ਫਰੀਦਕੋਟ, 19 ਫਰਵਰੀ (ਪੋਸਟ ਬਿਊਰੋ)- ਸ੍ਰੀ ਗੁਰੂ ਗੰ੍ਰਥ ਸਾਹਿਬ ਦੀ ਬੇਅਦਬੀ ਤੋਂ ਬਾਅਦ ਕੋਟਕਪੂਰਾ ਵਿੱਚ ਲੋਕਾਂ ਵੱਲੋਂ ਦਿੱਤੇ ਸ਼ਾਂਤਮਈ ਰੋਸ ਧਰਨੇ ਮੌਕੇ ਗੋਲੀਆਂ ਚਲਾਉਣ ਅਤੇ ਕੁੱਟਮਾਰ ਕਰਨ ਦੇ ਦੋਸ਼ਾਂ 'ਚ ਗ੍ਰਿਫਤਾਰ ਕੀਤੇ ਆਈ ਜੀ ਪਰਮਰਾਜ ਸਿੰਘ ਉਮਰਾਨੰਗਲ ਦਾ ਫਰੀਦਕੋਟ ਵਿੱਚ ਵਾਪਰੇ ਹਰ ਕਾਂਡ ਵਿੱਚ ਨਾਮ ਬੋਲਦਾ ਰਿਹਾ ਹੈ।
ਪਰਮਰਾਜ ਸਿੰਘ ਉਮਰਾਨੰਗਲ ਨੇ ਫਰੀਦਕੋਟ ਰੇਂਜ ਦਾ ਡੀ ਆਈ ਜੀ ਹੁੰਦੇ ਹੋਏ ਫਰੀਦਕੋਟ ਵਿਖੇ 2012 ਵਿੱਚ ਵਾਪਰੇ ਬਹੁ ਚਰਚਿਤ ਨਾਬਾਲਗ ਅਗਵਾ ਕਾਂਡ ਨੂੰ ਪ੍ਰੇਮ ਵਿਆਹ ਦਾ ਨਾਮ ਦੇਣ ਦੀ ਕੋਸ਼ਿਸ਼ ਕੀਤੀ ਤੇ ਅਗਵਾ ਕਾਂਡ ਦੇ ਮੁੱਖ ਦੋਸ਼ੀ ਨਿਸ਼ਾਨ ਸਿੰਘ ਨੂੰ ਬਚਾਉਣ ਲਈ ਉਚ ਪੱਧਰੀ ਪ੍ਰੈਸ ਕਾਨਫਰੰਸ ਵੀ ਕਰ ਦਿੱਤੀ ਸੀ, ਜਿਸ ਵਿੱਚ ਦਾਅਵਾ ਕੀਤਾ ਸੀ ਕਿ ਨਿਸ਼ਾਨ ਸਿੰਘ ਨੇ ਨਾਬਾਲਗ ਲੜਕੀ ਅਗਵਾ ਨਹੀਂ ਕੀਤੀ, ਉਸ ਨੇ ਪ੍ਰੇਮ ਵਿਆਹ ਕੀਤਾ ਹੈ। ਬਾਅਦ ਵਿੱਚ ਸ਼ੈਸਨ ਕੋਰਟ ਅਤੇ ਹਾਈ ਕੋਰਟ ਨੇ ਪੁਲਸ ਅਧਿਕਾਰੀ ਦੇ ਇਸ ਦਾਅਵੇ ਨੂੰ ਰੱਦ ਕਰ ਦਿੱਤਾ ਸੀ।
ਇਹੀ ਨਹੀਂ, ਫਰੀਦਕੋਟ ਦਾ ਐਸ ਐਸ ਪੀ ਹੁੰਦਿਆਂ ਉਮਰਾਨੰਗਲ ਨੇ ਕੁਝ ਪੱਤਰਕਾਰਾਂ ਖਿਲਾਫ ਨਿੱਜੀ ਰੰਜ਼ਿਸ਼ ਦੇ ਤਹਿਤ ਝੂਠੇ ਪਰਚੇ ਵੀ ਦਰਜ ਕਰਵਾਏ ਸਨ। ਉਮਰਾਨੰਗਲ ਨੇ ਫਰੀਦਕੋਟ ਦਾ ਐਸ ਐਸ ਪੀ ਹੁੰਦਿਆਂ ਇਕ ਅਕਾਲੀ ਆਗੂ ਉਤੇ ਪੰਜ ਕਿਲੋ ਅਫੀਮ ਰੱਖਣ ਦਾ ਪਰਚਾ ਵੀ ਦਰਜ ਕੀਤਾ ਸੀ, ਜਿਸ ਨੂੰ ਬਾਅਦ ਵਿੱਚ ਅਦਾਲਤ ਨੇ ਰੱਦ ਕਰ ਦਿੱਤਾ ਸੀ। ਗੈਂਗਸਟਰ ਸੁੱਖਾ ਕਾਹਲਵਾਂ ਦੇ ਕਾਤਲਾਂ ਦੀ ਫਰੀਦਕੋਟ ਵਿੱਚੋਂ ਦਿਖਾਈ ਗ੍ਰਿਫਤਾਰੀ ਵੀ ਵਿਵਾਦਾਂ 'ਚ ਰਹੀ ਹੈ। ਇਹ ਗ੍ਰਿਫਤਾਰੀਆਂ ਵੀ ਉਮਰਾਨੰਗਲ ਦੇ ਡੀ ਆਈ ਜੀ ਹੁੰਦਿਆਂ ਹੋਈਆਂ ਸਨ। ਗੈਂਗਸਟਰਾਂ ਕੋਲੋਂ ਵਿਦੇਸ਼ੀ ਹਥਿਆਰਾਂ ਦਾ ਜ਼ਖੀਰਾ ਬਰਾਮਦ ਹੋਣ ਦਾ ਮਾਮਲਾ ਵੀ ਅੱਜ ਤੱਕ ਵਿਵਾਦਾਂ 'ਚ ਹੈ। ਜਾਣਕਾਰ ਸੂਤਰਾਂ ਅਨੁਸਾਰ ਇਹ ਸਮੁੱਚਾ ਕੇਸ ਫਰਜ਼ੀ ਸੀ ਅਤੇ ਪ੍ਰਾਸੀਕਿਊਸ਼ਨ ਵਿਭਾਗ ਨੇ ਇਸ ਦਾ ਚਲਾਨ ਅਦਾਲਤ ਵਿੱਚ ਪੇਸ਼ ਕਰਨ ਤੋਂ ਇਨਕਾਰ ਕਰ ਦਿੱਤਾ ਸੀ। ਪੁਲਸ ਨੇ ਬਾਅਦ ਵਿੱਚ ਆਪਣੇ ਪੱਧਰ 'ਤੇ ਇਹ ਚਲਾਨ ਅਦਾਲਤ ਵਿੱਚ ਪੇਸ਼ ਕੀਤਾ।
ਫਰੀਦਕੋਟ ਵਿੱਚ ਬਣੀ ਗੁੰਡਾਗਰਦੀ ਵਿਰੋਧੀ ਐਕਸ਼ਨ ਕਮੇਟੀ ਦੇ ਆਗੂ ਗੁਰਦਿੱਤ ਸਿੰਘ ਸੇਖੋਂ ਦਾ ਕਹਿਣਾ ਹੈ ਕਿ ਪਰਮਰਾਜ ਸਿੰਘ ਉਮਰਾਨੰਗਲ ਦਾ ਫਰੀਦਕੋਟ ਜ਼ਿਲੇ ਵਿੱਚ ਐਸ ਐਸ ਪੀ ਹੁੰਦਿਆਂ ਅਤੇ ਡੀ ਆਈ ਜੀ ਰਹਿੰਦੀਆਂ ਸਮੁੱਚਾ ਸੇਵਾ ਕਾਲ ਵਿਵਾਦਾਂ 'ਚ ਘਿਰਿਆ ਰਿਹਾ ਸੀ। ਮੋਗਾ ਵਿੱਚ ਵਾਪਰੇ ਜਾਅਲੀ ਪਾਸਪੋਰਟ ਕਾਂਡ ਵਿੱਚ ਘਿਰੇ ਹੋਏ ਕੁਝ ਪੁਲਸ ਅਧਿਕਾਰੀਆਂ ਦੀ ਉਮਰਾਨੰਗਲ ਨੇ ਮਦਦ ਕੀਤੀ ਸੀ ਅਤੇ ਕੁਝ ਅਧਿਕਾਰੀਆਂ ਦੀਆਂ ਸੇਵਾਵਾਂ ਖਤਮ ਕਰ ਦਿੱਤੀਆਂ ਗਈਆਂ ਤਾਂ ਉਮਰਾਨੰਗਲ ਨੇ ਫਰੀਦਕੋਟ ਦੇ ਡੀ ਆਈ ਜੀ ਹੁੰਦਿਆਂ ਇਨ੍ਹਾਂ ਅਧਿਕਾਰੀਆਂ ਦੀਆਂ ਸੇਵਾਵਾਂ ਨੂੰ ਬਹਾਲ ਕਰ ਦਿੱਤਾ ਸੀ। ਹਾਲੇ ਤੱਕ ਦੋ ਕਮਿਸ਼ਨਾਂ ਦੀ ਜਾਂਚ ਵਿੱਚ ਇਹ ਸਾਹਮਣੇ ਆਇਆ ਹੈ ਕਿ ਕੋਟਕਪੂਰਾ ਵਿੱਚ ਪੁਲਸ ਸ਼ਾਂਤਮਈ ਧਰਨਾ ਦੇਣ ਵਾਲੇ ਲੋਕਾਂ ਉਪਰ ਲਾਠੀਚਾਰਜ ਨਾ ਕਰਦੀ ਤਾਂ ਬਹਿਬਲ ਅਤੇ ਬਰਗਾੜੀ ਕਾਂਡ ਤੋਂ ਬਚਿਆ ਜਾ ਸਕਦਾ ਸੀ।