*ਸੀਰੀਆ ਤੋਂ ਆਇਆ ਸੀ ਰਫਿਊਜੀ ਪਰਿਵਾਰ
ਹੈਲੀਫੈਕਸ, 19 ਫਰਵਰੀ (ਪੋਸਟ ਬਿਊਰੋ) : ਹੈਲੀਫੈਕਸ ਵਿੱਚ ਇੱਕ ਘਰ ਨੂੰ ਲੱਗੀ ਅੱਗ ਕਾਰਨ ਜਿੱਥੇ ਸੱਤ ਬੱਚਿਆਂ ਦੀ ਮੌਤ ਹੋ ਗਈ ਉੱਥੇ ਹੀ ਉਨ੍ਹਾਂ ਦੇ ਪਿਤਾ ਦੀ ਹਾਲਤ ਨਾਜ਼ੁਕ ਬਣੀ ਹੋਈ ਹੈ। ਇਹ ਪਰਿਵਾਰ 2017 ਵਿੱਚ ਰਫਿਊਜੀਆਂ ਵਜੋਂ ਸੀਰੀਆ ਤੋਂ ਕੈਨੇਡਾ ਆਇਆ ਸੀ।
ਅੱਗ ਮੰਗਲਵਾਰ ਰਾਤ 12:30 ਵਜੇ ਲੱਗੀ ਤੇ ਜਲਦ ਹੀ ਨਵੇਂ ਬਣੇ ਇਸ ਘਰ ਨੂੰ ਅੱਗ ਨੇ ਆਪਣੀ ਚਪੇਟ ਵਿੱਚ ਲੈ ਲਿਆ। ਗੁਆਂਢੀਆਂ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਜੋ਼ਰਦਾਰ ਧਮਾਕਾ ਵੀ ਸੁਣਾਈ ਦਿੱਤਾ। ਡੈਨੀਅਲ ਬਰਟ, ਜੋ ਕਿ ਇਸ ਘਰ ਦੇ ਨੇੜੇ ਹੀ ਰਹਿੰਦੀ ਹੈ, ਨੇ ਦੱਸਿਆ ਕਿ ਉਸ ਨੇ ਕਿਸੇ ਮਹਿਲਾ ਦੇ ਚੀਕਣ ਦੀ ਆਵਾਜ਼ ਸੁਣੀ ਤੇ ਉਹ ਇੱਕਦਮ ਜਾਗ ਗਈ। ਉਨ੍ਹਾਂ ਦੱਸਿਆ ਕਿ ਘਰ ਦੇ ਪਿਛਲੇ ਦਰਵਾਜ਼ੇ ਵਿੱਚੋਂ, ਪਿਛਲੀਆਂ ਖਿੜਕੀਆਂ ਵਿੱਚੋਂ ਤੇ ਸਾਰੇ ਪਾਸਿਆਂ ਤੋਂ ਅੱਗ ਦੀਆਂ ਲਪਟਾਂ ਨਿਕਲ ਰਹੀਆਂ ਸਨ। ਬਰਟ ਨੇ ਦੱਸਿਆ ਕਿ ਘਰ ਵਿੱਚ ਰਹਿਣ ਵਾਲੀ ਮਹਿਲਾ ਜ਼ਮੀਨ ਉੱਤੇ ਸਿਰ ਝੁਕਾਅ ਕੇ ਬੈਠੀ ਸੀ ਤੇ ਇੰਜ ਲੱਗ ਰਿਹਾ ਸੀ ਜਿਵੇਂ ਪ੍ਰਾਰਥਨਾ ਕਰ ਰਹੀ ਹੋਵੇ। ਫਿਰ ਉਸ ਨੇ ਉਨ੍ਹਾਂ ਨੂੰ 911 ਉੱਤੇ ਕਾਲ ਕਰਨ ਲਈ ਆਖਿਆ।
ਉਸ ਨੇ ਹੀ ਦੱਸਿਆ ਕਿ ਉਸ ਦੇ ਬੱਚੇ ਅੰਦਰ ਹਨ ਤੇ ਉਸ ਦਾ ਪਤੀ ਵੀ ਅੰਦਰ ਹੀ ਪੌੜੀਆਂ ਉੱਤੇ ਬੈਠਾ ਹੈ। ਉਸ ਦਾ ਪਤੀ ਅੰਦਰ ਗਿਆ ਹੋਵੇਗਾ ਕਿਉਂਕਿ ਉਹ ਕਾਫੀ ਸੜ ਚੁੱਕਿਆ ਸੀ। ਇਸ ਸਮੇਂ 39 ਸਾਲਾ ਪਿਤਾ ਇਬ੍ਰਾਹਿਮ ਬਾਰਹੋ ਤੇ 40 ਸਾਲਾ ਮਾਂ ਕਾਅਥਾਰ ਅਲ ਹਮਦ ਹਸਪਤਾਲ ਵਿੱਚ ਹਨ। ਬਾਰਹੋ ਝੁਲਸ ਜਾਣ ਕਾਰਨ ਜਿ਼ੰਦਗੀ ਤੇ ਮੌਤ ਦੀ ਲੜਾਈ ਲੜ ਰਿਹਾ ਹੈ ਜਦਕਿ ਅਲ ਹਮਦ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਦੱਸੀਆਂ ਜਾਂਦੀਆਂ ਹਨ। ਮਰਨ ਵਾਲੇ ਸੱਤ ਬੱਚਿਆਂ ਦੇ ਨਾਂ ਤੇ ਉਮਰ ਅੱਗੇ ਲਿਖੇ ਅਨੁਸਾਰ ਹਨ: ਅਹਿਮਦ ਬਾਰਹੋ (14 ਸਾਲ), ਰੋਲਾ ਬਾਰਹੋ (12 ਸਾਲ), ਮੁਹੰਮਦ ਬਾਰਹੋ (10 ਸਾਲ), ਘਾਲਾ ਬਾਰਹੋ (8 ਸਾਲ), ਹਾਲਾ ਬਾਰਹੋ (3 ਸਾਲ), ਰਾਣਾ ਬਾਰਹੋ (2 ਸਾਲ), ਅਬਦੁੱਲਾਹ ਬਾਰਹੋ (3 ਮਹੀਨੇ)।
ਹੈਲੀਫੈਕਸ ਫਾਇਰ ਡਿਪਟੀ ਚੀਫ ਡੇਵ ਮੈਲਡਰੰਮ ਨੇ ਦੱਸਿਆ ਕਿ ਇਸ ਤਰ੍ਹਾਂ ਦੀ ਅੱਗ ਉਨ੍ਹਾਂ ਆਪਣੀ ਜਿ਼ੰਦਗੀ ਵਿੱਚ ਕਦੇ ਨਹੀਂ ਵੇਖੀ। ਉਨ੍ਹਾਂ ਅੱਗ ਲੱਗਣ ਦੇ ਕਾਰਨਾਂ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ। ਇਹ ਵੀ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਇਸ ਘਰ ਵਿੱਚ ਨੈਚੂਰਨ ਗੈਸ ਦੀ ਸਪਲਾਈ ਸੀ।