ਫਿਰੋਜ਼ਪੁਰ, 19 ਫਰਵਰੀ (ਪੋਸਟ ਬਿਊਰੋ)- 15 ਲੱਖ ਰੁਪਏ ਦੀ ਰਿਕਵਰੀ ਕਰਨ ਗਈ ਬੈਂਕ ਟੀਮ ਨੇ ਪੁਲਸ ਅਤੇ ਤਹਿਸੀਲਦਾਰ ਦੀ ਮੌਜੂਦਗੀ ਵਿੱਚ 84 ਸਾਲਾ ਬਜ਼ੁਰਗ ਮਹਿਲਾ ਸਮੇਤ ਪਰਵਾਰ ਨੂੰ ਘਰ ਦੇ ਅੰਦਰ ਬੰਦ ਕਰ ਕੇ ਗੇਟ 'ਤੇ ਤਾਲਾ ਲਗਾ ਕੇ ਸੀਲ ਲਾ ਦਿੱਤੀ।
ਧਵਨ ਮਾਰਕੀਟ ਨੇੜੇ ਟਰੱਕ ਯੂਨੀਅਨ ਵਿੱਚ ਪ੍ਰੀਤ ਆਟੋ ਪਾਰਟਸ ਦੀ ਦੁਕਾਨ ਚਲਾਉਣ ਵਾਲੇ ਹਰਜੀਤ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੇ ਘਰ ਗਿਰਵੀ ਰੱਖਕੇ ਕੇਨਰਾ ਬੈਂਕ ਤੋਂ ਕਰਜ਼ਾ ਲਿਆ ਸੀ। ਨੋਟਬੰਦੀ ਕਾਰਨ ਕੰਮਕਾਜ ਬਹੁਤ ਘੱਟ ਹੋ ਗਿਆ। ਇਸ ਕਾਰਨ ਉਹ ਬੈਂਕ ਦਾ ਕਰਜ਼ਾ ਮੋੜ ਨਹੀਂ ਸਕੇ, ਜਿਸ ਤੋਂ ਬੈਂਕ ਉਨ੍ਹਾਂ ਦੇ ਘਰ 'ਤੇ ਕਬਜ਼ਾ ਕਰਨਾ ਚਾਹੁੰਦਾ ਸੀ। ਬੈਂਕ ਵੱਲੋਂ ਦੱਸਿਆ ਜਾ ਰਿਹਾ ਹੈ ਕਿ ਬੈਂਕ ਦਾ ਕਰਜ਼ਾ ਅਦਾ ਕਰਨ ਲਈ 60 ਦਿਨ ਦਾ ਨੋਟਿਸ 28 ਮਾਰਚ 2017 ਨੂੰ ਦਿੱਤਾ ਗਿਆ ਸੀ, ਪਰ ਪਾਰਟੀ ਨੇ ਬੈਂਕ ਦਾ ਕਰਜ਼ਾ ਵਾਪਸ ਨਹੀਂ ਕੀਤਾ। ਇਸ ਦੇ ਬਾਅਦ ਬਾਕੀ ਰਸਮੀ ਕਾਰਵਾਈ ਦੇ ਬਾਅਦ ਬੈਂਕ ਨੇ ਸ਼ਾਂਤੀ ਪੂਰਨ ਢੰਗ ਨਾਲ ਘਰ 'ਤੇ ਕਬਜ਼ਾ ਕਰਨ ਲਈ ਪੁਲਸ ਤੋਂ ਸੁਰੱਖਿਆ ਮੰਗੀ ਸੀ। ਕੱਲ੍ਹ ਹਰਜੀਤ ਦਾ ਪਰਵਾਰ ਘਰ ਦੇ ਅੰਦਰ ਰਹਿਣ ਦੇ ਬਾਵਜੂਦ ਬਾਹਰੋਂ ਗੇਟ ਵਿੱਚ ਤਾਲਾ ਲਾ ਕੇ ਸੀਲ ਕੀਤੇ ਜਾਣ ਦੀ ਖਬਰ ਮੀਡੀਆ ਵਿੱਚ ਆਉਣ ਦੇ ਬਾਅਦ ਕਿਸੇ ਨੇ ਗੇਟ ਦਾ ਸੀਲਬੰਦ ਤਾਲਾ ਤੋੜ ਦਿੱਤਾ। ਹਰਜੀਤ ਸਿੰਘ ਨੇ ਕਿਹਾ ਕਿ ਇਹ ਕੰਮ ਬੈਂਕ ਵਾਲਿਆਂ ਨੇ ਤਹਿਸੀਲਦਾਰ ਮਨਜੀਤ ਸਿੰਘ ਦੀ ਹਾਜ਼ਰੀ ਵਿੱਚ ਕੀਤਾ ਹੈ। ਤਹਿਸੀਲਦਾਰ ਮਨਜੀਤ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਦੇ ਕੋਲ ਕੋਰਟ ਦੇ ਹੁਕਮ ਸਨ। ਇਸ ਦੇ ਤਹਿਤ ਕਾਰਵਾਈ ਉਨ੍ਹਾਂ ਨੇ ਕਰਵਾਈ ਹੈ। ਐੱਸ ਡੀ ਐੱਮ ਅਮਿਤ ਗੁਪਤਾ ਨੇ ਕਿਹਾ ਕਿ ਕਿਸੇ ਨੂੰ ਘਰ ਦੇ ਅੰਦਰ ਬੰਦ ਕਰਨਾ ਗੈਰ ਕਾਨੂੰਨੀ ਹੈ। ਜੋ ਦੋਸ਼ੀ ਹੋਣਗੇ ਉਨ੍ਹਾਂ ਦੇ ਵਿਰੁੱਧ ਕਾਰਵਾਈ ਹੋਵੇਗੀ।