅਪੀਲ ਹੈ ਕਿ ਐਨਕਾਉਂਟਰ ਦੀ ਜਗ੍ਹਾ ਨਾ ਜਾਣ, ਕਿਉਂਕਿ ਕ੍ਰਾਸ ਫਾਇਰ ਵਿਚ ਗੋਲੀ ਲੱਗਣ ਨਾਲ ਜਾਨੀ ਨੁਕਸਾਨ ਹੋ ਸਕਦਾ ਹੈ।’ ਉਨ੍ਹਾਂ ਦੱਸਿਆ ਕਿ ਸੋਮਵਾਰ ਪੁਲਵਾਮਾ ਵਿਚ ਹੋਏ ਮੁਕਾਬਲੇ ਵਿਚ ਜ਼ਖ਼ਮੀ ਹੋਏ ਬ੍ਰਿਗੇਡੀਅਰ ਹਰਦੀਪ ਸਿੰਘ ਛੁੱਟੀ ਉੱਤੇ ਸਨ। ਅੱਤਵਾਦੀਆਂ ਦੇ ਖ਼ਿਲਾਫ਼ ਚੱਲਦੇ ਆਪ੍ਰੇਸ਼ਨ ਦਾ ਜਦੋਂ ਉਨ੍ਹਾਂ ਨੂੰ ਪਤਾ ਲੱਗਾ ਤਾਂ ਛੁੱਟੀ ਵਿਚਾਲੇ ਛੱਡ ਕੇ ਆਪ੍ਰੇਸ਼ਨ ਵਿਚ ਸ਼ਾਮਲ ਹੋਏ। ਉਨ੍ਹਾਂ ਕਿਹਾ ਕਿ ਸਿਰਫ ਸੌ ਘੰਟਿਆਂ ਵਿਚ ਜੈਸ਼ ਦੇ ਅੱਤਵਾਦੀਆਂ ਨੂੰ ਮਾਰ ਦਿੱਤਾ ਗਿਆ ਹੈ।