ਬਿਹਤਰੀਨ ਤੇ ਸਮਰਥ ਅਭਿਨੇਤਾ ਵਜੋਂ ਆਪਣੀ ਪਛਾਣ ਬਣਾਉਣ ਵਾਲੇ ਨਵਾਜੂਦੀਨ ਸਿੱਦੀਕੀ ਦੀ ਪਹਿਲੀ ਪਸੰਦ ਕੰਟੈਂਟ ਓਰੀਏਂਟਿਡ ਫਿਲਮਾਂ ਹਨ। ਫਿਲਮ ‘ਫੋਟੋਗਰਾਫ' ਦੇ ਕਾਰਨ ਨਵਾਜੂਦੀਨ ਅਤੇ ਸਾਨਿਆ ਮਲਹੋਤਰਾ ਨਾਲ ਜੁੜਿਆ ਇੱਕ ਦਿਲਚਸਪ ਮਾਮਲਾ ਪਤਾ ਲੱਗਾ ਹੈ। ਨਵਾਜੂਦੀਨ ਅਤੇ ਸਾਨਿਆ ਆਪਣੇ ਫਿਲਮੀ ਕਰੀਅਰ ਸ਼ੁਰੂ ਕਰਨ ਲਈ ਜਦੋਂ ਪਹਿਲੀ ਵਾਰ ਮੁੰਬਈ ਆਏ ਤਾਂ ਦੋਵਾਂ ਨੇ ਏਥੇ ਸਭ ਤੋਂ ਪਹਿਲਾਂ ਗੇਟਵੇ ਆਫ ਇੰਡੀਆ ਦਾ ਦੀਦਾਰ ਕੀਤਾ ਸੀ। ਸਾਨਿਆ ਮਲਹੋਤਰਾ ਪੰਜਾਬੀ ਪਰਵਾਰ ਤੋਂ ਹੈ ਅਤੇ ਉਸ ਦਾ ਜਨਮ ਤੇ ਪਾਲਣ-ਪੋਸ਼ਣ ਦਿੱਲੀ ਵਿੱਚ ਹੋਇਆ ਹੈ। ਨਵਾਜੂਦੀਨ ਉੱਤਰ ਪ੍ਰਦੇਸ਼ ਦੇ ਮੁਜ਼ੱਫਰਪੁਰ ਨਾਲ ਸੰਬੰਧ ਰੱਖਦੇ ਹਨ। ਉਨ੍ਹਾਂ ਨੇ ਗੇਟਵੇ ਆਫ ਇੰਡੀਆ ਦਾ ਜ਼ਿਕਰ ਗੱਲਾਂ ਵਿੱਚ ਹੀ ਸੁਣਿਆ ਸੀ, ਇਸ ਲਈ ਜਦ ਮੁੰਬਈ ਆਉਣਾ ਹੋਇਆ ਤਾਂ ਸਿੱਧਾ ਉਹ ਗੇਟਵੇ ਆਫ ਇੰਡੀਆ ਚਲੇ ਗਏ ਸਨ।
ਆਪਣੀਆਂ ਅੱਖਾਂ ਵਿੱਚ ਬਾਲੀਵੁੱਡ ਦਾ ਸੁਫਨਾ ਸਜਾ ਕੇ ਆਏ ਨਵਾਜੂਦੀਨ ਇਸ ਨੂੰ ਦੇਖ ਕੇ ਹੈਰਾਨ ਰਹਿ ਗਏ। ਮੁੰਬਈ ਦਾ ਗੇਟਵੇ ਆਫ ਇੰਡੀਆ ਸ਼ਹਿਰ ਅਤੇ ਦੇਸ਼ ਦੀ ਸ਼ਾਨ ਤੇ ਸੈਲਾਨੀਆਂ ਦੀ ਖਿੱਚ ਦਾ ਕੇਂਦਰ ਵੀ ਹੈ। ਸੰਯੋਗ ਨਾਲ ਰਿਤੇਸ਼ ਬੱਤਰਾ ਦੀ ਫਿਲਮ ‘ਫੋਟੋਗਰਾਫ' ਦੀ ਜ਼ਿਆਦਾਤਰ ਸ਼ੂਟਿੰਗ ਮੁੰਬਈ ਦੇ ਗੇਟਵੇ ਆਫ ਇੰਡੀਆ 'ਤੇ ਹੋਈ। ਨਵਾਜ ਅਤੇ ਸਾਨਿਆ ਦੇ ਲਈ ਇਹ ਸ਼ੂਟਿੰਗ ਬੀਤੇ ਦਿਨਾਂ ਦੀਆਂ ਯਾਦਾਂ ਨੂੰ ਤਾਜ਼ਾ ਕਰਨ ਵਰਗੀ ਸੀ।