ਵਾਸਿ਼ਗਟਨ, 19 ਫਰਵਰੀ (ਪੋਸਟ ਬਿਊਰੋ) : ਵਰਮੌਂਟ ਸੈਨੇਟਰ ਬਰਨੀ ਸੈਂਡਰਜ਼, ਜਿਨ੍ਹਾਂ ਦੀ 2016 ਦੀ ਬਾਗੀ ਰਾਸ਼ਟਰਪਤੀ ਕੈਂਪੇਨ ਨੇ ਡੈਮੋਕ੍ਰੈਟਿਕ ਸਿਆਸਤ ਨੂੰ ਨਵਾਂ ਆਕਾਰ ਦਿੱਤਾ, ਨੇ ਮੰਗਲਵਾਰ ਨੂੰ ਇਹ ਐਲਾਨ ਕੀਤਾ ਕਿ ਉਹ 2020 ਵਿੱਚ ਰਾਸ਼ਟਰਪਤੀ ਦੇ ਅਹੁਦੇ ਦੀ ਦੌੜ ਵਿੱਚ ਮੁੜ ਹਿੱਸਾ ਲੈਣਗੇ।
77 ਸਾਲਾ ਅਖੌਤੀ ਡੈਮੋਕ੍ਰੈਟਿਕ ਸਮਾਜਵਾਦੀ ਨੇ ਆਪਣੇ ਸਮਰਥਕਾਂ ਨੂੰ ਭੇਜੀ ਇੱਕ ਈਮੇਲ ਵਿੱਚ ਲਿਖਿਆ ਕਿ ਸਾਡੀ ਕੈਂਪੇਨ ਸਿਰਫ ਡੌਨਲਡ ਟਰੰਪ ਨੂੰ ਹਰਾਉਣ ਲਈ ਨਹੀਂ ਹੋਵੇਗੀ। ਸਾਡੀ ਮੁਹਿੰਮ ਦੇਸ਼ ਨੂੰ ਬਦਲਣ ਤੇ ਅਜਿਹੀ ਸਰਕਾਰ ਕਾਇਮ ਕਰਨ ਲਈ ਹੋਵੇਗੀ ਜੋ ਕਿ ਆਰਥਿਕ, ਸਮਾਜਕ, ਨਸਲੀ ਤੇ ਐਨਵਾਇਰਮੈਂਟਲ ਜਸਟਿਸ ਦੇ ਸਿਧਾਂਤਾ ਉੱਤੇ ਆਧਾਰਿਤ ਹੋਵੇਗੀ।
2016 ਦੀ ਆਪਣੀ ਕੈਂਪੇਨ ਵਿੱਚ ਸੈਂਡਰਜ਼ ਨੇ ਸਾਰਿਆਂ ਲਈ ਮੈਡੀਕੇਅਰ ਤੇ ਮੁਫਤ ਕਾਲਜ ਟਿਊਸ਼ਨ ਦਾ ਐਲਾਨ ਕੀਤਾ ਸੀ। ਫਿਰ ਉਨ੍ਹਾਂ ਹਿਲੇਰੀ ਕਲਿੰਟਨ ਨੂੰ ਚੁਣੌਤੀ ਦੇ ਕੇ ਡੈਮੋਕ੍ਰੈਟਿਕ ਸੰਸਥਾ ਨੂੰ ਹੀ ਹਿਲਾ ਦਿੱਤਾ। ਹਾਲਾਂਕਿ ਬਾਅਦ ਵਿੱਚ ਹਿਲੇਰੀ ਨੂੰ ਹੀ ਪਾਰਟੀ ਵੱਲੋਂ ਨਾਮਜਦ ਕੀਤਾ ਗਿਆ। ਹੁਣ ਸੈਂਡਰਜ਼ ਲਈ ਵੱਡਾ ਸਵਾਲ ਇਹ ਹੈ ਕਿ ਕੀ ਉਹ ਡੈਮੋਕ੍ਰੈਟਿਕ ਪ੍ਰੈਜ਼ੀਡੈਂਸ਼ੀਅਲ ਉਮੀਦਵਾਰਾਂ ਦੀ ਭੀੜ ਵਿੱਚ ਖੁਦ ਨੂੰ ਵੱਖਰਾ ਸਿੱਧ ਕਰ ਸਕਦੇ ਹਨ ਜਾਂ ਨਹੀਂ। ਇਹ ਵੀ ਸਮਾਂ ਹੀ ਤੈਅ ਕਰੇਗਾ ਕਿ ਆਪਣੇ ਨਵੇਂ ਨੀਤੀਗਤ ਵਿਚਾਰਾਂ ਨਾਲ ਕੀ ਉਹ ਕੌਮੀ ਸਿਆਸੀ ਮੰਚ ਉੱਤੇ ਕੋਈ ਛਾਪ ਛੱਡ ਸਕਣਗੇ।